ECHI CHINAPU CHIKULAHETHO CHACHIVWA MANENE. Ishamatanga yetu natukulahetha kuyoya myaka yoshe hano hathi. Oloni vanu vavangi kuvethi kukulahela awa majwi. Vakendeka ngwavo: ‘Munu woshe akathsa, mwafwa mukemwo muvatangelele vanu.’ Vamo vakendeka ngwavo vanu vatha kuyoya myaka yoshe, oloni kethi hano hathi. Vakendeka ngwavo vanu vatha kuyoya myaka yoshe nga vathsa na kuya mwilu. Yeni muthinganyeka vati?

Thimbu kanda mukumbulule echi chihula, waneni muinakumbulwila Mbimbiliya evi vihula vitatu: Chifwa cha munu chimwetha vati ngwavo Njambi wayongwele ngwendi munu ayoye myaka yoshe? Viyongola muka vyakele navyo Njambi ha kutanga kaye na vanu? Kuthsa kwethzile vati ku vanu?

Ku vyuma vyoshe vyanatanga Njambi hano hathi, vanu vapwa va kukathametha. Mu ngila muka? Mbimbiliya ngwayo vanu vakevo lika vatangele Njambi mu ‘kulifwa nendi’ na mu ‘chifwa chendi.’ (Kushangumuka 1:26, 27) Echi chilumbununa vika? Chilumbununa ngwavo vanu vakala na vifwa vije vyakala navyo Njambi vya kufwa ngwe chithzemo na kuthompa mu vuthunga.

Kutundoho, vanu vakala na ndthzili na chashu cha kuthinganyeka na kulinga vyuma vyavivwa vije vivakwatha kulikuta vuthamba na Njambi. Mukemwo tukakathama manene ha kumona vyuma vyanatanga Njambi vya mwilu na hathi na chashu chivakala nacho vanu cha kuthona na kwimba. Chuma cha theho manene chivakala nacho vanu, chapwa chashu cha kulemetha Ishamatanga. Kukala nevi vifwa kukekwo kunalingitha vanu valithethze manene na vyuma vyoshe vya kutanga vili hano hathi.

Cho lihuleni ngweni, kuma Njambi atha kutanga vanu mu ngila ya kukathametha manene na kuvana kuyoya kwa myaka yaindondo lika ndi? Njambi watangele vanu na vifwa vya kukomoketha mangana valikuwe kuyoya myaka yoshe hano hathi.

Vamo vakendeka ngwavo Njambi katangele vanu vayoye myaka yoshe hano hathi. Vakendeka ngwavo hathi hanapu ha kuyoya lika mu kathimbu kakandondo, mangana Njambi amone veya vaje vatha kukayoya nendi mwilu myaka yoshe. Nga ovu vunapu vuthunga, cho oho kutulumbununa ngwetu vuvi vwoshe vuli na kulingiwa hano hathi Njambi ikeye  ali na kuvunena ndi? Oloni kwendeka ngocho kunalithethze manene na chifwa cha Njambi. Mwafwa Mbimbiliya yatumbula Njambi ngwayo: ‘Vingila vyendi vyoshe vyapwa vya kuthungama, Wapwa Njambi wa kulongwa na vuthunga.’—Kwituluka mu Mashiko 32:4.

Mbimbiliya yamwetha viyongola vya Njambi ha kaye ngwayo: “Lilu lya melu lyapwa lya Shukulu Kalunga, oloni kaye wakanene ku vanu.” (Myatho 115:16) Mukemwo Njambi watangele kaye kapwe limbo lyalivwa lya vanu mangana valikuwe kuyoyamo myaka yoshe.—Kushangumuka 2:8, 9.

“Lilu lya melu lyapwa lya Shukulu Kalunga, oloni kaye wakanene ku vanu.”​—Myatho 115:16

Mbimbiliya yamwetha mwamuvwa viyongola vya Njambi ku vanu. Washikile munalume na munakathzi va kulivanga ngwendi: ‘Kiteni, ngechi vatekulwila veni vakatume hano hathi hoshe, cho mukakala na moko . . . ha vyuma vyoshe vya kuyoya.’ (Kushangumuka 1:28) Ngechi, lilavelelo livakele nalyo va Andama na Eva na vana vavo lyapwile lya kuyoya myaka yoshe hano hathi kethi mwilu embwe.

Vika vivakathsila vanu? Mbimbiliya yamwetha ngwayo munu umo wa ku sipilitu uje watengulukilile Njambi na kupwa Satana Liyavolo, ikeye watanganethele viyongola vya Njambi mu Endeni. Walingile vati?

Satana wongumwine vithemi vetu va kulivanga va Andama na Eva mangana valikwatathane nendi mu kutengulukila Njambi. Satana wendekele ngwendi Njambi navashwekela vyuma vyavivwa, walumbunwine ngwendi Njambi navomina ndthzili ya kulyangwila vyavivwa nevi vyavivi. Ngechi, valyangwilile kulikwatathana nendi mu kutengulukila Njambi. Vika vyatundilemo? Mu kwita kwa thimbu, vathsile ngwe muje mwavalekelelemo Njambi. Lilavelelo livakele nalyo lya kuyoya myaka yoshe mu Palandaisi hano hathi lyanyongele.—Kushangumuka 2:17; 3:1-6; 5:5.

Kutengulukila kwa Andama na Eva kunanene vukalu vuje vunakweta na lelo lino. Lijwi lya Njambi ngwalyo: “Vuvi vwethzile hano ha kaye hali munu umo lika [Andama], cho vuvi vwendi vunanene kuthsa. Cho kuthsa kunete ku miyati yoshe ya vanu.” (Loma 5:12) Tukathsi mwafwa twatambula vuvi ku vithemi vetu va kulivanga. Kethi ngwe muvakendekela vamo ngwavo mukemwo ‘mwayongwelele’ Njambi embwe.

Kutengulukila kwa mu Endeni kukwonowethele viyongola vyakele navyo Njambi ha kaye na vanu. Chithzemo cha Njambi cha kulumbunuka na kuthompa mu vuthunga vyamulingithile awane ngila ya kutupatwilamo ku vundungo vwa vuvi na kuthsa. Kapositolo Paulu wendekele ngwendi: “Omwo fweto ya vuvi inapu kuthsa, oloni vwana vwa Njambi vunapu mwonyo wa myaka yoshe muli Kilisitu Yesu Mwene yetu.” (Loma 6:23) Njambi wa chithzemo “wanene Munendi umo lika [Yesu Kilisitu], ngechi woshe akulahela kuli ikeye, kethi anyonge, oloni akale na mwonyo wa myaka yoshe.” (Yowano 3:16) Yesu walyanene ikeye vavenya kupwa ndando ya kupatula vana voshe va Andama. *

Chikulahetho cha Njambi cha kutengulula kaye kupwa palandaisi ololo chilishulithilila. Mukalimwena evi vikulahetho vyavivwa nga mwononoka Yesu uje watunangwile ngwendi: “Koveleni mu chikolo chachindondo, omwo chikolo chakama na ngila ya kujanjavala viya ku kunyongetha, cho vavangi vali na kuyamo. Omwo chikolo chachindondo na ngila ya kulishwata viya ku mwonyo, cho vaje vaiwana vanapu vavandondo.” (Mateo 7:13, 14) Vuyoye vweni vwa kulutwe vunemana ha vyuma vimwangula kulinga. Mulyangwila kulinga vika?