KUMA VIMWANGULA KULINGA VYATHA KUKUNDAMA VUYOYE VWENI VWA KULUTWE NDI? Vanu vamo vakulahela ngwavo vyoshe vilingiwa mu kuyoya kwavo Njambi navinonekela chimweja, cho vakevo vyahi vivatha kulinga. Nga vanonowa kushulithilila vilengo vyavo. Vakendeka ngwavo: “Evi vyuma Njambi kanjivwahethelelevyo.”

Vamo vakathzeye muvakamono tuyando tuli muno mu kaye kakavi, cho vakathinganyeka ngwavo vyuma kuvyatha kupwa vyavivwa. Hamo vakalifwiti mangana vakale na vyuma vyavingi mu kuyoya kwavo, oloni vindthzita na vukenya na mandunduma na mishongo vikatanganetha viyongola vyavo. Ngechi vakendeka ngwavo: ‘Nevi vitufwitanganena vene vyahi.’

Luvinda lwatha kutanganetha viyongola vyeni. (Muka-kwambulula 9:11) Oloni nga mushaka kukayoya myaka yoshe, yeni vavenya mulyangwila. Mukemwo na Mbimbiliya imwetha ngwayo vuyoye vweni vwa kulutwe vunemana ha vyuma vimwangula kulinga. Tuchithimutwiyeni viyendeka Mbimbiliya.

Vaisalele muvetele kuyehi na Lifuti lya Chikulahetho, Njambi washikile Mosesa uje wapwile ntwama yavo avaleke ngwendi: “Njili na kumyana kulyangwila hakati ka mwonyo na kuthsa, hakati ka vivethzikitho vya Njambi na vithingo, . . . ngechi vene, anguleni mwonyo ngechi mukayoye, yeni na vatekulwila veni, na kuthzema Shukulu Kalunga Njambi yeni na kwononoka lijwi lyendi na kukakateya kuli ikeye.”—Kwituluka mu Mashiko 30:15, 19, 20.

“Njili na kumyana kulyangwila hakati ka mwonyo na kuthsa, hakati ka vivethzikitho vya Njambi na vithingo, ngechi vene, anguleni mwonyo.”​—Kwituluka mu Mashiko 30:19

Njambi wapatwile Vaisalele mu vundungo mu Ingito na kuvakulahetha ngwendi vakayoya mu kuvwahelela mu Lifuti lya Chikulahetho. Oloni kuli vyuma vivanapandele kulinga mangana vakalikuwe ovyo vivethzikitho. Vapandele ‘kwangula mwonyo.’ Mu ngila muka? Vapandele ‘kuthzema Njambi na kwononoka lijwi lyendi na kukakateya kuli ikeye.’

Neni munapande kulyangwila, cho vyuma vimwangula kulinga vikundama vuyoye vweni vwa kulutwe. Nga mulyangwila kuthzema Njambi na kwononoka lijwi lyendi na kukakateya kuli ikeye, cho mukayoya myaka yoshe mu palandaisi hano hathi. Vika vyalivungila mu kulinga evi vyuma vitatu?

Chithzemo chikecho chifwa cha Njambi cha theho manene. Muvamuhwimininine, kapositolo Yowano wathonekele ngwendi: “Njambi wapwa chithzemo.” (1 Yowano 4:8) Muvamwihwile ngwavo Lishiko muka lyapwa lyakama manene, Yesu wakumbulwile ngwendi: “Thzema Shukulu Kalunga Njambi yove na mbunge yove yoshe na mwonyo wove woshe na mana ove oshe.” (Mateo 22:37) Kutwapandele kupangela Yehova mwafwa ya kumuthzivila lyova, oloni tunapande kumupangela mwafwa ya kumuthzema. Vika twangwila kuthzema Njambi?

