Njambi wakulahesele kapolofweto Abilahama ngwendi umo wa batekulwila bendi akanena bibezikiso ku “miyati yoshe ya hasi.” (Kushangumuka 22:18) Ou mutekulwila wa Abilahama wapwile iya?

Myaka ya kweta ku 2000 kunima Njambi wanene Yesu uje wapwile mutekulwila wa Abilahama nzili ya kulinga bikomokeso. Bije bikomokeso byamwesele ngwabyo Yesu ikeye akashulisilila byakulahesele Njambi kuli Abilahama.—Ngalatiya 3:14.

Bikomokeso byalingile Yesu, byakwasele banu bazibuke ngwabo ikeye yakapangesa Njambi mu kukwasa banu ku myaka yoshe. Tumoneni omwo bikomokeso byalingile Yesu bimweselamo bifwa byendi.

Ngozi—Yesu wakangwisile baka-kubinja.

Simbu imo, muka-mbumba walombele Yesu mangana amukangwise. Yesu wamukwatele na kumuleka ngwendi: “Njishaka.” Co haje bene, mbumba yahwile.—Mako 1:40-42.

Kwana—Yesu wanene banu baje batsile njala byakulya.

Yesu kashakele banu batse njala. Bisimbu bimo, walingile bikomokeso byakutumisa makende na bisi mangana banu babangi balye. (Mateo 14:17-21; 15:32-38) Boshe bakutile na kusezaho byakulya byabingi.

Mema ku mbunge—Yesu wasangwile batsi.

Yesu ‘wazibile mema ku mbunge,’ co wasangwile muna fwile. Mwafwa uje mwana ikeye lika wakele na kunyunga uje fwile.—Luka 7:12-15.