CILONGESA 19
MWASO 22 Bumwene Buli na Kuyula, Tubulomba Bwije!
Bika Bituzibuka ha Ngila Yakasompela Banu Yehova Kulutwe?
“Yehova . . . kashaka ngwendi kukanyonge nambe umo.”—2 PITA 3:9.
BILI MUNO MU CILONGESA
Twakulahela ngwetu Yehova mwakasompa banu kulutwe akalinga ngoco mu ngila inapande ya kusungama.
1. Bika twendekela ngwetu tuli na kuyoya mu simbu ya kulitila manene?
TULI na kuyoya mu simbu ya kulitila! Ha litangwa na litangwa, tuli na kulimwena kulishulisilila kwa bupolofweto buli mu Mbimbiliya. Cakumwenako, tuli na kulimwena ‘mwene wa ku kunto’ na ‘mwene wa ku mbwela’ mubali na kulilwisila mu kushaka kuyula kano kaye. (Ndanye 11:40) Tuli na kulimwena muzimbu waubwa wa Bumwene bwa Njambi oku bawambulula mu kaye koshe, co banu babangi bali na kulyangwila kupangela Yehova. (Isaya 60:22; Mate 24:14) Co lalo tuli na kutambula byakulya byabingi bya ku sipilitu ha “simbu inapande.”—Mate 24:45-47.
2. Twakulahela bika, co bika bitunapande kunanguka?
2 Yehova ali na kutwalelelaho kutukwasa tuzibisise mwamubwa byuma bya seho bije bilingiwa ololo. (Prov 4:18; Ndanye 2:28) Twakulahela ngwetu ha simbu ikakashangumuka kayando kakama, tukazibuka byoshe bitunapande kuzibuka mangana tukolese mu kulongwa na kutwalelelaho kulikwatasana ha simbu ei yaikalu. Oloni tunapande kwanuka ngwetu kuli byuma bimo bilingiwa kulutwe bije kutuzibuka. Muno mu cilongesa tusimutwiya tahi ha byuma binatulingisa tutengulule ku byuma bimo bitwendekele ngwetu bilingiwa kulutwe. Kutundaho, twituluka mu byuma bimo bituzibuka bije bikalingiwa kulutwe na byuma byakalinga Tate yetu wa mwilu.
BYUMA BIJE KUTUZIBUKA
3. Bika bitwendekele kutalesa ku banu baje kubakulahela Yehova, co bika byatulingisile twendeke ngoco?
3 Kunima, twendekele ngwetu kayando kakama mukakashangumuka, kukwesi muka-kujeneka kukulahela akasa kwija ku mutamba wa Yehova na kwoboka Amagidoni. Twendekele ngoco, mwafwa twasinganyekele ngwetu byuma byalingiwile ha simbu ya Libazi bimanena cuma na cuma cilingiwa mu simbu yetu. Cakumwenako, twasinganyekele ngwetu ngecilika mwashokelele Yehova cikolo ca bwato simbu kanda Libazi lishangumuke, alinga byuma bya kulifwa na mu simbu yetu, kumashangumukilo a kayando kakama mangana banu baje kubamukulahelele bajeneke kwoboka.—Mate 24:37-39.
4. Bika bitulingisa twendeke ngwetu byuma byoshe byalingiwile mu simbu ya Nowa kubilishulisilila mu ngila yakama ano matangwa? Lumbununeni.
4 Kuma cuma na cuma calingiwile ha simbu ya Libazi cemanenene cuma na cuma cikalingiwa kulutwe ndi? Embwe. Bika bitulingisa twendeke ngoco? Mwafwa Bisoneka kubyendeka ngoco. a Yesu wesekesele “matangwa a Nowa” ku simbu ya kukalako kwendi. Oloni kendekele ngwendi byuma byoshe byalingiwile ha simbu ije bilishulisilila mu ngila yakama kulutwe. Cakumwenako, kendekele ngwendi kushoka cikolo ca bwato kwemanenene cuma cimo. Oloni oku kukulumbununa ngwabo byahi bitulilongesa ku muzimbu wa Nowa na Libazi.
5. (a) Nowa wamwesele bati ngwendi wakele na likulahelo simbu kanda Libazi lije? (Bahebelu 11:7; 1 Pita 3:20) (b) Cipangi ca kwambulula calingile Nowa cinalifu bati na cipangi ca kwambulula cituli na kulinga ano matangwa?
