Myaka 3,500 kunima, Yehova Njambi walekele baje bakele na kumulemesa bibapandele kulinga mangana bakayoye mwamubwa kulutwe. Wabalekele ngwendi: “Njili na kumyana kulyangwila hakati ka mwonyo na kutsa, hakati ka bibezikiso bya Njambi na bisingo, omwo lilu na hasi binapu bukaleho ku litangwa lya lelo. Ngecibene, anguleni mwonyo ngeci mukayoye, yeni na batekulwila beni.”—Kwituluka mu Mashiko 30:19.

Baje banu bapandele kwangula mwamubwa bya kulinga mangana bayoye mwamubwa. Netu tuli na nzili ya kulyangwila bya kulinga. Mbimbiliya inatuleke bitunapande kulinga mangana tukayoye mwamubwa kulutwe. Inendeka ngwayo tunapande ‘kuzema Yehova Njambi yetu na kwononoka lijwi lyendi.’—Kwituluka mu Mashiko 30:20.

LILONGESENI MBIMBILIYA: Mwasa kuzema Yehova nga mulilongesa byendi mu Mbimbiliya. Kulinga ngoco kumikwasa munanguke ngweni Njambi wamizema, co ashaka ngwendi muyoye mwamubwa. Ali na kumilanya ngwendi mulombele kuli ikeye mwafwa wamyaka mbunge. (1 Petulu 5:7) Mbimbiliya yakulahesa ngwayo nga mulinga mwoshe mumwasela kushwenya kuyehi nendi, co ‘ashwenya kuyehi neni.’—Yakomba 4:8.

PANGESENI BIMULI NA KULILONGESA: Kwononoka Lijwi lya Njambi kulumbununa kukabangeya binangulo bili mu Mbimbiliya. Nga mulinga ngoco, ‘co mubezika na kukala mwamubwa mu kuyoya kweni.’—Yoshwa 1:8.