Cinangulo ca mu Mbimbiliya: “Kesi mukakateye mu cizemo ca bimbongo, pweni baka-kujauka na byuma bije mulinabyo.”—Vahevelu 13:5.

Matangwa ano kuli byuma byabingi manene bibashaka kukala nabyo banu. Oloni Mbimbiliya ngwayo twasa ‘kujauka na byuma bije bituli nabyo.’ Mu ngila muka?

Kesi muzeme “bimbongo.” Banu basa kulinga byuma byoshe nameme bije byasa kunena bukalu kuli ba busamba babo, naanga yabo, bukangule bwabo nambe kubiisa lizina lyabo mwafwa lika ya ‘kuzema bimbongo.’ (1 Timateo 6:10) Obu bunapu bukalu bwakama manene. Oloni munu uje azema manene bimbongo kasa kujauka nabyo.—Muka-kwambulula 5:10.

Zemeni banu, kesi byuma. Byuma bibakashungwiya kukala nabyo banu byapwa bya seho. Oloni ebi byuma kubyasa kutuzema. Banu lika bakebo basa kulinga ngoco. Kupwa na ‘kabusamba wa busunga.’ kutukwasa tupwe ba kushubuluka mu kuyoya.—Visimo 17:17.

Cinangulo ca mu Mbimbiliya: “Mbunge ya kubwahelela ikangwisa mubila.”—Visimo 17:22.

Ngwe muje bumbanda mubwasa ‘kukangwisila’ mubila, kubwahelela kumikwasa mulikolese nga mubinja. Oloni twasa kupwa bati ba kubwahelela nga tuli na kulifwita na bubezi?

Pweni baka-kukandelela. Nga tusinganyeka lika ha bukalu bwetu, co “simbu yoshe” tuliziba kuyanda. (Visimo 15:15) Oloni Mbimbiliya ngwayo: “Kandeleleniko.” (Kolose 3:15) Lilongeseni kumwesa kukandelela mu buyoye, nambe ku byuma byabindondo lika byabibwa. Nga kabusamba keni amimweswila, kulikuwa kuyongola litangwa mulitoka na kampunzi ka kutonola, kumikwasa mupwe ba kubwahelela.

Kwaseni bakweni. Nameme nga tubabala, tuwana “kujolela kwakama manene mu kwana kutubakana mu kutambula.” (Vilinga 20:35) Nga bakwetu bakandelela ku kulifwita kwetu, tupwa ba kubwahelela na kujeneka kwaka manene mbunge ku bubezi bwetu. Twasa kupwa ba kubwahelela nga tukwasa bakwetu bapwe ba kubwahelela.

Cinangulo ca mu Mbimbiliya: Munapande “kunanguka byuma bije binapu bya seho.”—Filipu 1:10, NWT.

Baka-kulyambata baje kubesi kuwana simbu ya kusimutwiya banasa kwaka bulo bwabo mu bushonde. Baka-kulyambata balinga mwamubwa nga batwameka bulo bwabo kulutwe mwafwa bwapwa bwa seho manene.

Munapande kulingila hamo byuma. Munapande kubwahesa simbu ya kulingila hamo byuma. Mbimbiliya ngwayo: “Banu babali bapwa bababwa kutubakana munu umo.” (Muka-kwambulula 4:9) Mwasa kutelekela hamo byakulya, kweha, kunwako tubinyu, nambe kupashala.

Mweseni ngweni mwazema muka-limbo lyeni. Mbimbiliya ishongangeya baka-kulyambata kulizema na kulisingimika umo na mukwabo. (Efeso 5:28, 33) Kumwesula na nzanzu, kulibumbateya mu cizemo, nambe kwana muka-limbo lyeni bwana bwa bundondo manene kwasa kukanyamesa bulo bweni. Co lalo, baka-kulyambata banapande kulilala lika na munu ibanalyambata nendi.—Vahevelu 13:4.