NGA neni munatsisa munu imwazema, mwasa kuliziba ngwe mwalizibililemo Vanessa. Mwasa kuliziba busiwa, buli, na kuzeya. Hamo mukalubala, kuliziba kukala na mulonga, na lyoba. Munasa kusinganyeka ngweni kuyoya kesi kwa seho.

Anukeni ngweni kuliziba busiwa kucabihile. Kulinga ngoco kumwesa mumwazemenenemo munu imunatsisa. Oloni kuli bimo byasa kumizembeleka nga muliziba manene busiwa.

Nameme kesi cacasi kwibala munu imunatsisa, oloni binangulo binatako byasa kumizembeleka

KUCABIHILE KULIZIBA BUSIWA

Banu bakalizibi busiwa mu bingila bya kulisezaseza, co bakambata simbu ya kulisezaseza. Kulila kwasa kutepulula ku busiwa nambe kubabala kumuli na kuziba ku mbunge. Vanessa itunabanga kusimutwiya byendi wendekele ngwendi: “Njalilile mangana kesi njilizibe manene kubabala ku mbunge.” Sofía uje watsisile shongo yendi mu kukasumuka, ngwendi: “Kusinganyekesesa ha byuma binalingiwile kwanjibabalesele manene ku mbunge. Kwapwile ngwe kulamuna ha mbandu na kukushaho. Kulinga ngoco kubabala manene, oloni kulingisa mbandu ihole.”

 LEKENIKO BAKWENI MUMULIZIBILA

Simbu imo mwasa kuliziba ngwe munapande kukala likalyeni. Oloni mwasa kuziba manene busiwa nga mulyangununa ku banu. Jared wa myaka 17 omwo watsisile baishe wendekele ngwendi: “Njalekeseleko bakwetu munjalizibilile. Nameme hamo binjendekele kubyazibikile mwamubwa, oloni njalingile bwino kubaleka munjalizibililemo.” Janice itunasimutwiyiye mu cilongesa ca kulibanga ngwendi: “Kuleka bakwetu bukalu bwange kwanjizembelekele manene. Njalizibile ngwange bakwetu banazibisisa bukalu bwange, na kunjikwasa.”

TAMBULENI BUKWASI

Ndotolo umo wendekele ngwendi: “Nga banu baje banatsisa batabesa babusamba nambe babushoko bwabo kubazembeleka mu simbu ya busiwa, co basa kulikolesa.” Lekeseni babusamba beni bukwasi bumutonda mwafwa kubasa kuzibuka bujene bweni.—Visimo 17:17.

SHWENYENI KUYEHI NA NJAMBI

Tina wendekele ngwendi: “Munalume wange injakele na kuleka bukalu bwange mwatsile mwafwa ya kubabala kansa, kunjasele kusimutwiya nendi lalo, ngeci njakele na kuleka Njambi byuma byoshe. Mutondo na mutondo njakele na kulomba Njambi anjikwase mu byuma binjilinga mu litangwa. Njambi wanjikwasele mu bingila byabingi manene. Tarsha uje watsisile baina te ali na myaka 22 wendekele ngwendi: “Kutanda Mbimbiliya ha litangwa na litangwa, kwanjizembelekele manene. Kwanjikwasele njake mbunge ku byuma byabibwa bije bitakamesa.”

SINGANYEKESESENI HA KUSANGUKA KWA BATSI

Tina wendekele lalo ngwendi: “Ha kulibanga, lilabelelo lya kusanguka kwa batsi kulyanjizembelekele mwafwa njatondele kukala na munalume wange, co bana bange nabo lalo batondele ishabo haje bene. Ha simbu ino mukuneti myaka iwana, njinaka manene mbunge ku lilabelelo lya kusanguka kwa batsi, co lili na kunjizembeleka na kunjitakamesa.”

Kakangi busiwa kubwesi kuhwa bwasi. Nameme ngoco, byuma byaliwanene nabyo Vanessa byasa kumizembeleka. Wendekele ngwendi: “Nameme muliziba ngwe busiwa bweni kubwesi na kuhwa bwasi, oloni mu kwita kwa simbu mulizibako mwamubwa.”

Nameme kesi cacasi kwibala munu imunatsisa, oloni mwasa kutwalelelaho kulikolesa. Njambi asa kumikwasa muwane babusamba bababwa na kulikuwa kuyoya. Njambi ololo asangula batsi. Atonda ngwendi mukabumbatele banu bamwazema lalo. Co kumukalizibi busiwa myaka yoshe.