Cimbimbi capwile cikolo ca kukobelela mu mutamba wa kujela wa tempele. Kwesekesa na Mbimbiliya ya Bisoneka bya Kaye Kakaha ije ibatuhwile simbu kanda mwaka wa 2023 wete, ‘cimbimbi ca bukobelelo capwile hamo na tempele, capwile makyubiti 20 mu bwihi na makyubiti 120 mu bulaha bwa kuya mwilu.’ (2 Mizi 3:4) Bimbimbiliya bimo binendeka ngwabyo cimbimbi ca bukobelelo capwile ‘makyubiti 120’ mu bulaha bwa kuya mwilu kulumbununa mamita a kupwa 53.

Oloni Mbimbiliya ya Kaye Kakaha, ibapulintile mu 2023 inendeka cimbimbi ca tempele ya Mwene Solomoni ngwayo: ‘Capwile makyubiti 20 mu bulaha bwa kuya mwilu’ nambe ngwetu mamita a kupwa 9. a Tusimutwiyeni ha byuma bya kupwamo binalingisa tutengulule kuzibisisa kwetu.

Bulaha bwa cimbimbi ca bukobelelelo kubabwendekele ku mukanda wa 1 Bimyene 6:3. Oku ku mukanda muka-kusoneka Jelemiya natumbula lika bulaha bwa kuya mukati na mu bwihi, katumbwile bulaha bwa kuya mwilu. Co mu capita inatako nendeka mitamba ya tempele na kuilumbununa mu kushula, kwambateselela na lishali lya mema lya cikubo na matemba a bunengu a kopa na bingunzi bibali bya kopa bije byemanene ku cimbimbi. (1 Bimye 7:15-37) Nga cimbimbi capwile cacilaha manene kutubakana tempele, mwafwa bika Jelemiya kendekele bya bulaha bwaco? Myaka yaingi kunima baka-kutondesesa biñanda bya kunima ba ciJuda basonekele ngwabo, cimbimbi kucapwile cacilaha kutubakana tempele yoshe ya Solomoni.

Baka-kulilongesa bakauwasana indi bibumbe bya tempele byasa kukwata cimbimbi ca makyubiti 120 kuya mu bulaha. Bingunzi na mitungo ya mamanya bya mu simbu ya kunima byapwile byakama kwisi, kwiluco kwapwile kwandondo. Cakumweneko bikolo bya ku tempele mu Ijipiti byapwile byakama kwisi kwilu kwakundondo. Oloni Tempele ya Solomoni kuyapwile ngoco. Baka-kulilongesa bakulahela ngwabo bibumbe bya tempele ku byatubakanene makyubiti 6 nambe mamita 2.7 mu buhewa. Muka-kutondesesa bya mitungo ya kunima Theodor Busink wendekele ngwendi: “Kwesekesa na mpimo ya cibumbe ca ku bukobelelo bwa tempele, cimbimbi kucapwile makyubuti 120 kuya mwilu.”

Cisholoka majwi ali ku mukanda wa 2 Mizimbu 3:4 kubawasononwene mwamubwa. Nameme mu Bimbimbiliya bimo bya kunima ei vesi inamwesa makyubiti “120,” Bimbimbiliya bya kusosonona bimo bije bibakulahela byakufwa ngwe Mbimbiliya ya fifth-century Codex Alexandrinus na ya sixth-century Codex Ambrosianus, inamwesa ‘makyubiti 20.’ Mwafwa bika muka-kusononona walimbenjele na kusoneka “120”? Majwi a “makumi a kupwa likumi” na “makyubiti” akamoneka kulifwa mu Cihebelu. Cisholoka muka-kusosononona wasonekele “makumi a kupwa likumi” kutubakana kusoneka “makyubiti.”

Nameme tukeseka kuzibisisa mwamubwa muyafwililile tempele ya Solomoni, tunapande kwaka manene mbunge ku byuma biimanena ei tempele. Imanena tempele ya kusipilitu. Twabwahelela manene mwafwa Yehova nalanya bangamba bendi boshe mangana bamulemese mu tempele yendi.—Hebe 9:11-14; Kujo 3:12; 7:9-17.