CILONGESA 43
MWASO 90 Litakameseni Umo na Mukwabo
Bika Bitunapande Kulinga Mangana Keti Tuuwasane?
“Iluleni byuma byoshe.”—1 TESA. 5:21.
BILI MUNO MU CILONGESA
Muno mu cilongesa tusimutwiya ha byuma bitunapande kulinga nga tushangumuka kuuwasana omwo tupangela Yehova.
1-2. (a) Bihula muka bibakalihula bangamba ba Yehova bamo? (b) Bika bitusimutwiya muno mu cilongesa?
TUBABOSHE, ipwe banike nambe bakulunu bisimbu bimo tukauwasana. a Acisinganyekeni ha byakumwenako ebi bitatu. Cakulibanga, muka-kwambulula wa mwanike nasa kulihula indi Yehova wamwaka mbunge. Mwafwa ya kukala nebi bisinganyeka, kunasa kumukaluwila kulyangwila kumumbwitika. Camucibali, singanyekeni hali ndolome uje walyangwilile kupangela Yehova ku bwanike kutubakana kutonda cipangi cakama muno mu kaye. Kukapwa muje naanga yendi ikala mu bujene bwa bimbongo, co ashangumuka kuuwasa indi wangwile mwamubwa byakulinga mwapwile mwanike. Camucitatu cinapu ca ndokazi wa kakulukazi uje kesi na nzili ya kupanga. Ou ndokazi nasa kuzeya mwafwa kasa kupanga bipangi byakele na kupanga kunima. Kuma mwalihulaho laja ngweni, ‘Yehova wanjaka mbunge ndi? Kulyana kwange kuli Yehova kunapu kwaseho ndi? Kuma Yehova asa kunjipangesa ndi?’
2 Nga kutuwana bikumbululo ku bihula ebi, likulahelo lyetu linasa kuzeya, co kunasa kutulingisa tulikele kumulemesa. Muno mucilongesa tumona muyasa kutukwasela Mbimbiliya (1) nga tuliziba ngwetu Yehova katuzemene, (2) nga tusinganyeka ngwetu kutwangwile mwamubwa byakulinga (3) nga tuliziba ngwetu Yehova kasa kutupangesa.
BIKA BYASA KUTUKWASA NGA TULI NA KUUWASANA?
3. Bika byasa kutukwasa nga tuli na kuuwasana?
3 Ngila imo yasa kutukwasa nga tuli na kuuwasana inapu kutanda Lijwi lya Njambi mangana tuwane bikumbululo ku bihula bituli nabyo. Nga tulinga ngoco, co tukolesa na ‘kukanyama mu likulahelo’ lyetu.—1 Kori 16:13.
4. Twasa ‘kwilula bati byuma byoshe’? (1 Tesalonika 5:21)
4 Tandeni 1 Tesalonika 5:21. Anukeni ngweni Mbimbiliya ikatushongangeya ‘kwilula byuma byoshe.’ Twasa kulinga bati ngoco? Nga kuli byuma bimo bije kutwesi na kuzibisisa, co tunapande kutanda Mbimbiliya mangana tumone biyendeka ha byuma obyo. Acisingnyekeni hali mukwenje uje aliziba ngwendi kapwile wa seho kuli Yehova. Kuma napande kutwalelelaho kuliziba ngoco ndi? Embwe. Napande ‘kwilula byuma byoshe’ ha kutanda Lijwi lya Njambi mangana azibuke mwakamumwena Yehova.
5. Twasa kuwana bati bikumbululo ku bihula byetu?
5 Nga tutanda Mbimbiliya kunapu lika ngwe Yehova ali na kwendeka kuli yetu. Ngeci tunapande kutanda Mbimbiliya mangana tuwane bukwasi. Tunapande kutanda mikanda ije itukwasa tuwane bikumbululo ku bihula byetu. Twasa kutondesesa ha ñanda ije itushaka kuzibisisa kupangesa bikwata byetu bya kupangesa mu kutondesesa. (Prov 2:3-6) Twasa kulomba Yehova atukwase kuwana cikumbululo ku cihula cituli naco. Tunapande kupangesa binangulo bya mu Mbimbiliya mangana tumone mubitukwasela. Twasa kuwana bukwasi nga tutanda mizimbu ya mu Mbimbiliya ya bangamba ba Yehova ba kulongwa baje baliwanene na bukalu bwa kulifwa nobu bwetu.