5 Nowa mwazibile bya muzimbu wamulekele Yehova, wamwesele ngwendi wakele na likulahelo ha kushonga bwato. (Tandeni Bahebelu 11:7; 1 Pita 3:20.) Mu ngila imolika, banu baje baziba muzimbu waubwa wa Bumwene bwa Njambi banapande kupangesa byuma bibalilongesa. (Bili 3:17-20) Pita watumbwile Nowa ngwendi wapwile “muka-kwambulula bya kusungama.” (2 Pita 2:5) Oloni ngwe mutunasimutwiiye mu cilongesa cinahu, kutuzibuka indi Nowa wesekele kwambulwila banu boshe hano hasi simbu kanda Libazi lije. Ano matangwa tuli na kweseka kwambulwila banu boshe bali muno mu kaye, co tuli na kulinga ngoco na ntwima. Oloni nameme tulifwite bati, kutwasa kwambulwila munu na munu ali hano hasi simbu kanda mamaneselelo ete. Bika twendekela ngoco?
6-7. Bika bitulingisa twendeke ngwetu kutwasa kwambulwila banu boshe simbu kanda mamaneselelo eje? Lumbununeni.
6 Tusimutwiyeni ha byuma byendekele Yesu kutalesa ku cipangi cetu ca kwambulula. Wapolofwetele ngwendi muzimbu waubwa bakawambulula “hasi hoshe, mangana upwe bukaleho ku mafuti oshe asinoni mamaneselelo akaija.” (Mateu 24:14) Obu bupolofweto buli na kulishusilila manene ano matangwa kutubakana kunima. Muzimbu wa Bumwene bali na kuwambulula mu bindaka bya kutubakana 1,000. Co lalo webusaiti yetu ya jw.org ili na kulingisa banu babangi bazibe muzimbu waubwa wa Bumwene bwa Njambi.
7 Nameme ngoco, Yesu walekele lalo bandongesi bendi ngwendi ‘kubakamanesa kuzenguluka mu binganda byoshe’ nambe kwambulwila banu boshe simbu kanda eje. (Mate 10:23; 25:31-33) Majwi a Yesu alishulisilila na mu matangwa etu. Kuli banu babangi bali mu mitambela mubanemika cipangi cetu ca kwambulula. Kutundaho, banu babangi bali na kusemuka ha munutu na munutu. Tuli na kulinga mwoshe mutwasela mangana twambulwile “baka-mafuti oshe na miyati yoshe na bindaka byoshe” muzimbu waubwa. (Kujo 14:6) Oloni kutwasa kwambulwila munu na munu ali hano hasi simbu kanda mamaneselelo eje.
8. Twasa kulihula cihula muka kutalesa ku ngila yakasompelamo banu Yehova kulutwe? (Taleni na bikupulo.)
8 Oloni tunasa kulihula ngwetu: Batico baje kubawana simbu ya kutolilila ku muzimbu waubwa simbu kanda kayando kakama kashangumuke? Yehova na Munendi yanangula, bakasompa bati aba banu? (Iwano 5:19, 22, 27; Bili 17:31) Mukanda hanemana cilongesa cetu ngwawo Yehova “kashaka ngwendi kukanyonge nambe umo.” Ashaka ngwendi “boshe batenguluke.” (2 Pita 3:9; 1 Timo 2:4) Nameme tuzibuka ebi byuma, Yehova kanda atuleke mwakasompela banu baje kubazibile muzimbu waubwa. Co lalo keti ngwabo napande kutuleka byuma byoshe byanalingi nambe byanayongola kulinga.
Yehova akalinga bika ku banu baje kubazibile muzimbu waubwa simbu kanda kayando kakama kashangumuke? (Taleni paragirafu 8) c
9. Bika byanatusholwela Yehova mu Mbimbiliya?
9 Kwitila mu Lijwi lyendi, Yehova natuleke byuma bimo byakalinga. Cakumwenako, Mbimbiliya yatuleke ngwayo Yehova akasangula “baka-kujeneka kusungama,” kulumbununa banu baje kubazibile muzimbu waubwa mangana batengulule futisi yabo yaibi. (Bili 24:15; Luka 23:42, 43) Oku kwasa kutulingisa tulihule bihula bikwabo lalo.
