Kuyoya Kwapwa kwa Seho Manene
BILONGESA BINAHU binendeka ha bukalu bwa kuliseza-seza buje bwasa kukaluwisa manene buyoye. Nga muli na kulifwita na bukalu bwakama mwasa kumona ngwe kuyoya kukwapwile kwa seho, co na umo wahi wamyaka mbunge. Oloni anukeni ngweni Njambi ali na kumona bukalu bweni mwafwa mu ba seho manene kuli ikeye.
Muka-kusoneka mukanda wa Myaso 86 wamwesele likulahelo lyendi kuli Njambi omwo wasonekele ngwendi: “Omwo njili mu bukalu njilombela kuli yobe, omwo yobe ukanjikumbulula.” (Myaso 86:7) Oloni munasa kwihula ngweni: ‘Njambi asa kunjikumbulula bati nga njili “mu bukalu”?’
Nameme Njambi kasa kumanesa bukalu bweni oho bene, oloni mu Lijwi lyendi Mbimbiliya natukulahesa ngwendi atwana kwoloka kuje kutukwasa tulikolese. Mbimbiliya ngwayo: “Kesi mushote mbunge ha cuma cimo, oloni mu malombelo eni oshe lombeni Njambi ha bije munajeneka, simbu yoshe mulombeni na mbunge ya kukandelela. Co kwoloka kwa Njambi, kuje munu naumo wahi asa kuzibisisa, kukanyunga bimbunge byeni na biyongola byeni.” (Filipu 4:6, 7) Tumoneni mwatukwasela mavesi anatako kumona ngwetu Njambi watwakwa mbunge.
Njambi Wamyaka Mbunge
“[Kanzilili] naumo wahi ibanebala kuli Njambi. . . Omwo seho yeni inatubakana seho ya tunzilili babangi.”—Luka 12:6, 7.
ACISINGANYEKENI HA ÑANDA EYI: Tunzilili bakamoneka ngwe kubesi na seho ku mesho a banu, oloni kuli Njambi bapwa ba seho. Njambi waka mbunge kanzilili na kanzilili. Oloni banu bapwa ba seho manene kuli Njambi kutubakana tunzilili. Banu bapwa ba kulitila ku byuma byoshe bili hano hasi byanatanga Njambi mwafwa wabatangele mu “cifwa” cendi, co basa kutembwinina bifwa byendi byabibwa.—Kushangumuka 1:26, 27.
“Unanjilula yobe Shukulu Kalunga, co unanjizibuka. . . . Uzibuka biyongola byange byoshe . . . Njilule . . . ngeci uwane biyongola byange.”—Myaso 139:1, 2, 23.
ACISINGANYEKENI HA ÑANDA EYI: Njambi azibuka mwamubwa munu na munu. Azibuka mumukalizibila na bishoti byeni. Nameme bakweni kubananguka ngwabo muli mu bukalu, oloni Njambi ananguka mwafwa wamyaka mbunge, co ashaka kumikwasa. Kuzibuka eyi ñanda kumilingisa mumone kuyoya kupwa kwa seho.
Njambi Amikwasa na Kumitwamenena
‘Njitolilile omwo njilombela yobe Shukulu Kalunga, mutambi wange wete kuli yobe ngeci unjikwase. . . . unapande kunjitolilila, na kunjikumbulula bwasi. . . . Akatolilila na kukumbulula malombelo a banu baje bali na kuyanda.’—Myaso 102:1, 2, 17.
ACISINGANYEKENI HA ÑANDA EYI: Kushwa lika hatwashangumukilile tuyando Yehova namono kulila kwa banu baje bali na kulifwita na tuyando. (Myaso 56:8) Oku kunambateselela na kulila kweni. Njambi akamono tuyando na misozi yeni mwafwa mu ba seho manene kuli ikeye.
‘Kesi mujaje, yange Njambi yeni. Njikamitakamesa na kumikwasa . . . Yange kalunga Njambi yeni, . . . njili na kumileka ngwange, Kesi muzibe lyoba njikamikwasa.’—Isaya 41:10, 13.
ACISINGANYEKENI HA ÑANDA EYI: Njambi nalibwahesela kumikwasa. Nga mukobela mu bukalu amikwasa.
Tuli na Lilabelelo lya Kukayoya Mwamubwa Kulutwe
“Njambi wazemene baka-kaye manene ngechi wanene Munendi umolika, ngechi woshe akulahela kuli ikeye kesi anyonge, oloni akale na mwonyo wa myaka yoshe.”—Yowano 3:16.
ACISINGANYEKENI HA ÑANDA EYI: Njambi wanene Munendi, Yesu, kupwa ñombelo ya kumipatula, mwafwa muba seho manene kuli ikeye. Eyi ñombelo yatukwasa tukale na lilabelelo lya kukayoya mu kubwahelela myaka yoshe kulutwe. *
Nameme simbu imo mwasa kukala na bishoti na kumona ngwe byuma byakaluwa manene mu kuyoya, tandeni Lijwi lya Njambi mangana mukulahele manene byuma byoshe byanatukulahesa. Oku kumikwasa mupwe ba kubwahelela na kumona kuyoya kupwa seho.
^ par. 19 Nga mushaka kulilongesa byabingi ha bibezikiso bitukawana mwafwa ya ñombelo ya Yesu, kengeni vidio ya Anukeni Kuthsa kwa Yesu ha www.pr418.com/mck ha mutamba wa MIKANDA> MAVINDIYO > OUR MEETINGS AND MINISTRY.
Hamo Mushaka Lalo Ebi
BYETU BAKALEHO BA YEHOVA
Bika Bimunapande Kulilongesela Mbimbiliya?
Mbimbiliya ili na kukumbulula bihula bibakalihula banu babangi kuzenguluka kaye koshe. Kuma neni mushaka kuwana muyasa kukumbulwila bihula bimuli nabyo ndi?
KAPOSHI KA KUKENGELA
Kuzibuka Ngweni Njambi Wamyaka Mbunge Kumikwasa Bati?
Bisoneka bitukwasa tukanyamese likulahelo lyetu ha byuma byabibwa bya kulutwe.
KAPOSHI KA KUKENGELA
Vwana Vwakama Vwanatwana Njambi Vika Vwapwila vwa Theho?
Vyuma muka vyatha kulingitha ngwavo vwana vumo vupwe vwa theho kutuvakana vukwavo? Kuthinganyeka ha vyuma ovyo kutulingitha tukandelele manene ku ndando ya kupatula.
