Banu babangi bakendeka ngwabo bakulaela Njambi. Oloni nga mubehula ngweni Njambi iya, byeka bamikumbulula. Bamo bakasinganyeka ngwabo Njambi wapwa lyako wa kukenyuka mbunge uje washaka kwana banu baka-kulinga bubi kashitiko. Bakwabo co bakasinganyeka ngwabo basa kulilingila byoshe bibashaka mwafwa Njambi wakala na cizemo, co muka-kusambesa. Kuli bakwabo lalo bakakulaela ngwabo Njambi wakala kulyala manene, co katwakele mbunge. Ebi bisinganyeka bya kulisezaseza bikalingisa bamo bamone ngwabo kutwasa kuzibuka Njambi.

Kuzibuka Njambi kwapwa kwa seo ndi? Eyo. Kuzibuka Njambi mwamubwa kumikwasa muzibuke bi muli na kuyoyela. (Vilinga 17:26-28) Nga mulikuta busamba na Njambi, co amizema manene na kumikwasa. (Yakomba 4:8) Co lalo nga muzibuka mwamubwa Njambi, mukawana mwonyo wa myaka yoshe.—Yowano 17:3.

Mwasa kuzibuka bati Njambi? Iya wapwa kabusamba weni wa ha mbunge uje imunezilila manene? Busamba bweni bwashangumukile bati? Hamo mwalibangele kuzibuka lizina lyendi, futisi yendi, byuma byashaka na bije kashakele, byuma byanalingi na byuma byanayongola kulinga, na bikwabo byeka. Byuma bimunazibukile hali ou munu bikebyo byamilingisile mulikute nendi busamba.

Mu ngila imo lika, twasa kuzibuka mwamubwa Njambi nga tuzibuka bikumbululo ku bihula ebi:

• LIZINA LYA NJAMBI LYAPWA LIKA?

• BIFWA MUKA BYAKALA NABYO NJAMBI?

• BYUMA MUKA BYANALINGI NJAMBI?

• BYUMA MUKA BYAKALINGA KULUTWE?

• KUZIBUKA NJAMBI KUMIKWASA BATI?

Eyi mangazini imwesa muinakumbulwilamo Mbimbiliya ebi bihula. Biñanda bilimo bimikwasa muzibuke byabingi hali Njambi, co lalo binendeka ha bubwa bumulikuwa nga mulikuta busamba nendi.