Muzibuka Ndi?
Myaso Yapwile Bati ya Seho mu Simbu ya BaIsalele?
MYASO yapwile ya seho manene mu cisemwa ca baIsalele. Mbimbiliya inatumbula banu baje bakele na kwimba na baje bakele kupangesa bikwata bya kwimbisa. Mu Mbimbiliya muli mikanda ya myaso yaingi. Cakumwenako, muli mukanda wa Bisamu na Mwaso wa Solomoni na Busiwa. Libulu lije lyendeka mubwafwililile buyoye mu simbu ibasonekele Mbimbiliya, lyendekele ngwalyo, Mbimbiliya inamwesa mwamubwa baIsalele mubakele na kupangesela myaso mu bipangi byabo bya ha litangwa na litangwa.
Mubakele na kupangesela myaso ha litangwa na litangwa. BaIsalele bakele na kwimba myaso mu kumwesa mubakele na kulizibila. (Isaya 30:29) Banakazi bakele na kwimba tungoma na myaso ya kubwahelela. Co bakele na kukina nga baswanesa mwene nambe nga maswalale baneluka ku nzita na ha bilika bya kulemesa Yehova. (Maako 11:34; 1 Samwe 18:6, 7; 1 Bimyene 1:39, 40) BaIsalele bakele na kwimba myaso ya busiwa nga munu natsi. (2 Mizi 35:25) Cili bene baIsalele bazemene manene myaso.
Bimyene baIsalele bazemene manene myaso. Mwene Saulu wanene Devidi cipangi ca kwimba myaso ku lipela lyendi. (1 Samwe 16:18, 23) Mu kwita kwa simbu Devidi mwapwile mwene wapangele bikwata bya kwimbisa myaso, co wasonekele myaso yaibwa na kwangula cibunga ca baka-kwimba myaso ku tempele ya Yehova. (2 Mizi 7:6; Amo 6:5) Mwene Solomoni wakele na baka-kwimba babanakazi na banalume ku lipela lyendi.—Ekele 2:8.
BaIsalele bapangesele myaso mu kulemesa Yehova. Cakumwenako, mu tempele mwakele baka-kwimba ba kupwa 4,000. (1 Mizi 23:5) Bakele na kwimba na bingenjo, bisanzi bya mikole, tulyalya na mapembo. (2 Mizi 5:12) Oloni aba baka-kwimba ba bitongwe keti bakebo lika bakele na kulemesa Yehova kupangesa myaso. BaIsalele babangi bakele na kwimba myaso mubakele na kuya ku Jelusalema kukalinga bilika bya kumelesa Yehova. (Samu 120–134) Kwesekesa na bisoneka bya baJuda, baIsalele bakele na kwimba Bisamu a ha cilika ca Paseka.
Na ano matangwa myaso yapwa ya seho ku bangamba ba Yehova. (Jems 5:13) Tukashangazala Yehova nga tumwimbila myaso. (Efeso 5:19) Myaso ikatulingisa tulikwatasane omwo twimbila hamo na bandolome na bandokazi mu kushangazala Yehova. (Kolo 3:16) Co lalo ikatukanyamesa nga tuli mu bishoti. (Bili 16:25) Kwimba myaso yapwa ngila yaibwa itukamwesela ngwetu twakulahela Yehova, co lalo twamuzema.
a BaIsalele bakele na kwimba Bisamu 113 kutwala 118 mu kushangazala Yehova.
