Netu kunapu lika ngwe tuli ha mwela uje ushaka kujalela. Yesu watumbwile bukalu butunesekesa ku kujalela ngwendi “ñababa” yakama. (Mateo 24:21) Twabandamena kuliwana na ñababa yakama. Oloni kuli byuma bitunapande kulinga mangana keti twakunyonge. Byuma muka bene obyo?

Mu Ñanda yendi ya ha Munkinda, Yesu Kilistu wanangwile banu ngwendi: ‘Ha kulibanga twaleleleniho kushakezeka Bumwene bwa [Njambi] na busunga bwendi.’ (Mateo 6:33) Twasa kulinga bati ngoco?

Ha kulibanga shakezekeni Bumwene bwa Njambi. Kulumbununa ngwabo, tunapande kumona Bumwene bwa Njambi kupwa bwa seho manene kutubakana cuma coshe coshe. (Mateo 6:25, 32, 33) Bika bitunapande kubumwena ngoco? Mwafwa banu kubasa kumanesa bukalu bwoshe bubali na kuliwana nabwo. Bumwene bwa Njambi bukebwo lika bwasa kulinga ngoco.

Shakezekeni busunga bwendi. Tunapande kulinga mutwasela mwoshe kupangesa mashiko a Njambi na binangulo byendi. Mwafwa bika? Mwafwa kukulahela mana etu omwo twangula byakulinga kutukobelesa mu bukalu. (Visimo 16:25) Nga twononoka binangulo bya Njambi, tuzibisa Njambi kubwaha, co lalo tukala na buyoye bwabubwa.—Isaya 48:17, 18.

Twaleleleniho kushakezeka tahi Bumwene bwa Njambi na busunga bwendi. Yesu wanangwile ngwendi, bamo banasa kusinganyeka  ngwabo nga bakala na bimbongo byabingi, co bayoya mwamubwa. Bamo co banasa kwecelela bishoti bya mu kuyoya kubazezamesa manene, na kubonowesa kuwana simbu ya kushakezeka Bumwene bwa Njambi.—Mateo 6:19-21, 25-32.

Oloni Yesu wakulahesele ngwendi, baje bakundwiya Bumwene bwa Njambi bawana byuma bibatonda mu kuyoya ha simbu ino na kukalikuwa bibezikiso myaka yoshe.—Mateo 6:33.

Bandongesi ba Yesu ba mu cita ca myaka ca kulibanga bashakezekele tahi Bumwene bwa Njambi. Nameme ngoco, kubalimwenenene kuhwa kwa tuyando twoshe mu simbu ibayoyele. Oloni Njambi wabanyungililile. Mu ngila muka?

Bayoyele mu kulitombola na binangulo bya Njambi, co oku kwabanyungililile ku bukalu bubaliwanene nabwo baje kubononokele Njambi. Kukulahela ngwabo Bumwene bwija kwabakwasele bakolese mubaliwane na bukalu bwakama manene. Njambi wabanene “nzili” ya kutubakana nzili ya bunu mangana bakolese.—2 Kolinte 4:7-9.

Baka-Kilistu ba mu cita ca myaka ca kulibanga bononokele lishiko lya Yesu lya kushakezeka tahi Bumwene. Bambulwilile banu boshe ba mu mitambela mubakele muzimbu waubwa wa Bumwene. (Kolose 1:23) Kuli bamo bali na kulinga ngoco ano matangwa ndi?

Eyo. Bakaleho ba Yehova bazibuka ngwabo Bumwene bwa Njambi ololo bunyongesa byuma byoshe byabibi. Ngeci, bali na kweseka mubasela mwoshe kwononoka lishiko lya Yesu uje washikile ngwendi: “Ebi biñanda byabibwa bya Bumwene bakabyambulula mu kaye mwoshe ngwe kupwa bukaleho ku miyati yoshe, co asinoni kukotoka kwa kaye kukaija.”—Mateo 24:14.

Munapande kulinga bika omwo munazibi muzimbu waubwa? Tembwinineni banu ba mu cita ca myaka ca kulibanga baje bakele ku Masendoniya mu nganda ya Mbeleya. Mubazibile muzimbu waubwa wa Bumwene kuli Kapositolo Paulu, ‘bashokolwele bimbunge’ byabo na kutambula mwamubwa uje muzimbu. Co “balilongesele Bisoneka” mangana bamone indi byuma bibazibile byapwile bya busunga, co lalo bapangesele bibalilongesele.—Vilinga 17:11, 12.

Neni mwasa kulinga ngoco. Kushakezeka tahi Bumwene bwa Njambi na busunga bwendi, kuminyungilila ha simbu ino, na kumikwasa mukalikuwe kuyoya mu kwoloka myaka yoshe.