10. Bihula muka bikwabo bitwasa kulihula?
10 Kuma boshe bakatsa ha simbu ya kayando kakama bakanyonga-kunyongelela kwa kujeneka kubasangula ndi? Bisoneka binamwesa mwamubwa ngwabyo banu baje bali na kulwisa Yehova, baje bakanyongesa na maswalale bendi ha nzita ya Amagidoni kubakasanguka. (2 Tesa 1:6-10) Oloni batico banu beka baje hamo bakatsa ha simbu ya kayando kakama mwafwa ya kubinja, bukulukazi nambe kutsila mu monde nambe kubatsiya ku bakwabo banu? (Ekele 9:11; Zaka 14:13) Kuma bamo babo nabo bakapwa hakati ka “baka-kujeneka kusungama” baje bakasanguka mu kaye kakaha ndi? Kutuzibuka.
BITUZIBUKA
11. Bika bikalingisa Yehova asompe banu ha nzita ya Amagidoni?
11 Kuli byuma byabingi bituzibuka bije bilingiwa kulutwe. Cakumwenako, tuzibuka ngwetu ha Amagidoni, banu bakabasompa kwesekesa nomu mubanalingila bandolome ba Kristu. (Mate 25:40) Baje balingile mwamubwa bandolome ba Kristu bakabasompa kupwa bimanga. Tuzibuka lalo ngwetu baka-Kristu ba kubwabesa bamo bakakala hano hasi kayando kakama mukakashangumuka, co bakaya mwilu kumamaneselelo a kayando kakama simbu kanda nzita ya Amagidoni ishangumuke. Omwo bandolome ba Kristu bacikakala hano hasi, banu bamo ba bimbunge byabibwa basa kukalikwatasana nabo mu cipangi cibali na kulinga na kubakwasa. (Mate 25:31, 32; Kujo 12:17) Kuzibuka ebi byuma kunapu bati kwa seho?
12-13. Bika bibanasa kukalinga bamo munima ya kunyongesa “Babiloni Wakama”? (Taleni na bikupulo.)
12 Nameme mukakashangumuka kayando kakama, baje bakalimwena mubakanyongesa “Babiloni Wakama” bakanuka ngwabo Bakaleho ba Yehova banakala na kwambulula byei ñanda ha simbu yailaha. Kuma bamo bakalimwena mubakanyongesa “Babiloni Wakama” bakatengulula biyongola byabo na kukulahela Yehova ndi?—Kujo 17:5; Ezeki 33:33.
13 Byuma bikalingiwa binasa kulifwa nebi byalingiwile mu Ijipiti mu simbu ya Mosesa. Anukeni ngweni “mbunga yakama ya banu” batundile hamo na baIsalele mubatundile mu Ijipiti. Bamo babo hamo bashangumukile kukulahela Yehova mubamwene kulishulisilila kwa bihiso 10 byendekele Mosesa ngwendi bizila baka-Ijipiti. (Kutu 12:38) Nga byuma bya kulifwa bikalingiwa munima ya kunyongesa Babiloni Wakama, kuma tunapande kukasinganyeka ngwetu banu kubapandele kulikwatasana netu mwafwa ya kunanguka ngwabo mamaneselelo ali muyehi ndi? Embwe, kutwapandele kukasinganyeka ngoco. Tushaka kupwa ngwe Tate yetu wa mwilu uje wapwa ‘Njambi muka-kutetela na mema ku mbunge, uje kesi kulubala bwasi, co wakala manene na cizemo cije kucesi kutenguluka, na busunga.’ b—Kutu 34:6.
Banu bamo baje bakalimwena mubakanyongesa “Babiloni Wakama” bakanuka ngwabo Bakaleho ba Yehova banakala na kwambulula byei ñanda ha simbu yailaha (Taleni paragirafu 12-13) d
14-15. Kuma kuyoya kwa munu kwa myaka yoshe kulutwe kunemana ha simbu yatsa nambe ku mutambela kwakala ndi? Lumbununeni. (Samu 33:4, 5)
14 Simbu imo bandolome na bandokazi basa kwendeka ngwabo, cinesi kubwaha nga kabushoko kabo atsa simbu kanda kayando kakama kashangumuke mangana ase kukasanguka. Nga bendeka ngoco, bamwesa ngwabo bazema babushoko bwabo. Oloni kuyoya myaka yoshe kulutwe kukwemanene ha simbu yatsa munu. Yehova wapwa Lyaako wa kulumbunuka, co simbu yoshe akasompo mu ngila ya kusungama. (Tandeni Samu 33:4, 5.) Twakulahela ngwetu “Lyaako wa lifuti-libu lyoshe” akalinga byabibwa.—Gene 18:25.
