Tunasa kuzeya nga kabusamba ketu ali na kubinja mushongo wa ku bwongo. Oloni twasa kumwesa ngwetu twamwaka mbunge nga tumukwasa. Mu ngila muka?

“Munu woshe azambule kutolilila.”—JEMUSI 1:19.

Ngila imo yaibwa imwasa kukwaselamo kabusamba keni inapu kumutolilila nga ashaka kwendeka. Keti mulizibe ngweni munapande kukumbulula ku byoshe byendeka. Mweseni ngweni muli na kumutolilila, co mwamwaka mbunge. Zibisiseni mwamubwa mwali na kulizibila, co keti muzambwile kumupaya. Anukeni ngweni nasa kwendeka byuma bije kayongwele kwendeka, co munima nasa kulipaya.—Yombi 6:2, 3.

“Zembelekeni baje banombwa.”—1 TESALONIKA 5:14.

Hamo kabusamba keni ali na kulifwita na bishoti nambe hamo ali na kuliziba ngwe kapwile wa seho. Nga mumwesa ngweni mwamwaka mbunge, co mumuzembeleka na kumutakamesa nameme kumuzibuka bwino bimwasa kwendeka.

“Babusamba bamwesa cizemo cabo simbu yoshe.”—VISIMO 17:17.

Lingeniko byuma bije bibakwasa. Kutubakana kuliziba ngweni muzibuka bukwasi bwatonda kabusamba keni, mwihuleni amileke bimwasa kulinga. Nga kuli na kumukaluwila kumileka byatonda, mwasa kumulekako byuma bimo bimwasa kulinga  bya kufwa ngwe kuya na kupashala hamo nendi. Indi hamo munasa kumukwasa kulandako byuma bimo, kujelesa nambe kulingako byuma byeka.—Galatiya 6:2.

“Kaleni na mbunge ya kubandamena.”—1 TESALONIKA 5:14.

Simbu imo kabusamba keni nasa kwonowa kwendeka mwali na kulizibila. Mulekeni ngweni simbu yoshe nga atonda kumilekako byuma bimo, ashubuluke kulinga ngoco. Simbu imo mushongo wali na kubinja kabusamba keni unasa kumulingisa alinge, nambe kwendeka byuma bije binasa kumilubalesa. Nasa kutengulula byuma bimunayongwele kulingila hamo nambe kumilubalela. Kwateni mbunge na kumuzibisisa omwo mulinga byuma bimo mu kushaka kumukwasa.—Visimo 18:24.

Farrah a uje ali na kabusamba uje naliwana na bukalu bwa kujeneka kulya bwino hamolika na bishoti na kwombwa ngwendi: “Njikeseka munjasela mwoshe mangana njipwe kabusamba uje yasa kusimutwiya nendi simbu yoshe-yoshe. Nameme nga kunjesi na ngila ya kumaneselamo bukalu bwanaliwana nabwo, njikeseka mwoshe munjikasela kumutolilila mwamubwa. Simbu imo akatondo lika kumutolilila, co alizibako bwino.”

Ha-eun uje ali na kulifwita na mushongo wa kwombwa ngwendi: “Kabusamba kange umo wakala manene na ngozi, co akanjitakamesa. Wanjilanyele ku njibo yendi mangana tukalile hamo byakulya. Wanjimwesele cizemo. Co oku kwanjilingisile njishubuluke kumuleka munjakele na kulizibila. Oku kwanjitakamesele manene!”

Jacob uje ali na muka-limbo lyendi uje ali na kulifwita na mushongo wa kwombwa ngwendi: “Kukwata mbunge kwapwa kwa seho manene. Mwebwange mwakalingi byuma bije bikanjilubalesa, njikanuka ngwange mushongo wali na kubinja ukewo unamulingisa ngoco. Kulinga ngoco kukanjilingisa njijeneke kulubala, co njikamumwesa ngwange njamwaka mbunge.”

Enrico uje ali na kulifwita na bishoti ngwendi: “Mwebwange nanjikwasa manene na kunjitakamesa. Munjikakala na bishoti, kesi kunjisindiya kulinga byuma bije kunjishaka kulinga. Co simbu imo kesi kulinga byuma byanashakele kulinga. Njamuzema manene mwafwa wakala na mbunge ya kwana, co lalo waka bakwabo mbunge.”