Tunapande Kwangununa Byabibwa ku Byabibi
Byuma bitwangula kulinga bikundama manene kuyoya kwetu. Yehova azibuka ngoco. Mukemwo ashaka ngwendi tukabangeye binangulo byendi.
Yehova ashaka ngwendi tupwe ba kubwahelela na kukala mu kwoloka.
‘Yange Yehova Njambi yeni, Uje ali na kumilongesa mangana muwane bukwasi, Uje ali na kumitwamenena mu ngila mumunapande kwenda. Ngwe mwatolililile ku mashiko ange, ngwe kwoloka kweni kwapwile ngwe muna ndonga na kusungama kweni ngwe kwapwile ngwe mankimba a mema a kalunga ndonga.’—Isaya 48:17, 18.
Ishamatanga yetu azibuka byuma bitukwasa kuyoya mwamubwa. Ali na kutulanya kupangesa binangulo byendi, mwafwa azibuka ngwendi bitukwasa. Nga tupangesa binangulo byendi omwo twangula byakulinga, byuma bitwendela bwino. Yehova atukwasa kwangula byuma byabibwa simbu yoshe, byuma bije bitukwasa kupwa ba kubwahelela na kukala mu kwoloka.
Yehova kesi kutuleka kulinga byuma kutwasa.
‘Lishiko njili na kumyana ku litangwa lya lelo kulyapwile lyalikalu manene nambe kutubakana nzili yeni embwe.’—Kwituluka mu Mashiko 30:11.
Nga tushaka ngwetu mashiko a Njambi atukwase tunapande kutengulula bisinganyeka byetu nomu mutukalingilamo byuma. Oloni Yehova kesi na kutulomba kulinga byuma kutwasa. Co ha kupwa Ishamatanga, Yehova azibuka hayalenga nzili yetu. Omwo tushwenya manene kuyehi nendi tunanguka ngwetu: “mashiko endi kuwapwile a kulema.”—1 Iwano 5:3.
Yehova nakulahesa kukwasa baje balyangwila kukabangeya binangulo byendi.
‘Yange Yehova Njambi yeni, njinakwata ku liboko lyeni lya cilyo, Uje ali na kumileka ngwendi, ‘Kesi muzibe lyoba. Njikamikwasa.’’—Isaya 41:13.
Twasa kuyoya ngwe mwatondela Njambi, mwafwa atukwasa. Asa kutukwasa kwitila mu Lijwi lyendi Mbimbiliya, ije itukwasa kukala na lilabelelo na kututakamesa.
Banu babangi mu kaye koshe banawana ngwabo kukabangeya binangulo bya mu Mbimbiliya kwabakwasa manene mu kuyoya kwabo. Nga mulyangwila kulilongesa Mbimbiliya muwanamo binangulo bije bimikwasa manene. Mwasa kulinga ngoco kupangesa broshuwa ije ili na binangulo bije binemana ha Mbimbiliya ya mutwe wa Likuweni Kuyoya Myaka Yoshe! mwasa kulyambatelayo ha jw.org/mck kwa kujeneka kufweta. Omu mu broshuwa muli ebi bilongesa bitatu:
-
Mbimbiliya Imikwasa Bati?
-
Mbimbiliya Imikwasa Mulabelele Byuma Bija Kulutwe
-
Kuma Mwasa Kukulahela Mbimbiliya Ndi?
Omwo mulilongesa Mbimbiliya Lijwi lya Njambi, mulimwena ngweni anga licipanga na simbu ino. Binangulo bilimo ‘twasa kubikulahela simbu yoshe, ha simbu ino na ku myaka yoshe.’ (Bisamu 111:8) Kukabangeya binangulo bili mu Mbimbiliya inapu ngila yaibwa yakuyoyelamo. Oloni Njambi katusindiya kumupangela. (Kwituluka mu Mashiko 30:19, 20; Yoshwa 24:15) Yetu tunapande kulyangwila kumupangela.
