NAMEME bubi bubalingile bisemi betu ba Adama na Eva bunanene kutsa ku banu boshe, oloni kubwatengulwile biyongola bya Njambi ku banu. Njambi nendeka lwalwingi mu Lijwi lyendi, Mbimbiliya ngwendi biyongola byendi kubyatengulukile.

• ‘Baka-busunga bakakala mu lifuti, co bakayoyamo ku myaka yoshe.’—Myaso 37:29.

• “Shukulu Kalunga Wahakamwa ya Byoshe akanyongesa nzili ya kutsa na kusikumuna misozi ku mesho a munu na munu.”—Isaya 25:8.

• “Citozi wa kukotokela yakafungulula ikeye kutsa.”—1 Kolinte 15:26.

• “Kukukakala kutsa nambe busiwa nambe kulila nambe kukemanga.”—Kujombolola 21:4.

Mu ngila muka omwo Njambi “akanyongesa nzili ya kutsa” nambe kufungulula butsi? Ngwe mutunamwena, Mbimbiliya ngwayo: ‘Baka-busunga . . . bakayoya myaka yoshe.’ Oloni yendeka lalo ngwayo: “Kukwesi umo hano hasi muka-kulinga bya busunga simbu yoshe.” (Muka-kwambulula 7:20) Kuma oku kulumbununa ngwabo akobola banu nameme baje kubashaka kwononoka mashiko endi mu kushaka lika kufungulula kutsa ndi? Embwe. Kakalingi ngoco, mwafwa “Njambi . . . kesi kukwisa.” (Tito 1:2) Akalinga bika mangana ashulisilile biyongola byendi byatangelele banu?

Yehova Njambi wabwahesele ngila yaibwa manene ya kupatwilamo banu ku kutsa omwo watwanene ndando ya kupatula. Mbimbiliya muikendeka ha ndando ya kupatula ikendeka ha fweto inapande ibakafwete mu kufwika mulonga umo. Banu boshe bapwa baka-bubi, co basa kutsa. Mukemwo Mbimbiliya yendeka ngwayo: “Munu kasa kulikula ikeye babenya, ikeye kasa kufweta Njambi ndando ya myonyo wendi, omwo ndando ya mwonyo wa munu yapwa yakama manene. Bije byafweta kubyasa kupwisamo.”—Myaso 49:7, 8.

Munu wa kujeneka kulumbunuka mwatsa, asa lika kufwika bubi bwendi, kasa kulipatula nambe kupatula bakwabo ku bubi bwabo. (Loma 6:7) Kwatondekele munu wa kulumbunuka, wa kujeneka bubi alyane myonyo wendi. Kesi kutsila bubi bwendi, oloni bubi bwetu.—Vahevelu 10:1-4.

Ebi bikebyo byalingile Njambi. Watumine munendi, Yesu, kutunda mwilu na kusemukila hano hasi kupwa munu wa kulumbunuka, wa kujeneka bubi. (1 Petulu 2:22) Yesu wendekele ngwendi “wezile na kwana mwonyo wendi ngeci apatule banu babangi.” (Mako 10:45) Mwatsile, wafungulwile butsi mangana twase kukawana myonyo.—Yowano 3:16.

Bupolofweto bwa mu Mbimbiliya buli na kulishulisilila mwafwa tuli na kuyoya mu “matangwa akukotoka” aje anapu amabi a “kukaluwa.” (2 Timateo 3:1) Matangwa a kukotoka akahwa ha “litangwa lije omwo banu baka-bubi bakabasompa na kubanyongesa.” (2 Petulu 3:3, 7) Oloni banu baje bazema Njambi bakoboka ha simbu eyi ya bukalu, bakabezika ha kukawana “mwonyo wa myaka yoshe.”—Mateo 25:46.

 Banu bamo babangi bakawana mwonyo wa myaka yoshe mubakasanguka. Yesu wasangwile mutsi omwo wendelele nganda ya Naine. Fwile umo watsisile munendi. Yesu “wamuzibilileko mema ku mbunge,” mukemwo wasangwile munendi kubatsi. (Luka 7:11-15) Kapositolo Paulu wasonekele ngwendi: ‘Njili na lilabelelo muli Njambi . . . banu boshe bababwa na aba bababi bakasanguka ku batsi.’ Eli lilabelelo lya busunga limwesa ngwabo Njambi wazema manene banu.—Vilinga 24:15.

Banu babangi basa kukala na lilabelelo lya kukayoya myaka yoshe. Mbimbiliya ngwayo: ‘Baka-busunga bakakala mu lifuti, co bakayoyamo myaka yoshe.’ (Myaso 37:29) Ha simbu ije, bakabwahelela manene mubakalimwena kulishulisilila kwa majwi a kutakamesa asonekele kapositolo Paulu myaka 2,000 kunima. Wasonekele ngwendi: “Obe kutsa, kuhyana kwobe cilikulijo? Obe kutsa, nzili yobe ya kubulumuna ilikulijo?” (1 Kolinte 15:55) Butsi uje wapwa citozi wakama manene akanyonga.