Bandolome ha munango bapangele na nzili mwaka wamutunu mu kutunga radio station ya WBBR ha liñanda lya Staten, mu New York. Cakulibanga bajelesele na kubwahesa mutamba ha kutungila njibo ya baka-kupanga. Kutundaho batungile mutungo ukwabo muje mwakele makina. Mubamanesele kutunga bashangumukile kusokezeka makina mangana radio ishangumuke kupanga. Oloni baliwanene na bukalu bwabwingi.

Bandolome bawanene ngwabo kushimbika kaposhi kwapwile kwakukalu manene. Aka kaposhi ka bulaha bwa mamita 91, bapandele kukashimbika mukati ka biti bibali bya bulaha bwa mamita akupwa 61 mangana kakanyame. Mubesekele lwakulibanga bonowele. Oloni kukwapa muje, basele kukashimbika mwafwa bakulahelele Yehova. Calvin Prosser, umo wa baka-kutunga ei radio station wendekele ngwendi: “Ngwe tunasele kushimbika aka kaposhi hakulibanga, ngwe tunalimbi ha binulo na kwendeka ngwetu ‘Taleni bitulinangi!’” Ngeci aba bandolome bashangazalele Yehova ha byuma bibalingile, oloni bukalu bwabo kubwahwile.

Ma radio station apwile amaha ha simbu ei, ngeci kukwapwile kwakwasi kuwana kwa kulanda bya kupangesa. Nameme ngoco bandolome bapangesele bikwata bya kupanga laja bibabanene ku munu umo. Kutubakana kulanda maikrofoni yaiha, bapangesele maikrofoni yakele ku foni ya laja. Butsiki bumo mu February, bandolome bayongwele kweseka awa makina. Ngeci bembile lika Myaso ya Bumwene. Ernest Lowe umo wa baje bandolome bakele na kwimba Myaso ya Bumwene wendekele byuma byalingiwile lije litangwa bije byabajolesele. Wendekele  ngwendi mubakele na kwimba, Lyako Rutherford b uje wakele mu Brooklyn makilomita 25 kutunda hayakele ei radio station, wazibile myaso yabo. Ngeci wabatuminine foni.

Ndolome Rutherford wendekele ngwendi “Eceleni kulinga miyoyo injili na kuziba okwo. Muli na kuzibika ngwe tungatwa baje banalikungulwila hamo!” Bandolome balizibile shwamwa ngeci bazimine makina bwasi-bwasi oloni bakulahelele ngwabo byuma byoshe binabwaha, co basa kushangumuka kupangesa ei radio station.

Lya February 24, 1924, ha simbu ikwakele programu ya seho manene aha ha radio, ndolome Rutherford wendekele ngwendi ei radio station baipangesa mu kulinga cipanga cije cabashikile Mwene Yesu ngwendi balinge. Wendekele ngwendi: “Cilengo cei radio station cinapu kukwasa banu bazibisise mwamubwa Mbimbiliya na kunanguka byuma bilingiwa muno mu simbu yetu.”

Programu yakulibanga yendele mwamubwa. Radio station ya WBBR baipangesele ha myaka 33, mu kwambulula bya Bakaleho ba Yehova.

Mu July 1924, Baka-kulilongesa Mbimbiliya balingile ciwano cakama mu Columbus, ku Ohio. Kwakele bandolome na bandokazi ba kutunda ku mafuti oshe, biñanda babyendekele mu Ciarabic, Ingilishi, Cifurenci, Cigerman, Cigriki, Cihungarian, Ci-italian, Cilithuanian, Chipolishi, Cirussian, Ciscandinavian na Ciukrainian. Mitamba imo yeci ciwano bayakele ha radio ya WBBR, co bandolome balombele baka-kusoneka mizimbu mangana basoneke biñanda bya kutalesa kuli eci ciwano cakeleko ha litangwa na litangwa.

Lyamuciwana July 24, bandolome na bandokazi ba kutubakana 5,000 bapangelele hamo mu kwambulula muzimbu waubwa mu mbongi mucakele eci ciwano. Banene mabulu a kwetu ku 30,000 na kushangumuka bilongesa bya Mbimbiliya byabingi. Kaposhi ka Kukengela katumbwile eli litangwa ngwako “litangwa lya kubwahelela manene aha ha ciwano.”