6. Biwano bikatukwasa bati mangana tuwane bikumbululo ku bihula byetu?
6 Nga tuya ku biwano, kunapu lika ngwe Yehova ali na kwendeka kuli yetu. Nga tukunguluka simbu yoshe tulikuwa biñanda na bikumbululo bya bandolome na bandokazi bije binasa kupwa bikumbululo ku bihula byetu. (Prov 27:17) Tusimutwiyeni ha byuma byasa kutukwasa tujeneke kuuwasana.
KUMA YEHOVA WAMYAKA MBUNGE NDI?
7. Cihula muka cibakalihula bamo?
7 Kuma mwalihulaho laja ngweni, ‘Yehova wanjaka mbunge ndi?’ Nga muliziba ngweni mu bangoco, munasa kusinganyeka ngweni kumwasa kulikuta busamba na Ishamatanga wa byuma byoshe. Hamo mukemwo mwalizibililile na Mwene Devidi. Wakomokele manene mwazibukile ngwendi Yehova waka banu mbunge. Ngeci wendekele ngwendi: “Obe Yehova, munu napu iyajo mangana umunanguke, muna munu napu iyajo mangana umutolilile?” (Samu 144:3) Kuli kutwasa kuwana cikumbululo ku cihula eci, ‘Kuma Yehova wanjaka mbunge ndi?’
8. Kwesekesa na mukanda wa 1 Samwele 16:6, 7, 10-12, Yehova akamono bika ku banu?
8 Mbimbiliya inatuleke ngwayo Yehova akananguka banu baje bakalizibi ngwe kubapwile ba seho. Cakumwenako, Yehova watumine Samwele aye ku njibo ya Jesi na kukabwabesa umo wa bana bendi kupwa Mwene wa Isalele. Jesi wasanene bana bendi 7 mangana Samwele akubamone, oloni Devidi uje wapwile mwanike kubamusanene. b Nameme ngoco, Yehova wangwile Devidi. (Tandeni 1 Samwele 16:6, 7, 10-12.) Yehova wamwene mbunge ya Devidi, co wazibukile ngwendi Devidi wamuzemene manene.
9. Bika bimikwasa mukulahele ngweni Yehova wamyaka mbunge? (Taleni na cikupulo.)
9 Acisinganyekeni mwanamwesela Yehova ngwendi wamyaka mbunge. Akamyana binangulo bije bimikwasa mu bukalu bumunaliwana nabwo. (Samu 32:8) Oku kumwesa ngwabo amizibuka mwamubwa, co azibuka na byuma bimutonda. (Samu 139:1) Omwo mupangesa binangulo bya Yehova na kulimwena mubimikwasela, mukulahela ngweni Yehova wamyaka mbunge. (1 Mizi 28:9; Bili 17:26, 27) Yehova akamono kulifwita kweni. Akamono bifwa byabibwa bimwakala nabyo, co ashaka kupwa kabusamba keni. (Njele 17:10) Ngeci abwahelela manene nga mulikuta nendi busamba.—1 Iwa 4:19.
‘Nga ushakezeka Yehova, akakutabesa umuwane.’ —1 Mizi 28:9 (Taleni paragirafu 9) c
BIKA BIMUNAPANDE KULINGA NGA MULIZIBA NGWENI KUMWANGWILE MWAMUBWA BYAKULINGA?
10. Omwo tusinganyeka ha byuma bitwangwile kunima, bihula muka bitwasa kulihula?
10 Mu kwita kwa simbu, bamo banasa kuliziba ngwe kubangwile mwamubwa byakulinga kunima. Hamo babyanene cipangi cacibwa nambe kulikela kulinga mingoso imo mangana bapangele mwamubwa Yehova. Hamo kuneti oni simbu kutunda habasezelele obyo byuma na kwangula kupangela Yehova. Banasa kusinganyeka ha bakwabo baje bali na kulikuwa buyoye bwabubwa, co bali na bimbongo byabingi mwafwa bangwile byuma bya kuliseza nebi bibanangula bakebo. Ngeci basa kulihula ngwabo, ‘Kuma njalingile mwamubwa kwangula kupangela Yehova ndi? Indi hamo ngwe njalyangwilile kupangako byeka mangana njiwane bimbongo?’
