Njambi walekele Adama ngwendi: “Omwo nga ukalyako, co ukatsa ku litangwa lije bene.” (Kushangumuka 2:17) Ngwe Njambi mwatangele Adama wayongwele ngwendi akulubale na kutsa ngwe lije lishiko kulyakele na seho. Adama wazibukile ngwendi nga kali kuje ku muti, katsi.

Mu lihya lya Edeni mwalisalele bushuka bubasele kulya ba Adama na Eva, kubapandele kulya kuje ku bushuka bubababindikile. (Kushangumuka 2:9) Ngwe kubalileko, ngwe bamwesele kasingimiko kuli uje wabanene kuyoya. Ngwe bamwesele lalo ngwabo Njambi ikeye lika napande kubatwamenena.

Tucisimutwiyeniko ha majwi endekele Satana kuli Eva mangana tuzibisise bibatsililile ba Adama na Eva. Satana Liyabolo wapangesele linyoka mu kubakwisa. Mbimbiliya ngwayo: “Oloni linyoka wapwile wa kunyanyama manene kutubakana tusitu boshe baje Shukulu Kalunga Njambi watangele, co wehwile munakazi ngwendi, ‘Kuma mwa busunga bene Njambi namileke ngwendi kesi mulye ku bushuka bwa ku muti woshe woshe wamuno mu lihya ndi?’”—Kushangumuka 3:1.

Eva wakumbulwile ngwendi: ‘Tunasa kulya ku bushuka bwa muti woshe woshe wa mu lihya. Oloni ku bushuka bwa muti wa mukati ka lihya, Njambi watulekele ngwendi kesi tukalyeko, nameme kukwatako lika, nga tulingamo, co tutsa.’ Co linyoka wendekele lalo ngwendi: “Omwo keti mwa busunga, kumukatsi embwe. Njambi nendeka ngacije omwo nazibuka ngeci ku litangwa lije mukalyako mesho eni akatona, co mukalifwa na Njambi, mukazibuka bubwa na bubi.” Satana walumbunwine ngwendi Yehova wapwa muka-makuli, co lalo te kashakele ngwendi bisemi betu balikuwe kuyoya.—Kushangumuka 3:2-5.

Eva watabele makuli a Satana. Wakengele kuje ku muti shwiii. Bushuka bwamonekele kubwaha mu mesho endi, co wabushungwiyiye. Wolobelele ku muti na kupotolako bushuka na kushangumuka kulya. Mbimbiliya ngwayo: “Co waneneko bumo munalume wendi, nendi lalo walile.”—Kushangumuka 3:6.

Njambi walizibile manene kubabala ku mbunge bana bendi mubalyangwilile kumutengulukila. Walingile bati? Yehova walekele Adama ngwendi: “Ukeluka ku libu kuje kuwatundile. Omwo yobe watundile ku libu, co ukeluke lalo ku libu.” (Kushangumuka 3:17-19) Ngeci, Adama “watsile  omwo wakele na myaka 930.” (Kushangumuka 5:5) Adama kaile mwilu nambe kulimuka kupwa munu wa ku sipilitu. Simbu kanda Yehova amutange kupangesa libu, Adama kakeleko. Ngeci, omwo watsile wasosonyokele mu libu na kupwa lika libu lya ngoco ngwe mwafwile ha kulibanga. Wazilukile. Olu lwapwile lubinda lwakama manene.

Ba Adama na Eva bazimbalesele kulumbunuka kwabo na lilabelelo lya kuyoya myaka yoshe mwafwa ya kujeneka kwononoka. Batengulukile na kupwa ba kujeneka kulumbunuka. Oloni bubi bwabo bwabakobelesele mu bukalu na kukobelesa bakwabo mu bukalu, co bapwile baka-bubi. Bubi bwabo bwashambukila na kuli bana babo boshe. Ku Loma 5:12 ngwabo: “Ngeci bene, bubi bwezile hano ha kaye hali munu umo lika, co bubi bwendi bunanene kutsa. Co kutsa kunete ku miyati yoshe ya banu, omwo boshe banalingi bubi.”

Mbimbiliya yatumbula butsi kupwa “nanga ya busiwa ije yafwikile miyati yoshe ya hano ha kaye.” (Isaya 25:7) Eyi nanga yafwiki banu boshe, co noku kwa kutewela kwahi. ‘Banu boshe bali na kutsa mwafwa ya Adama.’ (1 Kolinte 15:22) Banu babangi bakalihula ngwe mwalihwile kapositolo Paulu ngwendi: ‘Iyajo akanjamena ku mubila ou uli na kunjitwala ku kutsa?’ Iya asa kutwamena?—Loma 7:24.