Yesu wendekele ngwendi: “Lifuti limo likalwa nzita na lifuti likwabo, co bumwene bukalwisa bumwene bukwabo. Kukakala mandunduma akama, na njala ya lyangengela, na mishongo ya kulitambwisa kwoshe kwoshe.” (Luka 21:10, 11) Ebi byuma bili na kulingika ha simbu imo, bimwesa mwamubwa ngwabyo “Bumwene bwa Njambi buli muyehi.” Kuma ebi byuma bili na kulingika ha simbu imo mu kaye koshe ndi? Tucimoneni obu bukaleho.

1. BINZITA

Mu 1914 kwakatukile nzita yakama mu kaye ije te kanda icikaleko laja. Baka-biñanda bya kusañulu ngwabo byuma byatengulukile manene mwafwa hakeho hayashangumukilile nzita ya kaye ya kulibanga. Omu mu nzita, banu bashangumukile kupangesa manene minyau ya buta, bimbomba bya mwilu, mata a kutuhwisa bilyanga byabingi mu lumbisi, mpunzi ya bushungu na bitwa bikwabo byabibi. Kwakele lalo nzita ya kaye ya mu cibali, co banu bapangesele lalo bitwa bya nzili manene. Kushwa lika mu 1914, banu mu kaye banalu binzita mu mitambela ya kuliseza-seza. Banu babangi banatsi omu mu binzita.

2. MANDUNDUMA

Libulu lya Britannica Academic limwesa ngwalyo mwaka na mwaka, kukakala mandunduma a kweta ku 100 aje “akabiisa manene byuma.” Co lalo, baka-kutondesesa bya libu ba mu United States (United States Geological Survey) ngwabo: “(kushwa mu 1900), mizimbu imwesa ngwayo kwasa kukala mandunduma akama a kweta ku 16 mu mwaka woshe woshe.” Bamo banasa kwendeka ngwabo mandunduma amangi kuanakele, anakumoneka lika ngwe amangi ano matangwa mwafwa kuli bingila byabingi bya kuzibukilamo ngwabo kuwali. Nameme ngoco, ano matangwa mandunduma ali na kunenela banu tuyando na kutsiya banu babangi.

 3. KUKEHA KWA BYAKULYA

Kakangi, byakulya bikakeha mwafwa ya nzita, linyanyamena, kukeha kwa bimbongo, kujeneka kulima mwamubwa nambe kujeneka kukola mwamubwa kwa bimbuto. Muzimbu wa baka-kutala byakulya mu kaye (World Food Programme) wa mwaka wa 2018 ngwawo: “Mu kaye, banu ba kupwa 821 milyoni bali na kutsa njala. Co ba kupwa 124 milyoni bakebo bali na kutsa manene njala.” Mushongo wa njala uli na kutsiya banike ba kweta ku 3.1 milyoni mwaka na mwaka. Mu mwaka wa 2011, mushongo wa njala watsiile 45 pesenti ya banike batsile mu kaye koshe.

4. MISHONGO

Libulu limo lya baka-kutala bya bukangule mu kaye (World Health Organization) ngwalyo: “Mishongo inatumu manene mu myaka ya ma 2000. Mishongo ya laja ya kufwa ngwe kolela, yellow fever na mishongo ikwabo ya kulitambwisa anga kuicili. Co lalo, kuli mishongo yaiha ije inambateselela mishongo yakama ya mu nulo (ya kufwa ngwe SARS na MERS), limpwema lyakama (pandemic influenza), Ebola na Zika. Nameme baka-sayansi na bandotolo banalilongesa manene bya mishongo, oloni kubasele kuwana bumbanda buje bumanesa mishongo yoshe.

5. CIPANGI CA KWAMBULULA MU KAYE KOSHE

Yesu wendekele byuma bikwabo lalo bije bimwesa ngwabyo Bumwene bwa Njambi buli muyehi. Wendekele ngwendi: “Ebi Biñanda Byabibwa bya Bumwene bakabyambulula mu kaye mwoshe ngwe kupwa bukaleho ku miyati yoshe, co asinoni kukotoka kwa kaye kukaija.” (Mateo 24:14) Mu kaye, banu bali na kuliwana manene na bukalu. Nameme ngoco, banu bakutubakana 8 milyoni bali na kwambulula muzimbu waubwa wa Bumwene bwa Njambi mu mafuti a kupwa 240 na mu bindaka bya kutubakana 1,000. Ebi kanda bicilingiweho laja mu kaye.

Tuli na kulimwena na kuziba ebi byuma byendekele Yesu. Bika tunapande kwakela mbunge ku byuma bili na kulingika ano matangwa? Mwafwa Yesu wendekele ngwendi: “Omwo mukamona byuma ebi bilingiwa, mukazibuka ngeci Bumwene bwa Njambi buli muyehi.”—Luka 21:31.

Kumoneka kwa byuma byendekele Yesu, na kulikaba kwa biñanda bya mu Mbimbiliya kutukwasa tuzibisise ngwetu Njambi washimbikile Bumwene bwendi mwilu mu 1914. a Ha simbu oyo, Njambi wangwile munendi Yesu Kilistu kupwa Mwene. (Myaso 2:2, 4, 6-9) Ololo Bumwene bwa Njambi buyula hano hasi, co bukatundisako bifulumende byoshe bya banu na kutengulula kaye kapwe paladaisi mangana banu bayoyemo myaka yoshe.

Ololo majwi a mu lilombelo lya kutalelako lyendekele Yesu alishulisilila. Awa majwi ngwawo: “Bumwene bwobe bwije, cizango cobe bacilinge hano hasi, ngwe omwo bakacilingi mwilu.” (Mateo 6:10) Co byuma muka bibunalingi Bumwene bwa Njambi mwilu kushwa habwashangumukilile kuyula mu 1914? Obu Bumwene bukalinga bika mubukashangumuka kuyula hano hasi?