Nga muli mu bukalu mukazibuka ngweni kabusamba keni wa busunga ashwenya muyehi neni na kumikwasa. Mukemwo banu babangi bakendeka ngwabo Njambi kapwile kabusamba kabo mwafwa bakasinganyeka ngwabo kesi kubakwasa mu bukalu. Njambi natulingila byuma byabingi byabibwa, co lalo akamanesa tuyando twoshe tuliko ano matangwa. Njambi akalinga bika?

Njambi akamanesa bubi bwoshe mwafwa akanyongesa uje muka-kubunena. Mbimbiliya yatumbula munu muka-kunena tuyando na bubi bwoshe ngwayo: “Kaye koshe kali mu nzilli ya Uje Liyabolo.” (1 Yowano 5:19) Yesu wendekele ngwendi Satana “Liyabolo” ikeye “muka-kushwana kano kaye.” (Yowano 12:31) Satana ikeye nanene tuyando twoshe tubali na kupinda natwo banu hano hasi. Njambi akamulinga bati?

Yehova Njambi ololo ana nzili Munendi Yesu Kilisitu mangana ‘anyongese uje wakala na nzili ya kutsa, ikeye bene Liyabolo.’ (Vahevelu 2:14; 1 Yowano 3:8) Mbimbiliya imwesa ngwayo Liyabolo azibuka ngwendi “kunasala lika kasimbu kakandondo kuli ikeye” mangana bamunyongese. (Kujombolola 12:12) Njambi akanyongesa na banu boshe baka-bubi.—Myaso 37:9; Visimo 2:22.

Ishamatanga mwakanyongesa bubi hano hasi hoshe, co akashulisilila biyongola byakele nabyo omwo watangele kaye na banu. Bubwa muka butukalikuwa mubukahwa bubi?

Tukakala mwamubwa mu kwoloka ku myaka yoshe. “Baka-kulikehesa bakashwana mu lifuti, co bakajolela na kukala mu kwoloka.”—Myaso 37:11.

Kukala byakulya byabibwa byabingi. “Tiliku ipwe yaingi mu lifuti, hakamwa ya malundu hashule na bimbuto.”—Myaso 72:16.

Tukakala na binjubo byabibwa, co bipangi byetu kubikai mwa ngoco. “Banu bange bakatunga binjubo byabo, co bakakuna bitungu bya mikolobozi ya bushuka bwa binyu na kulya bushuka bwakwo. Bipangi byabo kubikai mwangoco”—Isaya 65:21, 22.

Neni mushaka kukamona mubikalishulisilila ebi byuma ndi? Banu ololo balikuwa buyoye bwa cifwa eci ha litangwa na litangwa.

Tubaboshe tuli na kuyoya muno mu matangwa a kukotoka, twalitala na mabezi na kutsa, oloni Njambi ololo abinyongesa byoshe. Ololo Njambi apangesa ndando ya kupatula yafwetele Yesu mangana “woshe akulaela kuli ikeye kesi anyonge, oloni akale na mwonyo wa myaka yoshe.” (Yowano 3:16) Bubwa muka buikanena ñombelo ya Yesu?

Mishongo ikahwa. “Naumo wai lalo uje akayoyela mu lifuti lyetu akalinyenga ha kubinja, co bubi bwoshe bakabusambesa.”—Isaya 33:24.

Kukukakala kutsa. “Shukulu Kalunga wa Hakamwa ya Byoshe akanyongesa nzili ya kutsa na kusikumuna misozi ku mesho a munu na munu.”—Isaya 25:8.

Banu bakayoya myaka yoshe. “Bwana bwa Njambi bunapu mwonyo wa myaka yoshe muli Kilisitu Yesu Mwene yetu.”—Loma 6:23.

Batsi bakasanguka. “Banu boshe bababwa na aba bababi bakasanguka ku batsi.” (Vilinga 24:15) Ndando ya kupatula ije yapwa bwana bwa kutuda kuli Njambi ikeyo ikalingisa batsi bakasanguke.

Njambi akashulisilila bati ebi bikulaeso?

Njambi akashulisilila biyongola byanakele nabyo omwo watangele banu na kaye kupangesa bumwene bwendi, co nangula Munendi Yesu Kilisitu kupwa Mwene. (Myaso 110:1, 2) Yesu washikile bandongesi bendi ngwendi balombe obu bumwene omwo wabalekele ngwendi balombele ngwabo: “Tate yetu uli mwilu, . . . Bumwene bwobe bwije.”—Mateo 6:9, 10.

Bumwene bwa Njambi bukebwo bukayula hano hasi, co bukanyongesa kubabala na tuyando twoshe. Kukwesi bumwene bwasa kuyula mwamubwa banu ngwe mwa mu bumwene bwa Njambi. Mukemwo Yesu walifwitile “kwambulula biñanda byabibwa bya Bumwene,” mwakele hano hasi, co walekele bandongesi bendi ngwendi bambulule bya bumwene.—Mateo 4:23; 24:14.

Yehova Njambi wazema manene banu, mukemwo nakulaesa kukabalingila byuma byoshe ebi byabibwa. Kumushaka kuzibuka Njambi wa cifwa eci na kushwenya kuyehi nendi ndi? Bibezikiso muka mukawana nga muzibuka Njambi na kushwenya kuyehi nendi? Ñanda inatako ikumbulula eci cihula.