11. Byuma muka byazeyesele muka-kwimba uje wasonekele mukanda wa Samu 73?
11 Nga muli na bihula bya kulifwa, co nangukeni mwalizibilile muka-kwimba uje wasonekele mukanda Samu 73. Wamwene banu baje kubakele na kupangela Yehova bali na kuyoya mwamubwa. (Samu 73:3-5, 12) Mwakele na kumona banu baje kubakele na kupangela Yehova bayoya mwamubwa, wasinganyekele ngwendi hamo kupangela Yehova kwakele na kumubiisila simbu. ‘Wakele mu bukalu litangwa lyoshe lya mutunu’ mwafwa ebi bisinganyeka byakele na kumuzeyesa. (Samu 73:13, 14) Bika byamukwasele mangana atundise ebi bisingayeka bya kuhenga?
12. Kwesekesa na Samu 73:16-18, bika byakwasele muka-kwimba atundise bisinganyeka bya kuhenga?
12 Tandeni Samu 73:16-18. Ou muka-kwimba waile ku mwela wa kujela wa Njambi. Ou mwela wamukwasele asinganyeke mwamubwa. Wazibukile ngwendi nameme baka-bubi bakele na kulikuwa kuyoya, kubakele na lilabelelo lya byuma bya kulutwe. Kuzibuka ngoco, kwamukanyamesele manene na kumukwasa amone ngwendi walingile mwamubwa kwangula kupangela Yehova. Bika byatundilemo? Watwaleleleleho kupangela Yehova mu kulongwa.—Samu 73:23-28.
13. Bika bimunapande kulinga nga muliziba ngweni kumwangwile mwamubwa byakulinga kunima? (Taleni na cikupulo.)
13 Ngeci mwa muka-kwimba, neni mwasa kubyana bisinganyeka bya kuhenga. Mu ngila muka? Akeni mbunge ku byuma bimuli nabyo, kwambateselela na busamba bweni na Yehova. Co lalo anukeni ngweni baje kubesi na kupangela Yehova kubesi nebi byuma byabibwa. Baje kubesi na kupangela Yehova bakaka manene mbunge ku bipangi byabo mwafwa kubesi na lilabelelo lya byuma bya kulutwe. Oloni yeni Yehova namibezikisa manene ha simbu ino, co lalo namikulahesa byuma byabibwa kulutwe. (Samu 145:16) Anukeni lalo ngweni: Kumwasa kuzibuka mubunesi kufwila buyoye bweni ha simbu ino nameme nga mwangwile kulinga byuma byeka. Baje bakangula kulinga byuma bimo mwafwa ya kuzema manene Yehova na kuzema banu, kubesi kujeneka cuma cacibwa na cimo cahi.
Acisinganyekeni ha bibezikiso byakamyana Yehova kulutwe mu lifuti lyanamikulahesa (Taleni paragirafu 13) d
BIKA BIMUNAPANDE KULINGA NGA MULIZIBA NGWENI YEHOVA KASA KUMIPANGESA
14. Bukalu muka bubali na kuliwana nabwo bamo, co oku kunasa kubalingisa balihule cihula muka?
14 Bangamba ba Yehova bamo kubasa kulinga byabingi mu munga ya Yehova mwafwa ya bukulukazi na kubinja nambe buyanga. Co oku kunasa kubalingisa balimone ngwe keti ba seho kuli Yehova. Banasa kulihula ngwabo, ‘Kuma Yehova acasa kunjipangesa ndi?’
15. Muka-kwimba uje wasonekele mukanda wa Samu 71, wakulahelele byuma muka?
15 Muka-kwimba uje wasonekele mukanda wa Samu 74, waliwanene na bukalu bwa kulifwa. Walombelele ngwendi: “Keti unjiseze nzili yange muihwa.” (Samu 71:9, 18) Nameme ou muka-kwimba wazeyele, wakulahelele ngwendi nga atwalelelaho kupangela Yehova mu kulongwa, co Yehova amukwasa. Ou muka-kwimba walilongesele ngwendi Yehova akabwahelela nga amona banu batwalelelaho kumupangela nameme bali na kuliwana na bukalu.—Samu 37:23-25.
