Bilongesa binahu binasimutwiya ha cihula eci: Njambi Ikeye Iya? Twashangumukele kulilongesa ngwetu Yehova likelyo lizina lya Njambi, co cizemo cikeco cifwa cendi cakama manene. Co lalo twalilongesa byuma byanatulingila Njambi, nebi byakalingila banu kulutwe. Nameme kuli byuma byabingi bimunapande kuzibuka hali Njambi, oloni hamo kumwesi na kumona seo ya kumuzibuka.

Yehova natukulaesa ngwendi ‘nga tumushakazeka, co tumuwana.’ (1 Mizimbu 28:9) Nga mulilongesa bya Njambi na kumuzibuka mubezika manene mwafwa mupwa ‘kabusamba kendi.’ (Myaso 25:14) Kupwa kabusamba ka Njambi kumikwasa bati?

Mupwa ba kubwaelela. Yehova wapwa Njambi wa kubwaelela. (1 Timateo 1:11) Kushwenya kuyehi na Njambi na kuyoya mwaya cizango cendi kuminenela kubwaelela kuje kumilingisa mupwe ba kuzituka, na kukala na bisinganyeka byabibwa, na kulikangula ku mubila. (Myaso 33:12) Mupwa lalo ba kubwaelela mu kuyoya omwo mukala na futisi yaibwa na kuseza tulingolingo twatubi, co lalo mulikwatasana mwamubwa na bakweni. Muliziba ngwe mwalizibilile muka-kwimba uje wendekele ngwendi: “Mwamubwa kukala kuyehi na Njambi.”—Myaso 73:28.

Njambi amyaka mbunge na kuminyungilila. Yehova wakulaesele bangamba bendi ngwendi: ‘Njimilongesa na kuminangula.’ (Myaso 32:8) Awa majwi amwesa ngwawo Yehova waka mbunge kuli umo na umo wa bangamba bendi na kumwana byuma byanajeneka. (Myaso 139:1, 2) Nga mukanyamesa busamba bweni na Yehova, co mulimwena mwamikwasela mu bukalu bwoshe bwoshe bumuliwana nabwo.

Mukala na lilabelelo. Yahova Njambi asa kumikwasa mupwe ba kuzituka na kubwaelela ha simbu ino, co lalo amikwasa kukala na lilabelelo. (Isaya 48:17, 18) Mbimbiliya ngwayo: “Co mwonyo wa myaka yoshe ukewo ou, ngeci bakuzibuke yobe Njambi umo lika wa busunga, co na kuzibuka Yesu Kilisitu, uje iwatumine.” (Yowano 17:3) Muno mu matangwa a kukotoka, lilabelelo lyapwa ngwe ñobo ya cikongo ca mbunge ije itulingi tutwaleleho kukanyama.—Vahevelu 6:19.

Tunendekako lika byuma byabindondo bya seo bije binapande kutushongangeya kuzibuka Njambi mwamubwa na kulikuta nendi busamba. Simutwiyeni na Mukaleho wa Yehova woshe woshe nambe yeni ha jw.org haje hali mizimbu yaingi yasa kumikwasa.