Nga mushaka kuzibuka munu mwamubwa, munapande kuzibuka byanalingi na bukalu bwanaliwana nabwo nomwo mwabuhyanenene. Mu ngila imo lika, nga mushaka kuzibuka Njambi mwamubwa, munapande kuzibuka byanalingi. Mukomoka manene omwo muzibuka byanalingi Njambi, nomwo mubitukwaselamo ha simbu ino na kulutwe.

Yehova Njambi ikeye watangele byuma byoshe, co ‘bifwa byendi bije kutwasa kumona binasholoka mwamubwa mu byuma bije byanalingi.’ (Loma 1:20) “Shukulu Kalunga watangele kaye na nzili yendi, watangele kaye na mana endi, co wajangumwine melu.” (Njelemiya 10:12) Byuma byakukomokesa byanatanga Njambi, nabyo bikamwesa ngwabyo watwaka mbunge.

Yehova watutangele mu ngila ya kulitila, mwafwa watutangele “mu cifwa cendi.” (Kushangumuka 1:27) Oku kulumbununa ngwabo twasa kutembwinina kamandondo bifwa byendi bya kulitila. Yehova watutangele na cashu ca kuzibuka mwakamwenamo byuma na kuzibuka byuma byashaka. Tubwaelela manene omwo tulifwita kuyoya mwaya cizango cendi. Co lalo, twasa kulikuta busamba nendi.

Byuma bya hano hasi byanatanga Njambi bikamwesa ngwabyo watwaka mbunge. Kapositolo Paulu wendekele ngwendi: ‘Oloni bisimbu byoshe Njambi wanene bukaleo bwa kukala kwendi babenya ha byuma byabibwa bije byakalingi, co akatwana nyonzi ya kutunda mwilu na bimbuto ha simbu yaibwa, akatwana bya kulya na kushulisa bimbunge byetu na kubwaelela.’ (Vilinga 14:17) Njambi katwanene lika byuma bitukwasa kuyoya. Oloni natwana byuma byabingi byabibwa bya kulisezaseza mangana tulikuwe kuyoya. Oloni kuli byuma byabingi byabibwa byashaka kukatulingila.

Yehova watangele kaye mangana banu bayoyemo myaka yoshe. Mbimbiliya ngwayo: “Kaye wakanene  ku banu.” Inendeka lalo ngwayo: “Katangele kaye ngeci kapwe ngwe mambo embwe, oloni hapwe ha kuyoya banu.” (Myaso 115:16; Isaya 45:18) Banu ba cifwa muka banapande kuyoya ha kaye? Co banapande kuyoyaho simbu ya kupwa hali? Mbimbiliya ngwayo: “Baka-busunga bakakala mu lifuti, co bakayoyelamo ku myaka yoshe.”—Myaso 37:29.

Yehova mwatangele ba Andama na Eva wabanene cipangi ca kulima na kunyunga lihya lya Endeni nambe ngwetu palandaisi. (Kushangumuka 2:8, 15) Njambi walekele ba Andama na Eva ngwendi: “Kiteni, ngeci batekulwila beni bakatume hano hasi hoshe.” (Kushangumuka 1:28) Ba Andama na Eva bakele na lilabelelo lya kuyoya myaka yoshe hano hasi. Calubinda, kubononokele kuli Njambi, co kubatwaleleleho kupwa “baka-busunga” baje bali na lilabelelo lya kukayoya “myaka yoshe” hano hasi. Nameme ngoco, bubi bwa ba Andama na Eva kubwatengulwile biyongola bya Njambi ha banu na kaye. Tucisimutwiyeni ha cuma cikwabo canalingi Njambi.

Mbimbiliya yapwa lijwi lya Njambi. Mwafwa bika Yehova watwanene Mbimbiliya? Walingile ngoco mangana tulilongese byendi. (Visimo 2:1-5) Mbimbiliya kuyakumbulwile bihula byoshe bitwasa kwihula kukundama kuli Njambi, co kukwesi libulu lyasa kulinga ngoco. (Muka-kwambulula 3:11) Oloni byoshe bibanasoneka mu Mbimbiliya bitukwasa tuzibuke Njambi mwamubwa. Mutukamono mwakapangelamo na banu, tukazibuka mwafwila. Tukamono banu bakamuzibisa kubwaha na baje kubesi kumuzibisa kubwaha. (Myaso 15:1-5) Mutukatanda Mbimbiliya tukazibuka mwakamwenamo kulemesa, kulongwa, hamo lika na bufuko. Byuma byanendekele Yesu na byuma byanalingile bibanasoneke mu Mbimbiliya, bikatukwasa tuzibuke mwamubwa mwafwila Yehova.—Yowano 14:9.

Co lalo, Yehova watwanene Mbimbiliya mangana itukwase kuzibuka mutwasa kupwila bakubwaelela mu kuyoya. Yehova napangesa Mbimbiliya mu kutuleka mwakupwila na nanga ya kubwaelela, mwa kupwila ba kujauka na byuma bituli nabyo, na mwakuhyanena bishoti. Ngwe mutumwena mu biñanda bili kulutwe muno mu mangazini, Mbimbiliya yakumbulula ebi bihula byakama bitukalihula mu kuyoya bya kufwa ngwe: Mwafwa bika tuyando tunatumu manene? Byuma bikafwa bati kulutwe? Mbimbiliya inendeka lalo ha byuma byanalingi Njambi mangana ashulisilile biyongola byendi.

