Kukala na mema ku mbunge kwapwa kukala na cashu ca kuliziba mwali na kulizibilamo mukwetu ha byuma byanaliwana nabyo na kulimona ngwe yetu tuli mu cifwa oco. Ndotolo Rick Hanson, muka-kulilongesa bya bukangule bwa ku bwongo wendekele ngwendi: “Twasemuka na cashu ca kuzibila bakwetu mema ku mbunge.”

ACISINGANYEKENI HA ÑANDA EYI: Mwafwa bika twakala manene na cashu ca kuzibila banu mema ku mbunge kutubakana tusitu? Mbimbiliya imwesa ngwayo Njambi watangele banu mu cifwa cendi. (Kushangumuka 1:26) Kututanga mu cifwa ca Njambi kukekwo kukatulingisa tutembwinine bunu bwendi na kulifwita kukala na bifwa byendi byabibwa. Ngeci, nga banu bazibila bakwabo mema ku mbunge na kubakwasa, co bali na kumwesa mema ku mbunge akala nawo Ishamatanga yabo, Yehova Njambi.—Visimo 14:31.

Njambi akatuzibila mema ku mbunge, co kesi kuziba mwamubwa nga tuyanda. Mbimbiliya inendeka hali Baisalele ba ku sañulu baje bakele mu bundungo ku Ingito na kukala mu mambo ha myaka 40 ngwayo: ‘Mu tuyando twabo twoshe, walizibile kubabala ku mbunge.’ (Isaya 63:9) Njambi kamwene lika tuyando tubakele natwo banu bendi. Oloni walizibile kubabala ku mbunge. Mukemwo wendekele ngwendi: “Njamono ha tuyando twabo twoshe.” (Kutuhuka 3:7) Co wendekele lalo ngwendi: “Woshe akamipupa akapupa cuma ca seho manene kuli yange.” (Zakaliya 2:8) Nga bakwetu batulinga mwamubi, co nendi aziba kubabala ku mbunge.

Bisimbu bimo tunasa kuliziba kukala na mulonga na kusinganyeka ngwetu Njambi kasa kutuzibila mema ku mbunge. Oloni Mbimbiliya ngwayo: “Njambi ikeye wakama manene kutubakana citakutaku cetu, co azibuka byuma byoshe.” (1 Yowano 3:19, 20) Njambi ikeye atuzibuka mwamubwa kutubakana mutulizibukila yetu babenya. Azibuka mwamubwa bukalu bwetu na bisinganyeka byetu, nomwo mutukalizibilamo. Co akatuzibila mema ku mbunge.

Bisoneka bituzembeleka ngwabyo

• “Omwo mulombela kuli yange, co njikamikumbulula ngwange, ‘Yange uno.’”—ISAYA 58:9.

• ‘Yange lika njazibuka matumbe njili nawo hali yeni, matumbe a kuminenela bibezikiso, kesi a kuminenela tuyando embwe, matumbe a kuyoya kulutwe kuje kunashulu na lilabelelo. Asinoni mukatambeka kuli yange. Co mukaija na kulomba kuli yange, njikamikumbulula.’—NJELEMIYA 29:11, 12.

• ‘Yobe uzibuka misozi yange. Kuma kuwaisonekele mu libulu lyobe ndi?’—MYASO 56:8.

Kuzibuka ngwetu Njambi akatuzibila mema ku mbunge kutukwasa tukolesele bukalu ndi? Tucisimutwiyeni ha byuma byaliwanene nabyo Maria:

Wendekele ngwendi: “Munima ya kutsisa munange wa munalume wa myaka 18, uje wabinjile kansa ha myaka ibali. Njalizibile ngwange kuyoya kwapwile kwakukalu, co lalo kukwesi na seho. Njalubalelele Yehova mwafwa kanjikwasele na kukangwisa munange.

“Munima ya myaka 6, kabusamba kange wa cizemo wa mu cikungulukilo wanjitolilile mwamubwa omwo njamulekele ngwange Yehova wanjizinda. Wanjitolililile mwamubwa ha simbu yailaha, co kanjibatwiyiye. Wendekele majwi ali ku 1 Yowano 3:19, 20 aje anjikwatele ku mbunge. Endeka ngwawo: ‘Njambi ikeye wakama manene kutubakana bimbunge byetu, co azibuka byuma byoshe.’ Wanjilekele lalo ngwendi Yehova azibuka bukalu bwetu bwoshe.

“Nameme wanjizembelekele, oloni kwanjikaluwilile kwecela kulubalela Njambi. Kutundoho, njatandele mukanda wa Myaso 94:19 uje wendeka ngwawo: ‘Omwo biyongola mu mbunge yange byatumine, oloni yobe wanjizembelekele na kunjizibisa kubwaha.’ Njalizibile ngwe awa mavesi bawasonekelele yange lika. Mu kwita kwa simbu, njalizibile kushubuluka kuleka Yehova bukalu bwange, mwafwa njamwene ngwange ali na kunjitolilila na kunjizibisisa.”

Kukatuzembeleka manene kuzibuka ngwetu Njambi akatuzibila ngozi. Oloni mwafwa bika tuyando tunatumu manene? Kuma Njambi ali na kutwana kashitiko mwafwa ya kulinga byuma byabibi ndi? Njambi akalingako bimo mangana amanese tuyando twoshe ndi? Ebi bihula bakabikumbulula mu biñanda binatako.