CILONGESA 20
MWASO 67 “Ambulula Lijwi”
Cizemo Cinapande Kumilingisa Mutwaleleleho Kwambulula!
“Muzimbu waubwa banapande tahi kuwambulula mu mafuti oshe.”—MAKI 13:10.
BILI MUNO MU CILONGESA
Tumona cizemo mucasa kutulingisila tupange cipangi ca kwambulula na mbunge yetu yoshe.
1. Bika bitwalilongesele ha ciwano ca mwaka ca 2023?
HA CIWANO ca mwaka mu 2023, a twazibile kutenguluka kumo ha byuma bitwakulahela na mitambi yaibwa kutalesa ku cipangi cetu ca kwambulula. Cakumwenako, twalilongesele ngwetu banu bamo hamo bakabezika kulikwatasana na banu ba Yehova nameme munima ya kunyonga kwa Babiloni Wakama. Twatambwile lalo mutambi uje wamwesele ngwawo kushangumuka mu ngonde ya November 2023, baka-kwambulula kubetesa-etesa bipangi byabo byoshe bya mu lihya. Kuma oku kutenguluka kumwesa ngwabo hano cipangi cetu ca kwambulula keti ca seho manene ndi? Embwe!
2. Cipangi cetu ca kwambulula cili na kupwa bati ca seho manene mwoshe mulikila litangwa? (Maki 13:10)
2 Cipangi cetu ca kwambulula cili na kupwa ca seho manene mwoshe mulili na kukila litangwa. Mwafwa bika? Mwafwa mamaneselelo ali muyehi, co simbu inasalako yaindondo. Tusimutwiyeniko ha byuma byendekele Yesu ha cipangi ca kwambulula mu matangwa a mamaneselelo. (Tandeni Maki 13:10.) Kwesekesa na mukanda wa Mateu, Yesu wendekele ngwendi muzimbu waubwa bakawambulula hasi hoshe simbu kanda “mamaneselelo” aije. (Mate 24:14) Lijwi lya mamaneselelo linatalesa ku kunyonga kwa kano kaye kakabi ka Satana. Yehova nabwahesa laja “litangwa nambe simbu” ibilingiwa ebi byuma. (Mate 24:36; 25:13; Bili 1:7) Litangwa na litangwa lili na kutushwenyesa ku simbu ei. (Loma 13:11) Tunapande kutwalelelaho kwambulula, kweta noho hawezila mamaneselelo.
3. Bika bikatulingisa twambulule?
3 Omwo tusinganyekesesa ha cipangi ca kwambulula, tulihuleni eci cihula: Bika bitukambulwila muzimbu waubwa? Tukambulula mwafwa Cizemo cikeco cikatulingisa ngoco. Mutukambulula tukamwesa ngwetu twazema muzimbu waubwa na bakwetu banu. Maneneni, kulinga ngoco kumwesa ngwabo twazema Yehova na lizina lyendi. Tusimutwiyeniko ha cimo na cimo cebi byuma.
TUKAMBULULA MWAFWA TWAZEMA MUZIMBU WAUBWA
4. Tukalingi bati nga twatambula muzimbu waubwa?
4 Kuma mucanuka mumwalizibilile mumwatambwile muzimbu umo waubwa ndi? Cakumwenako, hamo kusemuka kwa mbututu mu naanga nambe kuwana cipangi cimwakele na kutonda. Tukulahela mwabwahelelele manene, co mwashakele kulekako baka-naanga yeni na babusamba beni. Kuma omu mukemwo mumwalingilile mumwazibile muzimbu waubwa wa Bumwene bwa Njambi, uje unapu muzimbu waubwa manene kutubakana mizimbu yoshe ndi?
5. Mwalizibile bati mumwalilongesele busunga buli mu Lijwi lya Njambi? (Taleni na bikupulo.)
5 Acisinganyekeni mumwalizibilile, mumwazibile busunga buli mu Lijwi lya Njambi lwakulibanga. Mwanangukile ngweni Ishweni wa mwilu wamizema, co ashaka ngwendi mukale mu naanga ya bangamba bendi. Mwalilongesele lalo ngweni nakulahesa kukamanesa tuyando twoshe. Kutundaho lalo, mu kaye kakaha mukamona babusamba na babushoko bweni baje banatsi na kukalimwena byuma bikwabo byabingi. (Maki 10:29, 30; Iwano 5:28, 29; Loma 8:38, 39; Kujo 21:3, 4) Byuma bimwalilongesele byamyetele ku mbunge. (Luka 24:32) Mwazemene byuma bimwalilongesele, co mwashakele kubilekako na bakweni!—Esekeseni Njelemiya 20:9.
