Njambi watangele mibila yetu na cashu ca kulwisa mishongo. Nga mubila wa kulikangula unabetwa nambe unabulumuka, co “wasa kushangumuka kwolesa mbandu yakama nambe yaindondo.” (Cipatela ca Johns Hopkins Medicine) Mu simbu yaindondo lika maninga ecela kwita, co mbandu ishangumuka kulikwata na kuma, co ihola.

ACISINGANYEKENI HA ÑANDA EYI: Nga Ishamatanga watangele mibila yetu na cashu ca kwolesa bimbandu, kuma kutwapandele kumukulahela ngwetu asa kututakamesa nga tunapokoka mbunge ndi? Muka-kwimba wendekele ngwendi: “Akangwisa baka-kuzeya mu bimbunge na kusaka bimbandu byabo.” (Myaso 147:3) Oloni nga munazeye, bika byasa kumikwasa mukulahele ngweni Yehova asa kusaka bimbandu byeni mu simbu ino na kulutwe?

Njambi nakulahesa ngwendi: “Kesi muzibe lyoba, yange njili hamo neni. Kesi mujaje, yange Njambi yeni njikamitakamesa na kumikwasa.” (Isaya 41:10) Munu uje azibuka ngwendi Yehova wamwaka mbunge, akapu wa kushubuluka, co lalo asa kutakamena byeseko byoshe byaliwana nabyo. Kapositolo Paulu watumbwile eci kushubuluka ngwendi: “Kwoloka kwa Njambi kuje munu naumo wahi asa kuzibisisa.” Co Paulu wendekele lalo ngwendi: “Njasa kulinga byuma byoshe ha nzili ije yananjana Kilisitu.”—Filipu 4:4-7, 9, 13.

Bisoneka bitukwasa tukulahele manene byuma byanatukulahesa Yehova kulutwe. Cakumwenako, ku mukanda wa Kujombolola 21:4, 5 (majwi abanambata ha liputa linatako) banendekako byuma byakalinga Njambi nebi bitulingisa tukulahele ngwetu akabishulisilila:

• “Akasikumuna misozi yoshe” ku mesho a banu. Yehova akamanesa tuyando na bishoti byetu byoshe, nameme bije kubasa kunanguka bakwetu.

• Mwene wa Nzili Yoshe ‘uje natumbama ha litanda’ mu bumpau bwa mwilu akapangesa nzili na moko yendi mu kumanesa tuyando na kutukwasa.

• Yehova natukulahesa ngwendi bikulaheso byendi byapwa bya ‘busunga na kulongwa.’ Kulumbununa ngwabo Njambi akashulisilila byanatukulahesa mangana lizina lyendi kesi libihye.

“‘Akasikumuna misozi yoshe ku mesho abo. Co kukukakala kutsa nambe busiwa nambe kulila nambe kukemanga. Byuma bya laja bineti.’ Co uje watumbamene ha litanda wendekele ngwendi: ‘Ololo njikalinga byuma byoshe bipwe byabiha.’ Ikeye wendekele kuli yange lalo ngwendi: ‘Soneka ebi, omwo majwi awa anapu a busunga, basa kuwakulahela.’”—Kujombolola 21:4, 5.

Byuma bya kutanga na Mbimbiliya bili na kujombolola bifwa bya Tate yetu wa mwilu. Byuma bya kutanga bitukwasa tuzibuke ngwetu Njambi asa kupwa Kabusamba ketu wa ha mbunge. Mbimbiliya ikeyo yatuleka ngwayo: “Shwenyeni kuyehi na Njambi, co na ikeye lalo akashwenya kuyehi neni.” (Yakomba 4:8) Mukanda wa Vilinga 17:27 ngwawo: “Njambi kakele kulyala netu embwe.”

Nga mulifwita kuzibuka Njambi, co mukulahela manene ngweni “ikeye ali na kumilela.” (1 Petulu 5:7) Bukwasi muka bumuwana nga mukulahela kuli Yehova?

Tucisimutwiyeni hali Toru, wa ku Japan. Baina bapwile baka-Kilisitu, oloni ikeye walikobelesele mu cibunga ca baka-kulwa ca Japanese Mafia cibatumbula lalo ngwabo yakuza. Toru wendekele ngwendi: “Njamwene ngwange Njambi wanjizinda, co njakele na kuliziba ngwange kutsa kwa babushoko bwange, maneneni baje ba ha mbunge kapwile kashitiko kakele na kunjana Njambi.” Toru wamwene ngwendi kukala manene na banu bababi kwamulingisile apwe “cikenya wa kujeneka kuzibila banu ngozi.” Acanuka biyongola byakele nabyo ngwendi: “Njashakele kutsiya munu uje watsimanene manene kutubakana yange mangana njitsimane, nameme kulinga ngoco kwasele kunjinenela butsi oku njicili njimwanike.”

Oloni omwo Toru na munakazi wendi Hannah balilongesele Mbimbiliya, Toru watengulwile buyoye bwendi nomu mwakele na kumwenamo byuma. Hannah ngwendi: “Njakele na kulimwena munalume  wange mwakele na kutenguluka.” Ha simbu ino, Toru ali na kwendeka na likulahelo ngwendi: “Kuli Njambi uje muka-kutulela tubaboshe. Kashakele ngwendi tutse, oloni washaka kusambesa baje batenguluka mu busunga ku bilinga byabo byabibi. Akatolilila ku byuma byoshe bije kutwasa kuleka munu woshe nambe bije munu kasa kubizibisisa. Ololo Yehova amanesa bukalu na tuyando na bubi bwoshe. Nameme ha simbu ino ali na kutukwasa mu ngila ije kutwabandamenene. Watwaka mbunge, co lalo watuzema nameme tuli mu bukalu.”—Myaso 136:23.

Ngwe mutunamwena kuli Toru, kuzibuka ngwetu Njambi asa, co ololo amanesa bukalu bwoshe na kusikumuna misozi ku mesho a banu, kukutukwasa lika kukala na lilabelelo lya byuma bya kulutwe, oloni kutukwasa lalo kuyoya mwamubwa ha simbu ino. Ngeci, nameme tuli mu kaye kanashulu na tuyando, tuwana bukwasi nga tuzibuka ngwetu Njambi watuzema.