• Njambi ikeye namwangula. “Njinaka mwene yange . . . Njikakwana miyati yoshe kupwa buswana bwobe, co kaye koshe kakapwa bufuko bwobe.”—Myaso 2:6, 8.

• Naswana Mwene Ndabiti. “Kunasemuka mbututu. Banatwana mwana wa munalume . . . Nzili yendi ikakola mbe, co bumwene bwendi bukapwa bwa kwoloka simbu yoshe. Ikeye akainga hali Mwene Ndabiti. Akakolesa nzili yendi ha mashiko a busunga.”—Isaya 9:6, 7.

• Wasemukilile mu Mbetelehema. “Yobe Mbetelehema . . . , kuli yobe kukatunda muka-kuswana . . . Banu ba mu kaye mwoshe bakakomoka bukama bwendi.”—Mika 5:2, 4.

• Bamubyanene na kumutsiya. “Twamuyeluwisile ngwe kesi na seho . . . Bamutwile bimbandu omwo bubi bwetu, bamupupile omwo kubulumuna kwetu.”—Isaya 53:3, 5.

• Wasangukile ku batsi, co watambwile bumpau. ‘Kuukanjiseze mu Cihilo, nameme kutaba muka-kujela wobe ngeci akanyonge . . . Simbu yoshe njibwahelela ha kukala ku liboko lyobe lya cilyo.’—Myaso 16:10, 11.

Kushwa habashangumukilile kukalako banu, munu umo lika ikeye napwisamo byuma bitunendeka. Ou munu ikeye Yesu Kilistu. Mukemwo kangelo walekele Maliya baina ya Yesu ngwendi: “Njambi akamupwisa mwene, ngwe mwapwile kukulwila yendi Ndabiti . . . Bumwene bwendi kubukahu.”—Luka 1:31-33.

Yesu kapwile mwene ha simbu yayoyele hano hasi. Oloni akayula banu boshe kutundilila mwilu ha kupwa Mwene wa Bumwene bwa Njambi. Mwafwa bika Yesu nafwila kupwa Mwene? Tucimoneni byuma byalingile omwo wayoyele hano hasi.

•   Yesu wakele banu mbunge. Yesu wakwasele banu ba bisemwa byoshe, banalume na banakazi, banike na tukulukazi. (Mateo 9:36; Mako 10:16) Omwo muka-mbumba wamulombele ngwendi: “Shukulu, nga mushaka, mwasa kunjijelesa.” Yesu wamuzibilile mema ku mbunge, co wamukangwisile.—Mako 1:40-42.

• Yesu walongesele mwakuzibisila Njambi kubwaha ku mbunge. Wendekele ngwendi: “Kuwasa kupangela Njambi na kupangela lalo bimbongo.” Wendekele lalo ngwendi tunapande kulingila bakwetu byuma bitutonda ngwetu netu ngwe batulingilabyo. Wamwesele lalo ngwendi Njambi washaka ngwendi tusinganyeke byabibwa na kulinga byabibwa. Co nga tushaka kuzibisa Njambi kubwaha ku mbunge, kutwapandele kukala na bisinganyeka byabibi mu bimbunge byetu. (Mateo 5:28; 6:24; 7:12) Ngeci, Yesu walongesele ngwendi nga tushaka kupwa ba kubwahelela mu busunga, tunapande kuzibuka byuma byatonda Njambi ngwendi tulinge na kubilinga.—Luka 11:28.

• Yesu walongesele mwakumwesela cizemo. Yesu wetele baka-kumutolilila ku bimbunge mwafwa wakele na kulongesa na kulinga byuma byabibwa. ‘Mbunga ya banu balikomokelele ha kulongesa kwendi. Wabalongesele na moko.’ (Mateo 7:28, 29) Wabalongesele lalo ngwendi: “Zemeni bitozi beni.” Walombelelele banu bamo baje bamutsiile ngwendi: “Tate basambese, omwo kubazibuka bika bali na kulinga.”—Mateo 5:44; Luka 23:34.

Yesu ikeye nafwila kuyula kaye mwafwa wakala na ngozi, co washaka kukwasa banu. Oloni tangwa lika ashangumuka kuyula?