Nameme Mbimbiliya kuyapwile libulu lya biñanda bije bimwesa mwakusakela mishongo, binangulo bilimo byasa kutukwasa. Tusimutwiyeni ha byakumwenako bimo.

“Bakangule kubesi kutonda muka-kusaka, oloni baje babinja bakebo bakamutondo.”—MATEU 9:12.

Mbimbiliya imwesa ngwayo tunasa kutonda bukwasi bwa baka-kusaka. Banu babangi baje banabinji mushongo umo wa ku bwongo banawana bukwasi ha kuwana biñanda bije byendeka ha mushongo wabo hamolika na bukwasi bwa bandotolo.

“Bweho bwa kukanyamesa mubila bukwasa.”—1 TIMOTHI 4:8.

Kulingako byuma bimo bije bikanyamesa mubila kwasa kumikwasa mulizibeko bwino nga muli na kubinja mushongo umo wa ku bwongo. Mwasa kukala na cinoneko ca kwehako bweho bukanyamesa mubila, kulyako byakulya bije bikwasa mubila upwe wa kulikangula na kukala na simbu ya kupwamo ya kulala.

“Mbunge ya kubwahelela ikangwisa mubila, oloni mbunge ya kulinyenga simbu yoshe iyondwesa mubila.”—VISIMO 17:22.

Kutanda mizimbu itakamesa ije ili mu Mbimbiliya na kulyakela bilengo bimwasa kushulisilila  kumikwasa mupwe ba kubwahelela. Kumona byuma mu ngila yaibwa na kukulahela ngweni byuma bikakala mwamubwa kulutwe kumikwasa mukolese nameme muli na kulifwita na mushongo wa ku bwongo.

“Baka-kulikehesa bakakala na mana.”—VISIMO 11:2.

Munasa kunanguka ngweni byuma bimo kumwasa kubilinga mu nzili yeni. Ngeci, mulinga mwamubwa nga mutambula bukwasi bwa bakweni. Babusamba beni na baka-naanga yeni banasa kushaka kumikwasa. Oloni hamo kubazibuka mwamubwa bibasa kulinga. Balekeni bukwasi bumutonda. Keti musinganyeke ngweni bamilingila byuma byoshe bimutonda. Jaukeni na bukwasi bubamyana na kukandelela.

Nicole a uje wabinja mushongo umo wa ku bwongo ngwendi: “Njakele na kuliziba ngwange kunjalikangwile mwamubwa. Ngeci, njayongwele kulimona na ndotolo. Owo ndotolo wawanene mushongo unjakele na kubinja. Oku kwanjikwasele njizibisise mubyafwililile byuma na kuzibuka sakesi iliko na kumona byuma binjasa kulinga mangana njinyungilile bukangule bwange.”

Peter uje wabinja mushongo wa kwombwa ngwendi: “Kutandela hamo Mbimbiliya na muka-limbo lyange ha litangwa na litangwa kukanjikwasa njikale na bisinganyeka byabibwa. Co kakangi ha matangwa anjikalizibi manene kuzeya, njikawanako cisoneka cije cikanjitakamesa.”

Ji-yoo uje ali na kulifwita na mushongo wa kujeneka kulya bwino ngwendi: “Kwanjikaluwilile kuleka bakwetu bubezi bwange mwafwa njakele na kuziba shwamwa. Oloni kwakele kabusamba kange umo wazibisisile munjakele na kulizibila, co wanjizembelekele. Wanjikwasele njilizibeko bwino na kuliziba ngwange kunjesi likalyange.”

Timothy uje ali na kulifwita na mushongo wa obsessive-compulsive disorder ngwendi: “Mbimbiliya yanjikwasa njimone byuma mu ngila yaibwa na kukala na simbu ya kupanga na kuhwima. Binangulo bilimo binanjikwasa mu bishoti binjinaliwana nabyo.”