Kushwa kusañulu, Ishamatanga yetu nasimutwiya na banu kupangesa tungelo na tupolofweto. Kutundaho, walingisile majwi endi na bikulaheso byendi babisoneke. Njambi natukulahesa ngwendi tukapwa ba kubwahelela kulutwe. Co kuli kumwasa kuwana bikulaheso bya Njambi?

Majwi a Njambi banawasoneka mu Mbimbiliya. (2 Timateo 3:16) Njambi wakwasele bati tupolofweto basoneke majwi endi? (2 Petulu 1:21) Wakele biyongola byendi mu bimbunge byabo, co babisonekele. Cakumwenako, nga muka-mingoso apangesa muka-kusoneka kutusonekela mukanda, uje mukanda tuumona ngwetu unatundu kuli uje muka-mingoso keti kuli muka-kusoneka. Mungila imo lika, nameme Njambi wapangesele banu mu kusoneka Mbimbiliya, oloni Mbimbiliya yapwa lijwi lyendi.

Lijwi lya Njambi lyapwa lya seho manene, co atonda ngwendi banu boshe balitande na kulizibisisa. Ano matangwa, “ebi biñanda byabibwa” bali na kubyambulwila ku “mafuti oshe, ku miyati yoshe na ku bindaka byoshe.” (Kujombolola 14:6) Mbimbiliya ya mutunu nambe mutamba wayo, ili mu bindaka bya kutubakana 3,000, co kukwesi libulu lyeka linalisala hano ha kaye ngwe ikeyo.