Ha myaka yaingi naumo wai wazibukile mwakukumbulwila mwamubwa eci cihula, oloni mishongo ya kulitambwisa yatsiile banu babangi. Mu kwita kwa simbu, baka-sayansi bawanene cikumbululo. Bendekele ngwabo tulongolo tuketwo tukanene eyi mishongo. Co otu tulongolo tukendesa mishongo, twapwa twatundondo manenenene. Kuzibuka obu busunga kunakwasa banu basake na kulinyungilila ku mishongo yaingi, co banu babangi bali na kuyoya simbu yailaha mu bukangule.

Batico bihula bikwabo bya seho? Kutondesesa busunga ha bihula binatako kumikwasa bati?

• Njambi ikeye iya?

• Yesu Kilistu ikeye iya?

• Bumwene bwa Njambi bwapwa buka?

• Byuma muka bikalingiwa kulutwe?

Banu babangi banawana bikumbululo ku bihula ebi, co banabwahelela mu buyoye bwabo. Kuzibuka mubanakumbulwila ebi bihula neni kumikwasa.

Munasa kwihula ngweni: ‘Kuma twasa kuzibuka busunga ha cuma coshe coshe ndi?’ Matangwa ano kumoneka ngwe kuwana busunga ha byuma byabingi kunakaluwa manene. Mwafwa bika?

 Banu babangi kubakulahela ngwabo bibali na kwendeka baka-fulumende, baka-mingoso na baka-kwambulula mizimbu byapwa bya busunga. Kukabakaluwila kuzibuka indi bibabaleka banu binapu bya busunga indi banashwekeko biñanda bimo nambe bali na kubakwisa. Banu kubesi kukulahela biñanda bya busunga bibaziba na kumona seho yabyo, mwafwa ano matangwa kubalikulahelele umo na mukwabo, co lalo mizimbu yaingi yapwa ya makuli.

Nameme ngoco, twasa kuwana bikumbululo bya busunga ku bihula bya seho bitukalihula. Twasa kubiwana bati? Nga tulinga mutukalingila ha litangwa na litangwa mu kuwana bikumbululo ku bihula bimo byabindondo bitukalihula.

Neni mukatondesesa busunga ha litangwa na litangwa. Tucisimutwiyeni ha byuma byalingiwile kuli Jessica. Wendekele ngwendi: “Munange wa munakazi kalizibasanene na byelu. Nameme nga alya tubyelu twatundondo lika asa kutsa.” Ngeci Jessica napande kuzibuka ngwendi byakulya byalanda kubikobelesa munendi mu bukalu. Wendekele lalo ngwendi: “Njikashangumuka tai kutanda bibanasoneka ha mapapelo abakalameka ha bya kulya mangana njizibuke bibanakamo. Kutundaho njikatondesesa nameme kwihula baje banabipanga mangana njizibuke indi hamo banapandakanako na tubyelu. Njikatondesesa lalo mangana njizibuke indi eyi kampani ikapanga bya kulya bije kubyasa kunena bukalu.”

Hamo kumwesi kutondesesa busunga ha litangwa na litangwa ngwe mwakalingila Jessica, oloni neni munasa kulikwasesa bingila binatako mu kuwana bikumbululo ku bihula bimuli nabyo ngwe mwakalingila Jessica.

• Zibukeni byalibungilamo.

• Tondeseseni.

• Munapande kumona ngweni bingila bimupangesa mu kutondesesa bya busunga.

Ebi bingila binasa lalo kumikwasa muwane bikumbululo bya busunga ku bihula bya seho bimukalihula. Mu ngila muka?

Jessica mwatondesesele busunga bwa mu Mbimbiliya, walikwasesele bingila byakalikwasesa mu kushaka kuzibuka byakulya bije bikanenela munendi bukalu. Wendekele ngwendi: “Kutanda na kutondesesa kunanjikwasele njiwane busunga bwa mu Mbimbiliya.” Ngwe mwakalingi Jessica, banu babangi banalilongesa biyendeka Mbimbiliya ha bihula ebi:

• Bika bituli na kuyoyela?

• Bika bikalingiwa nga munu atsa?

• Bika bituli na kuyandela?

• Njambi ali na kulinga bika mangana amanese tuyando twoshe?

• Twasa kupwa bati ba kubwahelela mu naanga?

Mwasa kuwana bikumbululo bya busunga bya bihula ebi na bikwabo, nga mutanda Mbimbiliya na kutondesesa byabingi ha webusaiti ya www.pr418.com.