Lizina lya Njambi lyapwa lika? Njambi nalitumbula ngwendi: “Yange Yehova. Likelyo lizina lyange.” (Isaya 42:8, NWT) Lizina lya Yehova liwaniwa lwa kupwa 7,000 mu bisoneka bya kulibanga. Oloni baka-kunungulula Bimbimbiliya babangi banengisa lizina lya Njambi na mazina eka a kufwa ngwe “Mwene.” Njambi ashaka ngwendi mupwe kabusamba kendi mukemwo amishongangeya ngwendi “mumusane ha lizina lyendi.”—Myaso 105:1, NWT.

Mazina Eka Abakasanesa Yehova. Mu Mbimbiliya muli mazina eka abanasanesa Yehova a kufwa ngwe “Njambi,” “Muka-nzili Yoshe,” “Ishamatanga,” “Tate,” “Mwene,” na “Wa Hakamwa ya Byoshe.” Mu malombelo amangi abanasoneka mu Mbimbiliya banatumbulamo lizina lya Yehova na mazina eka a bumpau abakamusanesa.—Ndanyele 9:4.

 Njambi wafwa bati? Njambi wapwa sipilitu. (Yowano 4:24) Mbimbiliya yendeka ngwayo “na umo wahi wamona Njambi.” (Yowano 1:18) Inendeka lalo mwakalizibilamo Njambi. Banu basa kumuzibisa kubihya ku mbunge nambe kumuzibisa kubwaha nga ‘balinga bya busunga.’—Visimo 11:20; Myaso 78:40, 41.

Bifwa Byabibwa bya Njambi. Njambi wazema banu ba bisemwa na miyati yoshe. (Vilinga 10:34, 35) Wapwa lalo “muka-kutetela na mema ku mbunge uje kesi kulubala bwasi, muka-kulongwa na muka-kumwesa cizemo cije kucesi kutenguluka.” (Kutuuka 34:6, 7) Oloni kuli bifwa bimo biwana bya Njambi bije byapwa byabibwa manene.

Wakala na Nzili. Njambi asa kushulisilila byuma byoshe byanakulahesa mwafwa wapwa “Muka-nzili Yoshe.”—Kushangumuka 17:1.

Wakala na Mana. Njambi wakala na mana kutubakana banu boshe. Mukemwo Mbimbiliya yendeka ngwayo “ikeye lika muka-mana oshe.”—Loma 16:27.

Wazema Busunga. Njambi akalingi byuma mu busunga simbu yoshe. Bilinga byendi byoshe byapwa bya kulumbunuka “na kusungama.”—Kwituluka mu Mashiko 32:4.

Wakala na Cizemo. Mbimbiliya yendeka ngwayo “Njambi wapwa cizemo.” (1 Yowano 4:8) Njambi kesi kumwesa lika cizemo, oloni wapwa cizemo. Cizemo cendi cakama cikeco cikamushongangeya kulinga byuma byoshe byakalingi bije bikatukwasa mu bingila byabingi.

Wapwa kabusamba wamubwa. Njambi wapwa Tate yetu wa cizemo wa mwilu. (Mateo 6:9) Twasa kupwa babusamba bendi nga tumukulahela. (Myaso 25:14) Njambi ali na kumilanya ngwendi mushwenye kuyehi nendi kwitila mu lilombelo, co lalo ashaka ngwendi ‘mwake bukalu bweni bwoshe hali ikeye mwafwa ali na kumilela.’—1 Petulu 5:7; Yakomba 4:8.

Yesu keti ikeye Njambi. Yesu wapwa wa kulitila mwafwa ikeye lika ibanatanga kuli Njambi. Mukemwo Mbimbiliya yamutumbula ngwayo wapwa Muna Njambi. (Yowano 1:14) Munima ya kutanga Yesu, Yehova wapangelele hamo na munendi wa ntwatwa uje wapwa “ngangula mu kupanga” omwo watangele byuma byoshe bya mwilu na hasi.—Visimo 8:30, 31, NWT; Kolose 1:15, 16.

 Yesu Kilistu kendekele ngwendi wapwa Njambi. Oloni wendekele ngwendi: ‘Njatunda kuli [Njambi] mwafwa ikeye wanjitumine.’ (Yowano 7:29) Yesu mwakele na kwendeka na ndongesi yendi, wasanene Yehova ngwendi: ‘Tate ikeye isho’ co ‘Njambi yange ikeye Njambi yobe.’ (Yowano 20:17) Yesu mwasangukile, waile mwilu na kukakala ku liboko lya Ishe lya cilyo, co Yehova wamwanene cipangi cakama.—Mateo 28:18; Vilinga 2:32, 33.

Yesu Kilistu Asa Kumikwasa Mushwene Kuyehi na Njambi

Yesu wezile hano hasi kwakutulongesa bya Ishe. Yehova wendekele hali Yesu ngwendi: “Ou ikeye Munange Injazema, mutolilileni.” (Mako 9:7) Yesu azibuka mwamubwa Njambi kutubakana banu boshe. Yesu wendekele ngwendi: “Na umo wahi azibuka Ishe kubanga Mwana, na baje boshe bashaka mwana kubasholwelaye.”—Luka 10:22.

Yesu akatembwinina bifwa bya Njambi mu kulumbunuka. Yesu watembwininine mwamubwa bifwa bya Ishe, mukemwo wendekele ngwendi: “Woshe uje nanjimono namono Tate.” (Yowano 14:9) Yesu wakwasele banu bashwenye kuyehi na Njambi mwafwa watembwininine cizemo cakala naco Ishe mu majwi na mu bilinga. Yesu wendekele ngwendi: ‘Yange ngila, na busunga, na mwonyo, na umo wahi aya kuli Tate kubanga etile muli yange.’ (Yowano 14:6) Wendekele lalo ngwendi: “Baka-kulemesa ba busunga bakalemesa Tate mu sipilitu na mu busunga, mwafwa Tate ali na kushakezeka banu ba cifwa eci mangana bamulemese.” (Yowano 4:23, NWT) Acisinganyekeni hali eyi ñanda. Yehova ashaka ngwendi neni mulilongese busunga hali ikeye.