Bika Byasa Kumilingisa Mukayoye Mwamubwa?
Banu babangi bakulahela ngwabo byuma bimo bije kutwesi kumona byasa kubalingisa bakayoye nambe kujeneka kuyoya mwamubwa kulutwe. Ngeci, bakalingiko byuma bimo bije bibasinganyeka ngwabo bibakwasa kukayoya mwamubwa.
BYUMA MUKA BIBAKULAHELA BANU BABANGI?
KUTAHESA BINGONGONOSI: Banu babangi bakulahela ngwabo mubinakela bingongonosi ha simbu yasemuka munu kumwesa mubukafwila buyoye bwendi kulutwe. Bakehula baka-kutahesa bingongonosi mangana bazibuke bikalingiwa kulutwe na kulingako bimo.
FENG SHUI: Banu bamo bakulahela ngwabo nga batunga njibo yabo mu ngila imo, co byuma bibendela mwamubwa. Lo Wing * uje wakala ku Hong Kong ngwendi: “Munu umo uje azibuka manene bya feng shui, wanjilekele ngwendi nga njaka limanya limo lya kulitila ku mutambela umo wa cintolo cange, co njiwana bimbongo byabingi.”
KULEMESA BAKULU: Banu bamo bakulahela ngwabo nga bazibisa bakulu kubwaha nambe kulemesa tumponya ba kuliseza-seza, co babanyungilila na kubabezikisa. Van uje wakala ku Vietnam wendekele ngwendi: “Njakulahelele ngwange nga njikombelela bakulu, co yange na bana bange tuyoya mwamubwa ha simbu ino na kulutwe.”
KUSEMUKA LALO: Banu babangi bakulahela ngwabo nga munu atsa asemuka lalo mu cifwa ceka, co atwalelelaho kulinga ngoco. Bakulahela ngwabo bali na kuliwana na byuma byabibwa nambe byabibi mwafwa ya buyoye bubayoyele mu cifwa ceka.
Banu babangi kubakulahelele ebi byuma. Oloni anga bakulahela baka-kutaha baka-kumikiya na tupolofweto ba mukuli. Bakulahela ngwabo aba banu basa kubakwasa bazibuke bikalingiwa kulutwe mu kuyoya kwabo.
KUMA EBI BYUMA BIKABAKWASA INDI?
Kuma banu bakulahela ebi byuma banapu bakubwahela, co lalo bakayoya mwamubwa kulutwe ndi?
Tusimutwiyeni hali Hào uje wakala ku Vietnam. Wakulahelele cilongesa ca feng shui, baka-kutaha na bingongonosi na bakulu. Kuma wawanene bukwasi indi? Hào ngwendi: “Mingoso yange kuyendele mwamubwa, njalikobelesele mu mikuli, naanga yange kuyakele mu kwoloka, co njakele mu bishoti byakama manene.”
Qiuming wa ku Taiwan nendi wakulahelele baka-kutahesa bingongonosi, cilongesa ca kusemuka lalo, feng shui, bakulu na kukulahela ngwendi byuma byaliwana nabyo munu banabinonekela cimweja. Munima ya kwilula ebi bilongesa wendekele ngwendi: “Njanangukile ngwange ebi bilongesa na bisemwa bili na kulilwisa, co lalo bitanganesa. Njanangukile lalo ngwange byuma bibakele na kwendeka baka-kutahesa bingongonosi kubyakele na kulishulisilila. Co lalo ha cilongesa ca kusemuka lalo njalihwile ngwange, ‘nga munu kasa kwanuka byuma byalingiwile mu buyoye bwendi bwa kunima asa kutengulula bati byuma mu buyoye bwendi bwabuha?’”
“Njanangukile ngwange ebi bilongesa na bisemwa bili na kulilwisa, co lalo bitanganesa.”—QIUMING wa ku TAIWAN
Ngwe mwa Hào na Qiuming, banu babangi banananguka ngwabo byuma bya kufwa ngwe kukulahela ngwabo byuma byaliwana nabyo munu banabinonekela cimweja, kutahesa bingongonosi, kulemesa bakulu nambe cilongesa ca kusemuka lalo, kubyasa kutukwasa kuzibuka byuma bikalingiwa kulutwe. Kuma oku kulumbununa ngwabo byahi bitwasa kulinga mangana tukayoye mwamubwa kulutwe ndi?
Banu babangi bakasinganyeka ngwabo nga baya ku masikola akama na kukala na bufuko, co bakakala mwamubwa kulutwe. Bukalu muka bubanaliwana nabwo baje banalyangwila kulinga ebi byuma?
^ par. 5 Muno mu ñanda na mu biñanda bikwabo binatako mazina amo banawatengulula.
^ par. 16 Awa majwi ali mu Mbimbiliya ku mukanda wa Ngalatiya 6:7. Majwi ali oku ku mukanda analitombola na cisimo cibakapangesa banu babangi ca kwendeka ngwaco: “Bikuni bya njamba bya kulicabela.”
Hamo Mushaka Lalo Ebi
KAPOSHI KA KUKENGELA
Vaka-kutahetha vingongonothi na vaka-kumikiya vakendeka vuthunga ha vyuma vya kulutwe ndi?
Mwatha kukulahela vyuma vivakendeka ava vanu ndi?
KAPOSHI KA KUKENGELA
Vika Viyendeka Mbimbiliya ha Kuyoya na Kuthsa?
Kuma kuli chuma chimo chije chikatwalelelaho kuyoya nga munu athsa ndi? Kuma twakala na mwonyo uje kuwethi kuthsa ndi? Vathsi vali kuli?
