Mwafwa Bika Bizindo Kubyesi na Kuhwa?
Mwafwa bika bizindo bili na kutwalelelaho kulibwezelela muno mu kaye? Tunapande tahi kuzibuka bikulumbununa kuzinda banu nebi bikalingisa banu bashangumuke kulizinda. Co lalo, tunapande kuzibuka byuma binalingisa bizindo bilisale manene mu kaye, asina tuwane cikumbululo.
Kuzinda Munu Kulumbununa Bika?
Kuzinda kulumbununa kujeneka kushaka munu nambe kuyandesa cibunga cimo ca banu. Kunaliseze na kulubalela lika munu ha simbu yaindondo, kukekwo kukatwalelelaho ha simbu yailaha.
BYUMA BIKALINGISA BANU BASHANGUMUKE KULIZINDA
Kuli byuma byabingi bikalingisa banu bashangumuke kulizinda. Kakangi, banu bakazindi bakwabo mwafwa ya cifwa cabo, keti mwafwa ya byuma bibakalingi. Banasa kubazinda mwafwa ya kubamona ngwabo bapwa banu bababi, bikenya, co kubasa kutenguluka. Banasa kubamona ngwabo bapwa ba ngoco, co banena lika bukalu na bushonde. Baje bakazindi bakwabo hamo simbu imo babayandesele, babamwesele kaangu nambe hamo kuli byuma byeka byabalingisa bakale na cizindo mu mbunge yabo.
BYUMA BINALINGISA BIZINDO BILISALE MANENE
Munu nasa kuzinda banu baje kanda amoneho. Cakumwenako, munu nasa kuzinda banu mwafwa baka-naanga yendi nambe babusamba bendi nabo bazinda obo banu. Ngeci, banu bomwo mu citingitingi nambe bomwo mu naanga banasa kuzinda oco cibunga ca banu mwafwa ya kukala na biyongola bya kulifwa.
Kuzibuka binalingisa banu babangi balizinde kunatukwasa tumone binalingisa bizindo bilisale manene mu kaye. Oloni kuli byuma bikwabo binalingisa bizindo bitwaleleleho kutuma muno mu kaye. Ngeci, tunapande kuzibuka kwashangumukilile bizindo mangana tuzibisise mwamubwa ei ñanda. Mbimbiliya ikeyo itukwasa kuzibuka kubyashangumukilile.
MBIMBILIYA IMWESA KWASHANGUMUKILILE BIZINDO
BANU KETI BAKEBO BASHANGUMUKILE BIZINDO. Bizindo byashangumukile omwo kangelo umo mwilu watengulukilile Njambi na kupwa Satana Liyabolo. Liyabolo “wapwile muka-kutsiya” mwatengulukilile Njambi. Natwalelelaho kukundwiya bizindo na matoto mwafwa wapwa “muka-makuli, co ikeye ishe ya makuli.” (Yowano 8:44; 1 Yowano 3:11, 12) Mbimbiliya yamwesa ngwayo wapwa muka-makuli, muka-kulubala na muka-kutenuka.—Yombi 2:7; Kujombolola 12:9, 12, 17.
BANU BA KUJENEKA KULUMBUNUKA BANASA KUZINDA BAKWABO. Munu wa kulibanga Adama watembwininine bubi bwalingile Satana. Mukemwo banu boshe banapu baka-bubi, co kubalumbunukile. (Loma 5:12) Kaini muna Adama wa ntwatwa wazindile shongo yendi, co wamutsiile. (1 Yowano 3:12) Nameme ngoco, banu babangi anga bakamwesa bakwabo cizemo na ngozi. Oloni mwafwa ya bubi butwasemuka nabwo, banu babangi bapwa baka-kulishaka bakebo babenya, baka-nuna na baka-cipululu. Co ebi bifwa bikalingisa banu balizinde.—2 Timateo 3:1-5.
NGA MUNU KASHAKELE BANU BEKA CO ABAZINDA. Bilinga na futisi yaibi ya banu bikebyo binalingisa mu kaye mulisale manene bizindo. Kuliseza mu byuma bimo, kaangu, endekesi ya kushaula, kuyandesa banu na kubiisa byuma bya banu, binalisala mwafwa kaye ‘koshe kali mu nzili ya Liyabolo.’—1 Yowano 5:19.
Mbimbiliya kuimwesa lika kwatunda bizindo. Oloni imwesa lalo mubakabimanesela.
