Bibakendeka Banu ha Lilombelo
“Munjikalombela, njikalizibi ngwe Njambi ali muyehi nange, co nanjikwatelela ku liboko na kunjitwamenena ha simbu injiliziba ngwe njinazimbala.”—MARÍA.
“Munakazi wange watsile munima ya kubinja mushongo wa kansa ha myaka 13. Njakele na kulombela kuli Njambi ha litangwa na litangwa, co njalizibile ngwange wakele na kunjitolilila. Ngeci, njakele mu kwoloka.”—RAÚL.
“Lilombelo lyapwa bwana bwabubwa bwanatwana Njambi.”—ARNE.
Banu babangi ba kufwa ngwe María, Raúl na Arne bamona lilombelo kupwa bwana bwa kulitila. Bakalizibi ngwabo basa kusimutwiya na Njambi, kukandelela kuli ikeye na kumulomba bukwasi kwitila mu lilombelo. Banakulahela ngwabo biyendeka Mbimbiliya ha lilombelo byapwa bya busunga. Mbimbiliya ngwayo: “Tunasimpi ku mesho a Njambi, omwo tunazibuka ngwetu ikeye atuziba nga tumulomba cuma cimo ngwe ku cizango cendi.”—1 Yowano 5:14.
Oloni bamo kubakulahela biyendeka Mbimbiliya ha lilombelo. Steve wendekele biyongola byakele nabyo ha lilombelo, ngwendi: “Munjakele na myaka 17, babusamba bange batatu batsile mu bimonde. Umo watsile mu monde ya mota, babali co babombelele mu kalunga-ndonga.” Steve walingile bika? Ngwendi: “Njalombelele kuli Njambi na kumwihula mangana anjileke byanenesele ngoco, oloni kanjikumbulwile. Ngeci, njalihwile ngwange, ‘Seho mukajo ili ha kulombela kuli Njambi?’” Banu babangi bakalizibi ngwabo kukwesi seho ya kulombela mwafwa wahi akakumbulula malombelo abo.
Kuli byuma bikwabo lalo bikalingisa banu bamone ngwabo kulombela keti kwa seho. Bamo bakendeka ngwabo Njambi azibuka byuma byoshe. Ngeci, azibuka byuma bitutonda na bukalu bwetu, co kukwesi seho ya kumulekabyo.
Bamo bakendeka ngwabo Njambi kesi kutolilila ku malombelo abo mwafwa ya byuma byabibi bibalingile kunima. Jenny ngwendi: “Njalingile byuma bimo byabibi, co njikalizibi ngwe njiwangoco. Ngeci, njikasinganyeka ngwange Njambi kasa kunjitolilila.”
Mwamona bati kulombela? Nga neni mukalizibi ngwe banu batunasimutwiya, co zibukeni ngweni Mbimbiliya yasa kumikwasa kuwana bikumbululo ku bihula byeni. Biyendeka Mbimbiliya ha lilombelo byapwa bya busunga, * co yasa kumikwasa kuwana bikumbululo ku bihula bya kufwa ngwe:
-
Njambi akatolilila ku malombelo etu ndi?
-
Mwafwa bika Njambi kesi kukumbulula malombelo amo?
-
Munapande kulombela bati mangana Njambi amikumbulule?
-
Kulombela kumikwasa bati?
^ par. 9 Mu Mbimbiliya muli malombelo amangi a bangamba ba Njambi, kwambateselela na malombelo a Yesu Kilistu. Cakumwenako, mu Bisoneka bya Cihebelu, bije bibakatumbula banu babangi ngwabo Tesitamende ya Laja, muli malombelo a kutubakana 150.
Hamo Mushaka Lalo Ebi
BIBAKEHULA BABAHA
Kuma Kulombela Kwapwa kwa Seho Ndi?
Kuma lilombelo lyapwa lya seho bene ndi, indi lyapwa lika ngila ya kulishubulwisilamo?