Mbimbiliya yapwa libulu lya kulitila mu bingila byabingi mwafwa yatunda kuli Njambi. Baisonekele ku banalume bakupwa 40 ha myaka ya kutubakana 1,600, oloni yalitombola mwafwa Njambi ikeye wabatwamenenene. (2 Timateo 3:16) Mbimbiliya kuyalifwile ngwe mwa mabulu akwabo a kusañulu, mwafwa ikeyo banainyungilila mwamubwa ha myaka yaingi kwa kweta na lelo lino. Mabulu a kusañulu aje aliko amwesa ngwawo eyi ñanda inapu ya busunga. Co lalo, bitozi banalifwiti mangana bashokele baka-kunungulula Mbimbiliya ngeci kesi bainungulule na kuyana ku banu, oloni banonwa. Nameme ngoco, kukwesi libulu libali na kunungulula na kwana manene ku banu ngwe Mbimbiliya. Kukalako kwa Mbimbiliya kumwesa ngwabo “lijwi lya Njambi yetu likakala simbu yoshe.”—Isaya 40:8.

Njambi walingile cuma cimo mangana ashulisilile biyongola byendi. Ngwe mutunendekela ku maputukilo, Njambi watangele banu ngeci bayoye myaka yoshe hano hasi. Oloni omwo Andama kononokele kuli Njambi, wazimbalesele mwonyo wa myaka yoshe, co na bana bendi kubasele kuyoya myaka yoshe. Mbimbiliya ngwayo: “Ngeci bene, bubi bwezile hano ha kaye hali munu umo lika, co bubi bwendi bunanene kutsa. Co kutsa kunete ku miyati yoshe ya banu omwo boshe banalingi bubi.” (Loma 5:12) Kujeneka kuziba kwa munu kwalingile ngwe kwatanganesele biyongola bya Njambi. Yehova walingile bati?

Yehova katengwile biyongola byendi. Yehova wanene ba Andama na Eva kashitiko kwesekesa na mulonga ubalingile, oloni wabwaesele ngila ya kwobwelamo bana babo. Yehova wawanene bwasi ngila ya kumaneselamo buje bukalu na kuyendeka oho bene mwafwa wakala na mana. (Kushangumuka 3:15) Yehova wasele kutupatula ku bubi na kutsa  kwitila lika muli Munendi Yesu Kilisitu. Walingile bati ngoco?

Yehova watumine Yesu hano hasi mangana akulongese banu ngila itwala ku mwonyo “na kwana mwonyo wendi ngeci apatule banu babangi” ku bubi bwatundile mu kujeneka kwononoka kwa Andama. a (Mateo 20:28; Yowano 14:6) Yesu wasele kwana ndando ya kupatula mwafwa wapwile wa kulumbunuka ngwe mwa Andama. Oloni kalifwile na Andama mwafwa ikeye wononokele Njambi kweta na kukutsa kwendi. Yesu kapandele kutsa mwafwa kalingile bubi, mukemwo Yehova wamusangwile ngeci akayoye lalo mwilu. Yesu walingile byuma bije byonowele Andama. Walingisile banu baje bononoka kuli Njambi bakale na lilabelelo lya mwonyo wa myaka yoshe. Mbimbiliya ngwayo: “Co ngwe omwo banu boshe babapwisile baka-bubi ha kujeneka kwononoka kwa munu umo lika, mu ngila eyi bene boshe bakabapwisa baka-busunga ku mesho a Njambi a kwononoka kwa munu umo lika.” (Loma 5:19) Banu bakayoya myaka yoshe hano hasi ngwe mwayongwelelemo Njambi ku maputukilo mwafwa ya ndando ya kupatula yafwetele Yesu.

Tulilongesa byabingi hali Yehova nga tusinganyeka ha ngila yapangesele mu kumanesa bukalu bwatundile mu kujeneka kwononoka kwa Andama. Twamono ngwetu kukwesi byasa kwonowesa biyongola bya Njambi, majwi endi oshe akalishulisilila. (Isaya 55:11) Twalilongesa lalo ngwetu Njambi watuzema manene. Mbimbiliya ngwayo: “Co Njambi nasholola cizemo cendi kuli yetu omwo watumine Munendi umo lika mu kaye ngeci tukale na mwonyo muli ikeye. Omu mukemo mucafwa cizemo, kesi yetu twazema Njambi, oloni ikeye watuzemene na kutuma Munendi kupwa ñombelo ngeci bibi byetu banabisambesa.”—1 Yowano 4:9, 10.

“Njambi kabyanene kwana Munendi umo lika, oloni watweceleleye yetu boshe,” ngeci twakulaela ngwetu asa “kutwana byuma byoshe” byanakulaesa. (Loma 8:32) Bika byanakulaesa kukatulingila Njambi? Twaleleleniho kutanda.