Njambi Akatolilila ku Malombelo Etu Ndi?
Mwalihulaho laja ngweni Njambi akatolilila ku malombelo eni ndi? Nga mukemwo, co keti yeni lika. Banu babangi mubakakala mu bukalu bakalombela kuli Njambi, oloni bukalu bwabo anga bukatwalelelaho. Kuma oku kumwesa ngwabo Njambi kesi kutolilila ku malombelo etu ndi? Embwe. Mbimbiliya ngwayo Njambi asa kutolilila ku malombelo etu nga tulombela mu ngila inapande. Tusimutwiyeni byuma biyendeka Mbimbiliya.
NJAMBI AKATOLILILA KU MALOMBELO.
“Omwo yobe ukakumbulula malombelo, banu boshe bakaija kuli yobe.”—Myaso 65:2.
Banu bamo bakalombela mwafwa ngwabo mubakalingi ngoco bakalizibiko bwino. Oloni kubakulahela ngwabo kuli umo akatolilila ku malombelo abo. Kutwesi kulombela mu kushaka lika ngwetu tuzibe bwino nambe kukolesa mu bukalu. Mbimbiliya ngwayo Yehova * “ali muyehi na banu baje boshe batambeka kuli ikeye, banu baje batambeka kuli ikeye mu busunga. . . . Aziba mitambi yabo, co abamena.”—Myaso 145:18, 19.
Twakulahela ngwetu Yehova Njambi akazibi malombelo a bangamba bendi. Nendeka ngwendi: ‘Mukatambeka kuli yange. Mukaija na kulomba kuli yange, co njikamitolilila.’—Njelemiya 29:12.
NJAMBI WASHAKA NGWENDI MULOMBELE KULI IKEYE.
“Lombeleni simbu yoshe.”—Loma 12:12.
Mbimbiliya itushongangeya “kulombela” simbu yoshe. Awa majwi amwesa ngwawo Yehova Njambi washaka ngwendi tulombele kuli ikeye.—Mateo 26:41; Efeso 6:18.
Mwafwa bika Njambi washaka ngwendi tulombele kuli ikeye? Cakumwenako, cisemi asa kuliziba mwamubwa nga munendi amulomba ngwendi, “Tate njikwaseniko?” Cisemi nasa kuzibuka mwalizibila munendi na bukwasi bwatonda, oloni nga aziba munendi alomba bukwasi, amona ngwendi munendi wamukulahela, co wamuzema. Mu ngila imo lika, nga tulombela kuli Yehova Njambi, tumwesa ngwetu twamukulahela, co tushaka kulikuta nendi busamba.—Visimo 15:8; Yakomba 4:8.
NJAMBI WAMYAKA MBUNGE.
‘Akeni bukalu bweni bwoshe hali ikeye mwafwa wamyaka mbunge.’—1 Petulu 5:7.
Njambi washaka ngwendi tulombele kuli ikeye mwafwa watuzema, co lalo watwaka mbunge. Azibuka bishoti byetu na bukalu bwetu bwoshe, co ashaka kutukwasa.
Mwene Ndabiti wakele na kulombela kuli Yehova simbu yoshe mangana amukwase. Wakele na kumuleka bisinganyeka byendi nomwo mwakele na kulizibila. (Myaso 23:1-6) Njambi walizibile bati mwazibile malombelo a Ndabiti? Njambi wazemene Ndabiti, co watolilile ku malombelo endi amangi. (Vilinga 13:22) Mu ngila imo lika, Njambi akatolilila ku malombelo etu mwafwa watwaka mbunge.
“NJAZEMA SHUKULU KALUNGA OMWO NAZIBI MALOMBELO ANGE”
Awa anapu majwi asonekele muka-kwimba umo uje wasonekele mwaso umo wa mu Mbimbiliya. Wakulahelele ngwendi Njambi wazibile malombelo endi, co kuzibuka ngoco kwamukwasele manene. Walizibile kukala muyehi na Njambi, co wasele kukolesa mu bukalu.—Myaso 116:1-9.
Nga tukulahela ngwetu Njambi akazibi malombelo etu, co tutwalelelaho kulombela. Tusimutwiyeni hali Pedro uje wakala ku Spain. Munendi wa myaka 19 watsile mu monde ya ha tapalo. Pedro walekele Njambi mwakele na kulizibila, co walombelele lwalwingi mangana Njambi amuzembeleke na kumutakamesa. Bika byalingiwile? Pedro ngwendi: “Yehova wapangesele bakwetu baka-Kilistu baje batukwasele na kutuzembeleka na munakazi wange.”
Kakangi Njambi akapangesa babusamba betu mu kukumbulula malombelo etu
Nameme munabo kasangukile, oloni kulombela kwakwasele manene Pedro na naanga yendi. Munakazi wendi María Carmen wendekele ngwendi: “Kulombela kwanjikwasele munjakele na kuziba busiwa. Njazibukile ngwange Yehova Njambi wazibisisile munjakele na kulizibila mwafwa munjakele na kulombela njazibile bene na ku mbunge hehu.”
Byuma biyendeka Mbimbiliya na byuma bibanaliwana nabyo banu babangi, bimwesa ngwabyo Njambi akatolilila ku malombelo. Oloni kesi kukumbulula malombelo oshe. Bika bikalingisa Njambi ajeneke kukumbulula malombelo amo?
^ par. 5 Yehova likelyo lizina lya Njambi.—Myaso 83:18, NWT.
