“Mukulomba kweni, keti mutumise manene majwi amangi a kujeneka seho.”—Mateo 6:7.

Yehova kashaka ngwendi simbu yoshe, twilukile-ilukile kulomba byuma bimo bitunakwata mu mutwe nambe bya kusoneka mu libulu. Oloni ashaka ngwendi tulombele kutundilila kwisi ya mbunge yetu. Acisinganyekeni mumunesi kulizibila nga kabusamba keni elukila-ilukila kwendeka majwi amolika ha litangwa na litangwa omwo asimutwiya neni. Babusamba bababwa, bakazituka na kulileka byuma bili ku bimbunge byabo. Nga tupangesa majwi etu omwo tulombela, co tumwesa ngwetu twamona Tate yetu wa mwilu kupwa kabusamba ketu.

“Nameme munalombo kumwasa kubitambula, omwo biyongola byeni binapu byabibi.”—Yakomba 4:3.

Tuzibuka ngwetu Njambi kasa kukumbulula lilombelo lyetu nga tumulomba byuma bije kashakele nambe bije kashaka ngwendi tukale nabyo. Cakumwenako, nga munu ali na kweha bweho bwa linyanyamena, co alombela kuli Njambi mangana amukwase kukala na sande na kuwina bimbongo. Kuma Yehova asa kumukumbulula bene ndi? Yehova natuleke laja ngwendi kesi tukale na nuna nambe kukulahela byuma bya kujeneka seho bya kufwa ngwe sande. (Isaya 65:11; Luka 12:15) Yehova kasa kukumbulula malombelo a cifwa eci. Nga tushaka ngwetu  Njambi akumbulule malombelo etu, co tunapande kulomba byuma bije bilitombola na binangulo bya mu Mbimbiliya.

“Munu uje kononoka lishiko, malombelo endi kuli Njambi anapu a bunyengwe.”—Visimo 28:9.

Kusañulu, Njambi kakumbulwile malombelo a banu baje kubononokele mashiko endi. (Isaya 1:15, 16) Njambi katengulukile. (Malakiya 3:6) Nga tushaka ngwetu akumbulule malombelo etu, co tunapande kuyoya mu kulitombola na mashiko endi. Batico nga twalingile byuma bimo byabibi kunima? Kuma Yehova kakatolilila ku malombelo etu ndi? Embwe. Njambi atukonekela nga tutenguluka na kulinga mwoshe mutwasela kumuzibisa kubwaha ku mbunge.—Vilinga 3:19.