15 Kunapande lalo kwendeka ngwetu kuyoya kwa myaka yoshe kukwemanene ha mutambela kwakala munu. Yehova kasa kusompa banu babangi kupwa “bimembe” mwafwa ya kukala ku mitambela kuje kanda bazibeho muzimbu wa Bumwene. (Mate 25:46) Yehova uje wapwa Lyaako wa kusungama wa hasi hoshe waka manene banu mbunge kutubakana mutukalingila yetu. Kutuzibuka mwakalingilamo byuma Yehova ha simbu ya kayando kakama. Hamo banu bamo bakalilongesa byendi, kumukulahela na kulyangwila kukala ku mutamba wendi, mubakalimwena mwakajeleselamo lizina lyendi hakati ka banu.—Ezeki 38:16.
Mukakashangumuka kayando kakama, . . . kuma bamo baje bakalimwena byuma bikalingiwa ha simbu oyo bakatengulula bimbunge byabo ndi?
16. Bika bituzibuka hali Yehova? (Taleni na cikupulo.)
16 Kwitila mu kulilongesa Mbimbiliya twalimwena ngwetu Yehova wamona kuyoya kwa banu kupwa kwa seho manene. Wanene kuyoya kwa Munendi mangana tubaboshe twase ku kayoya myaka yoshe. (Iwano 3:16) Tubaboshe twalimwena ngwetu Yehova watuzema manene. (Isaya 49:15) Azibuka umo na umo wetu ha lizina. Atuzibuka mwamubwa, co nameme nga tutsa asa kutusangula na kutwilwisila bisinganyeka byetu. (Mate 10:29-31) Twakulahela ngwetu Tate yetu wa mwilu akasompa mwamubwa banu mwafwa wakala na mana, wapwa wa kusungama, co lalo muka-kutetela.—Jems 2:13.
Twakulahela ngwetu Tate yetu wa mwilu akasompa mwamubwa banu mwafwa wakala na mana, wapwa wa kusungama, co lalo muka-kutetela (Taleni paragirafu 16)
17. Bika bitusimutwiya mu cilongesa cinatako?
17 Kutengulula kukuzibisisa kwetu mu ñanda ei kunapande kutushongangeya manene kupanga na nzili mu cipangi ca kwambulula. Bika bitulingisa twendeke ngoco? Bika bikatulingisa tutwaleleleho kwambulula muzimbu waubwa kwa kujeneka kulikela? Tuwana bikumbululo ku bihula ebi mu cilongesa cinatako.
MWASO 76 Mukalizibi Bati?
a Nga mushaka kuzibuka byalingisile kukale oku kutenguluka, taleni cilongesa ca mutwe wa “Ki mo ne U Latezi” mu Kaposhi ka Kukengela ka Silozi, ha lipu 7-11.
b Munima ya kunyongesa Babiloni Wakama, bangamba ba Yehova boshe bakabeseka omwo Gogi wa Magogi akabalwisa. Boshe baje bakalikwatasana na banu ba Njambi munima ya kunyongesa Babiloni Wakama nabo bakabeseka.
c KULUMBUNUNA BIKUPULO: Bikupulo bitatu bimwesa byuma binasa kulingisa banu bamo bajeneke kuziba muzimbu waubwa nameme tuli na kuwambulula mu kaye koshe: (1) Munakazi uje ali na kuyoya ku mutambela kuje kwalisala bulombelo buje buli na kwonowesa banu kuziba muzimbu waubwa, (2) Baka-kulyambata baje bali ku mutambela kuje bifulumende byalisala bili na kunena bushonde na kwonowesa banu kutolilila muzimbu waubwa, (3) na munalume uje ali ku mwela wa kulyala manene uje umwonowesa kutambula muzimbu waubwa.
d KULUMBUNUNA BIKUPULO: Mumbanda uje walikelele kupangela Yehova ali na kwanuka byalilongesele bya kunyonga kwa “Babiloni Wakama.” Alyangwila kupangela lalo Yehova na kwiluka kuli bisemi bendi baje bapwa Bakaleho. Nga byuma bya cifweci bilingiwa, tushaka kutembwinina Tate yetu wa mwilu uje wakala na ngozi, co lalo muka-kutetela. Kutundaho, tubwahelela mwafwa munu uje nalingile bubi neluka.
