Biyendeka Mbimbiliya ha Byuma Bikalingiwa Kulutwe
Mukashaka kuzibuka byuma bikalingiwa kulutwe ndi? Mbimbiliya inendeka byuma byabibwa bikalingiwa kulutwe bije bikalingisa banu balikuwe kuyoya mwamubwa hano hasi.
Yesu wendekele byuma bimo bije bitukwasa ‘tuzibuke ngwetu Bumwene bwa Njambi buli muyehi.’ (Luka 21:31) Wapolofwetele byuma bimo bikalingiwa bya kufwa ngwe binzita byakama, mandunduma, njala yakama na mishongo ya kulitambwisa, bije bituli na kulimwena matangwa ano.—Luka 21:10-17.
Mbimbiliya inatuleke lalo ngwayo bifwa byabibi bibali nabyo banu bimwesa ngwabyo tuli mu “matangwa a kukotoka” kwa bifulumende bya banu. Mwasa kutanda ebi bifwa ku 2 Timateo 3:1-5. Twakulahela ngwetu, kulimwena banu ba bifwa na bilinga bya cifwa eci, kwamilingisa mukulahele ngweni obu bupolofweto bwa mu Mbimbiliya buli na kulishulisilila.
Eci cimwesa bika? Cimwesa ngwaco Bumwene bwa Njambi alolo bunena byuma byabibwa hano hasi mangana banu balikuwe kuyoya. (Luka 21:36) Mu Mbimbiliya, Njambi nakulahesa kukalinga byuma byabibwa mu kaye na kubezikisa banu baje bakayoyamo. Tucisimutwiyeni ha byakumwenako bimo.
BUMWENE BWABUBWA
“Co [Yesu] bamwanene moko na kasingimiko na nzili ya bumwene, ngeci bene, banu ba ku mafuti oshe na miyati yoshe ya banu na banu baka-kwendeka mu bindaka byeka bamupangele. Moko yendi ikakala ku myaka yoshe, co bumwene bwendi kubukahu embwe.”—NDANYELE 7:14.
Obu bumwene bumikwasa bati? Mwasa kulikuwa kuyoya mu fulumende yaibwa manene yanashimbika Njambi ije ikayula lifuti lyoshe, co nangula Munendi kupwa Mwene.
BUKANGULE
‘Na umo wahi akakala mu lifuti akalinyenga ha kubinja.’—ISAYA 33:24.
Oku kumikwasa bati? Kumukabinji lalo nambe kupwa biyanga, co mukayoya myaka yoshe.
KWOLOKA
“Ikeye amanesa binzita hano hasi hoshe.”—MYASO 46:9.
Oku kumikwasa bati? Kukukakala bushonde bwa binzita na tuyando twoshe tubikanene.
KAYE KOSHE KAKASHULA NA BANU BABABWA
“Baka-bubi bakahwa boshe njwa . . . Baka-kulikehesa bakaswana mu lifuti.”—MYASO 37:10, 11.
Oku kumikwasa bati? Kukukakala lalo banu bababi, oloni kukakala lika banu baje bashaka kwononoka kuli Njambi.
KAYE KOSHE KAKAPWA PALADAISI
“Bakatunga binjubo byabo, co bakakuna bitungu bya mikolobozi ya bushuka bwa binyu na kulya bushuka bwakwo.”—ISAYA 65:21, 22.
Oku kumikwasa bati? Lifuti lyoshe likapwa lyalibwa menene. Njambi akashulisilila lilombelo lyetu, mwafwa cizango cendi cikalingiwa “hano hasi.”—Mateo 6:10.