16. Yehova akapangesa tukulukazi mu bingila muka? (Samu 92:12-15)
16 Nga mwakulubala zibukeni ngweni Yehova wamimona kupwa ba seho. Asa kumikwasa mutwaleleleho kumupangela nameme mwakulubala. (Tandeni Samu 92:12-15.) Kutubakana kwaka mbunge ku byuma bije kumwasa kulinga, akeni manene mbunge ku byuma bimwasa kulinga. Cakumwenako, mwasa kukanyamesa bakweni ha mwanja weni waubwa wa kupwa ba kulongwa na kubamwesa ngweni mwabaka mbunge. Mwasa kuleka bakweni mwanamikwasela Yehova ha myaka yaingi imunamupangela, na kubaleka bikulaheso bya mu Mbimbiliya bije bimunabandamena kukamona bilishulisilila. Co lalo keti mwibale ngweni, kwaka kulombelela bakweni kubakwasa manene. (1 Pita 3:12) Nameme byuma bifwe bati, kuli byuma bitwasa kulingila Yehova na bakwetu.
17. Mwafwa bika kutwapandele kulyesekesa ku bakwetu?
17 Nga muliziba ngweni kumwasa kulinga byabingi mu munga ya Yehova, co anukeni ngweni Yehova waka mbunge ku byuma bije bimwasa kulinga. Kumwapandele kwesekesa bimukalingi ku byuma bibakalingi bakweni. Mwafwa bika? Mwafwa Yehova kesi kumyesekesa ku bakweni. (Gala 6:4) Cakumwenako, Maliya wanene Yesu bwana bwakama bwa mazi a lwengo lwalubwa. (Iwano 12:3-5) Oloni fwile wa kahutu walambwile tukoini tubali twa ndando ya kwisi manene. (Luka 21:1-4) Yesu kesekesele aba banakazi babali. Wamwene milambu yabo boshe kupwa ya seho manene. Yehova wamona byuma bitukalingi mwafwa ya likulahelo na cizemo cetu kuli ikeye kupwa bya seho manene, nameme kuli yetu bimoneka ngwe byabindondo.
18. Bika byasa kutukwasa mangana keti tuuwasana? (Taleni lalo cipalo ca “ Mbimbiliya Imikwasa Mangana Keti Muuwasane.”)
18 Simbu imo kukakala byuma bikatulingisa tuuwasane. Oloni ngecilika mutunalilongesela, Mbimbiliya yasa kutukwasa tujeneke kuuwasana. Ngeci lingeni mwoshe mumwasela kuwana bikumbululo ku bihula bimuli nabyo mangana mukale na likulahelo lya kukanyama na kujeneka kuuwasana. Yehova azibuka umo na umo wetu. Akakandelela manene mwafwa ya kulyana kweni, co nakulahesa kukamyana cikandelela kulutwe. Kulaheleni ngweni Yehova wamizema manene, co wamyaka mbunge.
MWASO 111 Byuma Bitulingisa Tubwahelele
a MAJWI ABANALUMBUNUNA: Muno mu cilongesa tusimutwiya ha kuuwasana kuje kukatulingisa tulizibe ngwetu Yehova katwakele mbunge nambe kusinganyeka ngwetu hamo kutwangwile mwamubwa bya kulinga kunima. Kutwesi na kusimutwiya ha kuuwasana kuje kubanendeka mu Mbimbiliya kuje kukamwesa ngwabo munu kesi na likulahelo kuli Yehova na bikulaheso byendi.
b Mbimbiliya kuyendekele myaka yakele nayo Devidi omwo Yehova wamwangwile kupwa Mwene. Oloni cisholoka ngwe wapwile mukwenje.—Taleni Kaposhi ka Kukengela ka September 1, 2011 lipu 29, pala 2.
c KULUMBUNUNA BIKUPULO: Muka-kwambulula wa mwanike ali na kutanda Mbimbiliya mangana azibuke mwali na kulizibila Yehova ha bukalu bwanaliwana nabwo.
d KULUMBUNUNA BIKUPULO: Ndolome ali na kupanga cipangi ca kujelesa mangana awane bimbongo bya kukwasa naanga yendi, co ali na kulimona ngwe ali mu paradaisi.
