Batutangelele Kuyoya Myaka Yoshe
TUBABOSHE twashaka kuyoya myaka yaingi mu kubwahelela. Acisinganyekeni mumwasa kulizibila kuyoya myaka yoshe oku mwalikangula na kubwahelela. Kulikuwa kuyoya myaka yaingi na banu bamwazema, kwendela mitambela ya kulisezaseza ya mu kaye, kulilongesa bipangi byabingi, kukala na mana na kuzibuka mwamubwa byuma byoshe bimushaka.
Kukala na biyongola bya cifwa eci kunapande ndi? Eyo. Bisoneka bimwesa ngwabyo Njambi watutanga na biyongola bya cifwa eci. (Muka-kwambulula 3:11) Bimwesa lalo ngwabyo “Njambi wapwa cizemo.” (1 Yowano 4:8) Kuma Njambi watutangele lika na lishungu lya kushaka kuyoya myaka yoshe okuni kuyoya mu ngila oyo kucitaba ndi?
Naumo wahi washaka kutsa. Mbimbiliya yatumbula kutsa kupwa “citozi.” (1 Kolinte 15:26) Bamo bakayoyoko myaka yaingi, co bakwabo bakatsi bwasi. Oloni munu na munu kubanga bene atse. Bamo kubesi kushaka nambe kusinganyeka ha kusta. Kutsa kukahwa ndi? Kutsa kwasa kuhwa bene ndi?
BUKALEHO BUMWESA NGWABO TUKAYOYA MYAKA YOSHE
Kuma Njambi wayongwele ngwendi banu batse? Embwe. Mukanda wa mu Mbimbiliya wa Kushangumuka umwesa ngwawo Njambi wayongwele ngwendi banu bayoye myaka yoshe hano hasi. Yehova Njambi wabwahesele mwamubwa lifuti libu mangana banu bakaleho. Ngeci, watangele Adama na kumwaka mu Paladaisi nambe ngwetu mu lihya lya Edeni. Omwo wamanesele, “Njambi wakengele ha byuma byoshe bije byatangele, wamwene ngeci binabwaha manene.”—Kushangumuka 1:26, 31.
Njambi watangele Adama mu cifwa cendi mu kulumbunuka. (Kwituluka mu Mashiko 32:4) Eva munakazi wa Adama nendi wapwile wa kulumbunuka mu bisinganyeka na ku mubila. Yehova wabalekele ngwendi: “Kiteni, ngeci batekulwila beni bakatume hano hasi hoshe, co mukakala na moko ya kushwana bisi ba mu mema a kalunga, na tuzila, na tusitu boshe.”—Kushangumuka 1:28.
Myaka yaingi yapandele kwita asinoni ba Adama na Eva bashulise lifuti. Eva mwakitile bana, bana bendi nabo ngwe bakita bana kweta noho kaye koshe kashula ngwe mwayongwelelemo Njambi. (Isaya 45:18) Kuma Yehova nesi kwana Adama na Eva lilabelelo lya cifwa eci ngwe wabatangelele kuyoya lika simbu yaindondo ya kumona lika bana na batekulyabo ndi?
Anukeni lalo ngweni Njambi wanene Adama moko ya kushwana tusitu. Cipangi cibamwanene ca kuluka tusitu mazina capwile ca simbu yailaha. (Kushangumuka 2:19) Oloni wapandele kuzibuka mwamubwa baje tusitu na kuzibuka mwakubanyungila asinoni ase kubayula. Kulinga ngoco kwatondele simbu yaingi.
Kushika Adama na Eva, bashulise lifuti libu na kubaleka bya kushwana tusitu kumwesa ngwabo Njambi watangele uje munalume wa kulibanga na munakazi wendi mangana bayoye simbu yailaha. Co bayoyeleko myaka yaingi.
NJAMBI WAYONGWELE NGWENDI BANU BAYOYE MYAKA YOSHE MU PALADAISI HANO HASI
BANU BAJE BAYOYELE MYAKA YAINGI
Adama wayoyele myaka 930
Matusela wayoyele myaka 969
Nowa wayoyele myaka 950
Ano matangwa tuli na kuyoya myaka 70-80
Mbimbiliya imwesa ngwayo kuli banu bayoyele myaka yaingi kutubakana mutuli na kuyoyela ano matangwa. Ngwayo Adama “watsile omwo wakele na myaka 930.” Yatumbula lalo banalume 6 baje bayoyele myaka ya kutubakana 900. Bapwile Seta, Inoshe, Kenani, Njalende, Matusela, na Nowa. Aba banalume bayoyele te kanda Libazi lya Nowa lije. Nowa wayoyele myaka 600 simbu kanda Libazi lyete. (Kushangumuka 5:5-27; 7:6; 9:29.) Basele bati kuyoya myaka yaingi ngoco?
Aba banalume boshe bayoyele kuyehi na simbu ibalumbunukile banu. Hamo bikebyo byabakwasele bayoye myaka yaingi. Kulumbunuka kwasa kulingisa banu bayoye myaka ingai? Co kutsa kukahwa bati? Tunapande tahi kuzibuka bituli na kukulubalela na kutsa asinoni tuwane cikumbululo.