Lyamucitanu July 25 ha simbu yakele na kwendeka ñanda yendi, ndolome Rutherford watandele mu kusimpa mukanda uje wapayele bakulunu ba bulombelo mwafwa ya byuma byabibi bibakele na kulinga. Wendekele ngwendi bakulunu ba bupolitiki na bakulunu ba bulombelo hamolika na baka-mingoso bali na kubindika banu kulilongesa bya Bumwene bwa Njambi buje bwakapangesa Jehova mu kubezikisa banu.  Wendekele lalo ngwendi aba banalume kubakele na kulinga mwamubwa, mwafwa bakele na kukundwiya munga ya League of Nations na kuitumbula ngwabo ikeyo munga yali na kupangesa Njambi mu kutwamenena banu hano hasi. Baka-kulilongesa Mbimbiliya bapandele kupwa ba kusimpa mangana betese ou muzimbu ku banu.

Kaposhi ka Kukengela kamo kendekele ngwako eci ciwano ca mu Columbus cakanyamesele likulahelo lya bandolome na bandokazi baje bakele na ntwima. Cabakwasele bambulule mu kusimpa nameme bakele na kubalwisa. Leo Claus uje wakele oku ku ciwano, wendekele ngwendi: “Munima yeci ciwano twabwahelele manene na kwambulula ou muzimbu wa kupaya baka-bulombelo.”

Mu October, Baka-kulilongesa Mbimbiliya bashangumukile kwana trakiti ije yakele na muzimbu watandele Ndolome Rutherford wa kupaya bakulunu ba bulombelo bwa makuli. Mu mbongi yaindondo ya Cleveland, Oklahoma, Frank Johnson wamanesele kwana ei trakiti ku banu, co wabandamenene bandolome na bandokazi ha minutu 20 mangana bakumwitule. Walishwekele mwafwa banu balubalele manene mubamumwene ambulula. Co bakele na kumutonda. Ngeci walishwekele mu ceci ije yakele muyehi. Kawanenemo banu, co wasezele matrakiti ha butenda na mu bitwamo byoshe byakelemo. Walingile ngoco bwasi-bwasi mangana keti bamuwanenemo. Co walingile byuma byakulifwa na ku maceci akwabo abali.

Kutundaho, Frank washatukilile ku mutambela kuje kubalishikile kuliwanena na bandolome bendi. Wakalishwekele kunima ya mutungo ubakanwisila bimota mazi oku akenga baje bakele na kumutonda. Baje banalume betile kuyehi nendi, oloni kubamumwene. Baje banalume mubaile, bandolome na bandokazi bakele na kwambulula nabo Frank bezile na kumwitula.

Ndolome umo wendekele ngwendi: “Mutwakele na kutunda omu mu mbongi twetile kuyehi na aje maceci atatu. Twamwene banu bakutubakana 50 banemana hanja ya ceci na ceci. Bamo bakele na kutanda aje matrakiti, bakwaboco bawakwatele ku maboko na kuamwesa balongesi babo. Twalingile bwino kutunda bwasi muje mu mbongi kutewa tukobela mu bukalu. Twakandelele manene kuli Yehova ha kutukwasa mangana tuzibuke mwakwetesela ou muzimbu kwa kujeneka kutukwata.”

Baka-kulilongesa Mbimbiliya ba mu mafuti eka nabo bambululwile mu kusimpa. Cakumwenako, mu northern France, Józef Krett wambululwilile baka-kwija ba kutunda ku Poland baje bakele na kupanga mu mikoti. Bamulombele akendeke ñanda ya mutwe wa “Batsi Ololo Basanguka.” Bandolome na bandokazi mubakele na kulanya banu, kapilistu wa bulombelo bumo walekele banu bendi ngwendi keti bakayeko. Nameme ngoco baje banu kubamutolilile, co baile na kukatolilila kuli ei ñanda. Banu bakutubakana 5,000 baile na kukatolilila ku ñanda kwambateselela na uje kapilistu. Ndolome Krett walombele uje kapilistu emanene byuma byakulahela oloni wabyanene. Munima ya kwendeka ñanda ndolome Krett wanene banu mabulu oshe akele nawo mwafwa wamwene ngwendi banu batondole kuzibuka byabingi ha Lijwi lya Njambi.—Amo 8:11.

