NGA KUNASHOLOKA BUKALU, MUKALIHULA NGWENI, ‘MWAFWA BIKA NJAMBI NECELELA OBU BUKALU NDI?’ KUMA MULI NA KULIFWITA NA BUKALU BUJE BUKAMILINGISA MUSINGANYEKE NGWENI HAMO NJAMBI KAMYAKELE MBUNGE NDI?

Hamo muli na kuliziba ngwe mwalizibilile Sheila wa ku United States. Ha kupwa munu uje nakolela mu naanga ya baka-bulombelo, wendekele ngwendi: “Njinatwalelelaho kuzema Njambi kushwa ku bwanike bwange mwafwa ikeye Watutangele. Oloni njamwene ngwange wakala kulako nange. Njazibukile ngwange Njambi ali na kunjimona, oloni wakala kulako nange. Kunjalizibile ngwange Njambi wanjizinda, oloni kunjamwene ngwange wanjaka mbunge.” Mwafwa bika Sheila wamwene ngwendi Njambi kamwakele mbunge? Wendekele ngwendi: “Mu naanga yetu twakele na kuliwana na bukalu kushwa kumo, co njamwene ngwange Njambi kakele na kutukwasa.”

Hamo neni mwakulahela ngweni Njambi Muka-nzili Yoshe kwakala ngwe mwalingile Sheila. Oloni munasa kusinganyeka ngweni Njambi kamyakele mbunge. Munalume wa kulongwa Yombi uje wakulahelele ngwendi Ishamatanga wakala na nzili na mana nendi mukemwo mwasinganyekele. (Yombi 2:3; 9:4) Yombi mwakele mu bukalu bwa kuliseza-seza, wamwene ngwendi naumo wahi wamukwasele, ngeci wehwile Njambi ngwendi: “Omwo bikajo unjibandesela cihanga cobe? Omwo bikajo unjiyongola ngwe njicitozi cobe?”—Yombi 13:24.

Bika biyituleka Mbimbiliya? Kuma tunapande kwana Njambi mulonga nga kunasholoka bukalu ndi? Kuma kuli bukaleho buje bumwesa ngwabo Njambi waka mbunge banu boshe nambe munu na munu ndi? Twasa kuzibuka bati ngwetu Njambi akatumono nambe kutuzibuka mwamubwa na kutuzibila mema ku mbunge nambe kutukwasa nga tuli mu bukalu?

Bilongesa binatako bitukwasa kumona bitulilongesa ku byuma bya kutanga bije bitukwasa kumona ngwetu Njambi watwaka mbunge. (Loma 1:20) Kutundoho, tusimutwiya ha byuma biyendeka Mbimbiliya bije bimwesa ngwabyo Njambi watwaka mbunge. Nga ‘muzibuka’ Njambi mwamubwa kwitila mu byuma byanatanga na mu Lijwi lyendi, co mumukulahela manene ngweni “ikeye ali na kumilela.”—1 Yowano 2:3; 1 Petulu 5:7.