Nga Njambi kesi ikeye ali na kunena tuyando, co iya nanene njala na buhutu na binzita na mishongo na bukalu bwa kulizila? Lijwi lya Njambi, Mbimbiliya lyatuleke byuma bitatu bikanene tuyando:

1. Kulishaka na Nuna na Bizindo. “Banu bamo baje bali na nzili, co bamo bali na kuyanda mwisi yabo.” (Muka-kwambulula 8:9) Banu bali na kuyanda mwafwa ya kubalyatelela ku bakwabo banu ba kujeneka kulumbunuka, baka-kulishaka bakebo babenya ba kukenyuka.

2. Simbu na Lubinda. Banu bali na kuyanda mwafwa ya “lubinda lukaija ku munu woshe-woshe.” (Muka-kwambulula 9:11) Banu basa kuliwana mu bukalu mwafwa ya kukala mu mwela waubi ha simbu yaibi nambe kuliwana mu monde nambe kujeneka kwaka mana ku byuma nambe kusebuka.

3. Munu Wamubi Uje Ali na Kuyula Kaye. Mbimbiliya yamwesa bwino kuje kuli na kutunda tuyando. Ngwayo: ‘Kaye koshe kali mu nzili ya Liyabolo.’ (1 Yowano 5:19) “Liyabolo” wapwa munu wa nzili wa ku sipilitu, uje wapwile kangelo wa Njambi oloni “kapwile muka-busunga embwe.” (Yowano 8:44) Tungelo bakwabo balikwatasanene na Satana mu kutengulukila Njambi na kukabangeya mashungu abo, mukemwo banapu bandemone. (Kushangumuka 6:1-5) Kutunda lika ha simbu ibatengulukilile Njambi, Satana na bandemone bendi bananene bukenya na tuyando mu kaye. Ano matangwa, Liyabolo natenuka manene, co ali na ‘kukwisa kaye koshe,’ co oku kunanene ‘tuyando hano hasi.’ (Kujombolola 12:9, 12) Satana napu cikenya wamubi manene. Akabwahelela nga banu bali na kuyanda. Ngeci, Satana ikeye ali na kunena tuyando kesi Njambi embwe.

ACISINGANYEKENI HA ÑANDA EYI: Munu lika uje napu wa kukenyuka manene ikeye asa kuyandesa banu ba kujeneka mulonga. Oloni Mbimbilya ngwayo: “Njambi wapwa cizemo.” (1 Yowano 4:8) Mu kulitombola na bunu bwendi, “Njambi kesi kulinga bubi nambe kamandondo, co Muka-nzili yoshe kesi kulinga bubi embwe.”—Yombi 34:10.

Oloni munasa kulihula ngweni: ‘Njambi ambata simbu ya kupwa hali, kwecelela ciyulo cacibi ca Satana?’ Ngwe mutunamwena, Njambi wazinda bubi, co akazibi kubabala ku mbunge mwakamono tuyando twetu. Mukemwo Lijwi lyendi litushongangeya ngwalyo: “Akeni bukalu bweni bwoshe hali ikeye, omwo ikeye ali na kumilela.” (1 Petulu 5:7) Njambi watuzema manene, co lalo wakala na nzili, ngeci, akamanesa tuyando na bubi bwoshe ngwe mucinendekela cilongesa cinatako. *