Ndolome Claude Brown waile ku Africa mu lifuti lya Ghana mu kwambulula muzimbu waubwa. Banu babangi batolilile ku busunga mwafwa Ndolome Brown wendekele biñanda byabingi na kwana banu mabulu. John Blankson, uje waile ku sikola na kukalilongesa mubukapangela bumbanda nendi watolililile ku ñanda ya ndolome Brown. Munima ya kutolilila kuli ei ñanda, wanangukile ngwendi nawana busunga. John wendekele ngwendi: “Njabwahelele manene munjalilongesele busunga. Ngeci njalekele na bakwetu ku sikola byuma binjalilongesele.”

John walilongesele ngwendi Mbimbiliya kuyendeka ngwayo kwakala binjambi batatu. Ngeci litangwa  limo waile ku ceci imo na kukehula kapilistu cihula kutalesa ku cilongesa ca binjambi batatu. Uje kapilistu walubalele, co washekele John na kumuleka ngwendi: “Keti umuka-Kristu yobe, umuna Liyabolo. Tunda ha!”

Mwelukile ku njibo, John wasonekelele uje kapilistu mukanda wa kumulanya ngwendi bakaliwanene ku mbunga mangana akalumbunune byakulahela kutalesa ku cilongesa ca binjambi batatu. Kapilistu walekele John aye ku ofisi ya mulongesi wakama ha sikola kuje kubakamwihwile indi cili bene wasonekelele kapilistu mukanda.

John wendekele ngwendi: “Eyo njinamusonekelele.”

Mulongesi walekele John asoneke mukanda wa kulomba likonekelo kuli uje kapilistu. Ngeci John wasonekele ngwendi:

“Mwata, mulongesi wange nanjileke ngwendi njisoneke mukanda wa kulomba likonekelo kuli yeni. Co njalibwahesela kulinga ngoco, oloni kubanga nga mulitabela ngweni cili bene mukalongesa biñanda bya makuli.”

Mulongesi walikomokelele, co wehwile ngwendi: “Obe Blankson, bikebyo biunasoneka ebi?”

Blankson wakumbulwile ngwendi: “Eyo mwane. Bikebyo lika binjasa kusoneka ebi.”

Mulongesi wendekele ngwendi: “Bakutundisa sikola nga usoneka byacifweci. Kuwasa kutwalelelaho kukala hano ha sikola nga utwalelelaho kwendeka biñanda bije bilwisa kapilistu uje iili na kukundwiya fulumende.”

Oloni John wendekele ngwendi: “Mwata . . . mumukatulongesa, kuli bilongesa bimo bije kutwesi kuzibisisa oloni mukatutabesa kwihula bihula indi bati?”

Mulongesi wakumbulwile ngwendi: “Ee njikamitabesa kwihula.”

Co John wendekele ngwendi: “Bikebyo binalingiwile na kuli yange. Ou kapilistu nakala na kutulongesa Mbimbiliya, co mukemwo njamwihwile cihula. Nga ikeye nonwa kukumbulula cihula cange, co mwafwa bika njinapande kulomba likonekelo kuli ikeye?”

Blankson kubamutundisele sikola. Co kalombele likonekela kuli uje kapilistu.

Kaposhi ka Kukengela kendekele ha byuma byalingiwile ou mwaka ngwako, “Mwabusunga bene, twasa kwendeka ngwe Devidi uje wendekele ngwendi: ‘Ukanjana nzili ya kulwa nzita.’ (Samu 18:39) Uno mwaka likulahelo lyetu linakanyama manene mwafwa twalimwena mwanatukwasela Mwene Yesu . . . bangamba bendi ba kulongwa banatwalelelaho kwambulula muzimbu waubwa mu kubwahelela.”

Kumamaneselelo ou mwaka bandolome bayongwele kutunga radio station ikwabo. Ngeci bashangumukile cipangi ca kutunga ei radio station mu mbongi ya Chicago mu America. Ei radio station yaiha baitumbwile ngwabo WORD, kulumbununa “lijwi” mu Mbunda. Baitungile mangana baipangese mu kwambulula Lijwi lya Njambi. Ha simbu ei bapangesele makina a nzili aje asele kwetesa muzimbu ku mitambela ya kulako, ya kufwa ngwe ku kunto ya Canada.

Mu 1925 Yehova wakwasele bandolome bazibisise mwamubwa biñanda bili ku mukanda wa Kujombolola 12. Mwafwa ya kuzibisisa kwakuha bamo balikelele kupangela Yehova. Oloni banu babangi babwahelelele mubazibisisile mwamubwa byuma bije byalingiwile mwilu na kumona mubinakundamena banu ba Njambi hano hasi.