Chithzemo cha Yehova ku vanu, chapwa ngwe cha vithemi vaje vathzema manene vana vavo. Nameme kuvalumbunukile, vithemi va chithzemo vakalongetha na kushongangeya na kukwatha na kunangula vana vavo, mwafwa vashaka ngwavo vana vavo vapwe va kuvwahelela na kuvethzika. Cho vika vivakatondo vithemi ku vana vavo? Vatonda ngwavo va vathzeme na kupangetha vyuma vyavivwa vivanavalongetha. Vikevyo vyatonda Tate yetu wa mwilu  ngwendi tumuthzeme na kukandelela ku vyoshe vya natulingila.

Kutwatha kuthziva lijwi lya Njambi mpundu, oloni tulithziva nga tutanda na kupangetha vili mu Lijwi lyendi, Mbimbiliya.—1 Yowano 5:3.

Yesu wamwethele theho ya kwononoka lijwi lya Njambi, mwendekele ngwendi: “Munu katha kuyoya na makende lika embwe, oloni kuvanga na majwi oshe a Njambi.” (Mateo 4:4) Ngwe vyakulya muvyapwila vya theho kuli yetu, mukemwo mukunapu na kulilongetha vya Njambi, oloni kukekwo kwapwa kwa theho manene kutuvakana vyakulya. Vika kwapwila kwa theho? Mwene Solomoni wa mana manene ngwendi: “Mana akwatha vanu, cho vimbongo lalo vivakwatha, oloni mana anatuvakana vimbongo omwo mana anyunga mwonyo wa uje alinawo.” (Muka-kwambulula 7:12) Mana a kutunda kuli Njambi atha kutunyungilila ano matangwa, cho atukwatha kwangula vyavivwa vije vikatuwanetha kuyoya kwa myaka yoshe kulutwe.

Anukeni chithimo cha Yesu chije chitunathimutwiyiye mu ñanda inahu. Wendekele ngwendi: “Omwo chikolo chachindondo na ngila yakulishwata viya ku mwonyo, cho vaje vaiwana vanapu vavandondo.” (Mateo 7:13, 14) Nga mwenda omu mu ngila, muvethzika na kushwenya kuli muka-kutwamena wamuvwa manene, cho mukawana kuyoya kwa myaka yoshe. Ngechi, tunapande kushwenya kuyehi na Njambi. (Myatho 16:8) Twatha kushwenya vati kuyehi nendi?

Litangwa na litangwa tukapanga vipangi vyavingi, cho kuli vyeka lalo vitukatondo kupanga. Evi vipangi vyatha kutwonowetha kuwana thimbu ya kuthinganyeka ha vyuma vyana tulingila Njambi. Ngechi Mbimbiliya yatunangula ngwayo: “Ngechi vene, nyanyameni mu muli na kuyoya. Kethi muyoye ngwe vaka-kwonwa mana, oloni ngwe vaka-mana. Pangetheni mwamuvwa vithimbu vije mulinavyo, omwo matangwa anapu amavi.” (Efeso 5:15, 16). Nga tumona vuthamba vwetu na Njambi kupwa vwa theho manene mu kuyoya kwetu, cho tushwenya kuyehi nendi.—Mateo 6:33.

Nameme kumwatha kutengulula vyuma vyalingiwile mu vuyoye vweni, oloni mwatha kwangula vyuma vije vikamikwatha na nanga yeni kulutwe. Mbimbiliya yamwetha ngwayo, Tate yetu, wa mwilu Yehova Njambi, watuthzema manene, cho natuleke vyuma vyatonda ngwendi tulinge. Nangukeni vyendekele kapolofweto Mika:

Wendekele ngwendi: “Shukulu Kalunga natuleke vije vyavivwa vyashaka kuli yeni vikevyo evi, kulinga vije vya vuthunga na kumwetha chithzemo chije kuchethi kutenguluka na kuyoya mu kulitombola na kulikehetha kuli Njambi yetu.”—Mika 6:8.

Neni mutambula chilanyo cha Yehova cha kwenda nendi, mangana mukawane vivethzikitho vije vyanatulikila vaje valinga ngocho ndi? Yeni vavenya munapande kulyangwila.