Tukalilongesa bya Njambi ku Tupolofweto Bendi
Kusañulu, Njambi wapangesele tupolofweto bendi mu kwetesa mizimbu yendi ku banu. Kuma eyi mizimbu itukwasa tuzibuke bya kulinga mangana tutambule bibezikiso bya Njambi ndi? Eyo. Tumoneni bitwasa kulilongesa ku tupolofweto ba kulongwa batatu.
ABILAHAMA
Njambi kakele na kaangu, co ashaka kubezikisa banu boshe.
Njambi wakulahesele kapolofweto Abilahama ngwendi “muli yobe njikabezikisilamo miyati yoshe.”—Kushangumuka 12:3.
Eyi ñanda itulongesa bika? Njambi watuzema manene, co ashaka kubezikisa banu boshe kwambateselela na banalume, banakazi na banike baje bamwononoka.
MOSESA
Njambi wapwa muka-kutetela, co akabezikisa baje bashaka kumuzibuka.
Njambi Muka-nzili Yoshe wanene Mosesa nzili ya kulinga bikomokeso. Oloni Mosesa walombele Njambi amuleke biyongola byendi, mangana amuzibuke na kumupangela simbu yoshe na kumuzibisa kubwaha. (Kutuuka 33:13) Lilombelo lya Mosesa lyazibisile Njambi kubwaha ku mbunge, ngeci Njambi wamwanene mana a kuzibuka bingila na bifwa byendi. Cakumwenako, Mosesa wazibukile ngwendi Ishamatanga wapwa “Njambi uje washula na kutetela na mema ku mbunge.”—Kutuuka 34:6, 7.
Eyi ñanda itulongesa bika? Njambi ashaka kutubezikisa tubaboshe, banalume na banakazi na banike, nga tulinga mwoshe mutwasela kumuzibuka mwamubwa. Natumwesa mu Bisoneka bya Kujela mutunapande kumulemesela, co lalo namwesa ngwendi ashaka kutubezikisa.
YESU
Ngozi yalingisile Yesu akangwise mishongo yoshe.
Tukalikuwa bibezikiso bya Njambi myaka yoshe, nga tulilongesa byalingile Yesu nebi byalongesele.
Mu Lijwi lya Njambi, muli mizimbu yaingi ije yendeka bya buyoye bwa Yesu na byuma byalongesele. Njambi wanene Yesu nzili ya kulinga bikomokeso byakama byakufwa ngwe kukangwisa tupuputwa, tubebebe, na biyanga. Wasangwile na batsi. Ngeci, Yesu wamwesele byuma byabibwa byakalinga Njambi bije bikakwasa banu boshe. Wendekele byanapande kulinga umo na umo wetu mangana akalikuwe obyo bibezikiso. Wendekele ngwendi: “Mwonyo wa myaka yoshe ukewo ou, ngeci bakuzibuke yobe Njambi umo lika wa busunga, na kuzibuka Yesu Kilistu, uje iwatumine.”—Yowano 17:3.
Yesu wakele na mema ku mbunge na ngozi, co wapwile muka-kutetela. Banalume, banakazi, banike na bakulunu boshe baile kuli ikeye mwafwa walanyele banu boshe ngwendi: “Lilongeseni kuli yange, omwo yange nji muka-lyobwaobwa na kulikehesa mu mbunge, co mukawana kuhwima ku myonyo yeni.” (Mateo 11:29) Nameme banu babangi kubasingimikile banakazi ha simbu ije, Yesu ikeye wasingimikile banakazi na kubazibila ngozi.
Eyi ñanda itulongesa bika? Yesu wazemene manene banu, co natumwesa mutunapande kuzemena bakwetu.
YESU KAPWILE NJAMBI
Mbimbiliya ngwayo ‘kuli yetu kuli Njambi umolika,’ co Yesu Kilistu wapwile muluwa wa Njambi. (1 Kolinte 8:6) Yesu wendekele ngwendi Njambi wapwa wakama kuli ikeye, co ikeye wamutumine hano hasi.—Yowano 11:41, 42; 14:28. *
^ par. 17 Nga mushaka kulilongesa byabingi hali Yesu Kilistu, tandeni mutamba 8 na 9 wa kalibulu ka Ingillishi ka Real Faith—Your Key to a Happy Life kaje kali ha webusaiti ya www.pr418.com.