NJAMBI kayongwele ngwendi buyoye bupwe ngacije. Mu kaye mwapandele kukala lika banu baje bashaka Njambi abayule, banu baje bamusingimika na kutembwinina bifwa byendi byabibwa. Njambi wayongwele lalo ngwendi bapwe bakubwahelela na kupangela hamo mu kulela binaanga, kulilongesa byuma byabiha na kupwisa kaye koshe paladaisi.

• “Ikeye amanesa binzita hano hasi hoshe.”—Myaso 46:9.

• ‘Simbu inete ya kunyongesa baje babiisa kaye.’—Kujombolola 11:18.

• ‘Naumo wahi lalo akayoya mu lifuti akalinyenga ha kubinja.’—Isaya 33:24.

• ‘Banu bange banjangwile bakajolela na bipangi byabo.’—Isaya 65:22.

Obu bupolofweto bukalishulisilila bati? Njambi nangula munendi, Yesu, kupwa Mwene wa Bumwene bwa kulumbunuka buje bukayula hano ha kaye kutundulila mwilu. Mbimbiliya inabutumbula ngwayo bunapu Bumwene bwa Njambi. (Ndanyele 2:44) Mbimbiliya inendeka hali Yesu ngwayo: “Shukulu Kalunga Njambi akamupwisa mwene.”—Luka 1:32, 33.

Yesu mwakele hano ha kaye walingile bikomoweso byabingi manene mangana amwese byakalingila banu ha simbu yakayula hano ha kaye.

• Wakangwisile mabezi a kulisezaseza, kumwesa mwakamaneselamo mishongo yoshe.—Mateo 9:35.

• Wolwesele lihunzi mu kalunga ndonga, kumwesa ngwabo ali na nzili ya kunyungilila banu ku bukalu bwasa kutunda ku byuma bya kutanga.—Mako 4:36-39.

• Washukile banu babangi manene, kumwesa mwakakwaselamo banu babangi ku mubila.—Mako 6:41-44.

• Watengwilile mema kupwa binyu ku cilika ca bulo kumwesa ngwabo akalingila banu byuma byabingi mangana balikuwe kuyoya.—Yowano 2:7-11.

Mwasa kuwana bati buyoye bwabubwa buje bwanabwahesela Njambi banu baje bamuzema? Kuli byuma bimunapande kulinga. Mbimbiliya yendeka ngwayo munapande kuwana ‘ngila iya ku mwonyo, co baje baiwana banapu babandondo.’—Mateo 7:14.

Ngila ya mwonyo wa myaka yoshe yapwa ika? Njambi ngwendi: “Yange Kalunga Njambi yeni, uje amilongesa byuma byabibwa, na kumitwamenena mu ngila yaibwa muje mumunapande kuya.” (Isaya 48:17) Kukabangeya eci cinangulo kumikwasa muyoye mwamubwa.

Yesu wendekele ngwendi: “Yange ngila, na busunga, na mwonyo.” (Yowano 14:6) Twasa kushwenya kuyehi na Njambi na kuyoya mwamubwa nga tukulahela busunga bwatulongesele Yesu na kukabangeya mwanja wendi.

Mwasa kuwana bati ngila ya mwonyo wa myaka yoshe? Kuli bulombelo bwabwingi, oloni Yesu, wendekele ngwendi: “Kesi munu woshe anjitumbula  ngwendi, ‘Mwene, Mwene,’ akakobela mu Bumwene bwa mwilu embwe, oloni kubanga baje bakalinga cizango ca Tate wa mwilu.” (Mateo 7:21) Wendekele lalo ngwendi: “Mukabazibukila ku bilinga byabo.” (Mateo 7:16) Mbimbiliya yasa kumikwasa muzibuke bulombelo buje bwapwa bwa busunga.—Yowano 17:17.

Mwasa kushangumuka bati kwenda mu ngila ya mwonyo wa myaka yoshe? Munapande kuzibuka Munu uje wamyanene mwonyo: Wapwa iya? Lizina lyendi ikeye iya? Wafwa bati? Ali na kutulingila bika? Atonda ngwendi tulinge bika? *

Njambi kayongwele ngwendi banu bapange lika, kweha, kulya, na kulela lika binaanga. Twasa kuzibuka Ishamatanga na kupwa babusamba bendi. Tumwesa ngwetu twamuzema nga twononoka mashiko endi. Yesu wendekele ngwendi: “Co mwonyo wa myaka yoshe ukewo ou, ngeci bakuzibuke yobe Njambi umolika wa busunga.”—Yowano 17:3.

Twasa lika kuzibisa Njambi kubwaha nga tutengululako byuma bimo mu kuyoya kwetu. Kulinga ngoco kesi kwakwasi. Oloni kutulingisa twase kuyoya mwamubwa. Nga mushaka kuwana bikumbululo ku bihula bimo hali Njambi, Bakaleho ba Yehova basa kulilongesa neni Mbimbiliya ha simbu imunazituka na kumutambela umushaka. Mwasa kutusonekela kupangesa webusaiti yetu ya www.pr418.com/mck.