Kapolofweto Mosesa wendekele ngwendi nga twononoka mashiko a Njambi, co Njambi atubezikisa. (Kwituluka mu Mashiko 10:13; 11:27) Kutwesi kwononoka Njambi mwafwa ya kutewa kutwana kashitiko. Oloni bifwa byendi byabibwa bikebyo bikatulingisa tumwononoke, co lalo twamuzema. Ngeci, kutushaka kumuzibisa kubihya ku mbunge. “Cizemo cetu kuli Njambi cilumbunuka ngeci twononoke mashiko endi.”—1 Yowano 5:3.

Oloni bibezikiso muka bituwana nga twononoka Njambi? Tucisimutwiyeniko ha bingila bibali mutubezikilamo nga tumwononoka.

“Yange Kalunga Njambi yeni, uje amilongesa byuma byabibwa na kumitwamenena mu ngila, . . . mumunapande kuya.”—ISAYA 48:17.

Yehova Njambi uje watutangele atuzibuka mwamubwa, co akatutwamenena mu ngila inapande. Nga tushaka ngwetu byuma byakatulongesa Njambi bitukwase kwangula mwamubwa byakulinga, co tunapande kutanda Bisoneka bya Kujela mangana tuzibuke byuma byashaka Njambi na kubilinga.

“Banabezika baje baziba lijwi lya Njambi na kulyononoka.”—LUKA 11:28.

Ano matangwa, banu babangi baje bali na kwononoka Lijwi lya Njambi banapu ba kubwahelela. Cakumwenako, tusimutwiyeni hali munalume umo wa ku Spain uje wakele na kulubala-lubala bwasi na kulinga bakwabo mwamubi, kwambatesela na munakazi wendi. Litangwa limo, watandele bya kukwata mbunge kwa Yosefa muna Yakomba mu bisoneka bya kapolofweto Mosesa. Yosefa bamulandesele mu bundungo na kumwaka mu kamenga kwakujeneka mulonga, oloni watwaleleleho kukwata mbunge, kukala mu kwoloka na bakwabo na kubakonekela. (Kushangumuka capita 37-45) Ou munalume wa ku Spain ngwendi: “Kusinganyekesesa hali Yosefa kunanjikwasa njiwe mbunge na kuzibila bakwetu ngozi na kukwata mbunge. Co njinapu wa kubwahelela.”

Bisoneka bya Kujela bimwesa mutunapande kuyoyela na bakwetu. Mu ñanda inatako, tusimutwiya mubitukwasela bisoneka tuyoye mwamubwa na bakwetu.