Mutwalilongesele busunga buli mu Mbimbiliya, twabwahelelele manene, co twashakele kulekako na bakwetu bitunalilongesa! (Taleni paragirafu 5)
6. Bika bimunalilongesa ku byuma byanaliwana nabyo ndolome Ernest na ndokazi Rose?
6 Tusimutwiyeniko ha cakumwenako eci: Ndolome wa lizina lya Ernest b wakele na myaka ya kweta ku 10, baishe mubatokele. Ou ndolome ngwendi: “Njalihwile ngwange: ‘Banai mwilu ndi? Indi hamo banatsi-kutsililila?’ Njakele na kuliziba busiwa munjakele na kumona bakwetu banike baje bacikele na baishabo.” Ha bisimbu byabingi, Ernest wakele na kuya ku bihilo. Co wakele na kutsikama ha mbumbo ya baishe na kulombela ngwendi: “Njikulomba Njambi, njishaka kuzibuka kubali batate.” Munima ya myaka ya kweta ku 17 kutunda habatsililile baishe, Ernest washangumukile kulilongesa Mbimbiliya. Wabwahelelele manene mwazibukile ngwendi batsi nacimo cahi cibazibuka mwafwa kunapu ngwe banalala tulo twakama, co lalo Mbimbiliya imwesa ngwayo batsi bakasanguka. (Ekele 9:5, 10; Bili 24:15) Wawanene bikumbululo ku bihula byalihwile ha simbu yailaha! Ernest wabwahelelele manene mwafwa ya busunga bwakele na kulilongesa mu Mbimbiliya. Munakazi wendi Rose nendi washangumukile kulilongesa Mbimbiliya, co nendi wazemene byakele na kulilongesa. Mu 1978, boshe mu bubali bwabo babambwitikile. Bambulwilile na ntwima baka-naanga yabo, babusamba, na boshe baje bashakele kutolilila ku muzimbu waubwa. Co ndolome Ernest na ndokazi Rose banakwasa banu ba kutubakana 70 kulilongesa bya Yehova na kubambwitika.
7. Bika bitulinga nga twazema busunga buli mu Mbimbiliya? (Luka 6:45)
7 Kuzema busunga butunalilongesa mu Mbimbiliya kutulingisa tubulekeko na bakwetu. (Tandeni Luka 6:45.) Tuliziba ngwe mubalizibilile bandongesi ba Yesu bakulibanga baje bendekele ngwabo: “Kutwasa kulikela kwendeka byuma bitunalimwena, nebi bitunalizibila.” (Bili 4:20) Twazema manene busunga, co tushaka kulinga mwoshe mutwasela kubulekako bakwetu boshe nga citaba.
TUKAMBULULA MWAFWA TWAZEMA BANU
8. Bika binapande kutushongangeya twambulwile bakwetu muzimbu waubwa? (Taleni cipalo ca “ Zemeni Banu, Co Mubapwisa Bandongesi.”) (Taleni na cikupulo.)
8 Ngwe mwa Yehova na Munendi Yesu, netu twazema banu. (Prov 8:31; Iwano 3:16) Tukazibila manene mema ku mbunge baje ‘kubesi na Njambi,’ co ‘kubesi na lilabelelo.’ (Efeso 2:12) Banapu lika ngwe baje banawila mu bwina bwa kuloba, co yetu tuli na mukole utwasa kupangesa mu kubatundisamo, kulumbununa muzimbu waubwa wa Bumwene bwa Njambi. Mwafwa ya kubazema na kubazibila mema ku mbunge, tushaka kweseka mwoshe mutwasela kubambulwila muzimbu waubwa. Ou muzimbu wasa kubakwasa kukala na lilabelelo, kubakwasa kupwa ba kubwahelela nameme ha simbu ino na kubakwasa base kukawana “kuyoya kwa busunga,” kuje kunapu kuyoya kwa myaka yoshe kulutwe mu kaye kakaha.—1 Timo 6:19.
Kuzema banu na kubazibila mema ku mbunge kutulingisa tulinge mwoshe mutwasela kubambulwila muzimbu waubwa (Taleni paragirafu 8)
9. Byuma muka bikalingiwa kulutwe bituli na kunangula banu, co mwafwa bika? (Ezekiyele 33:7, 8)
9 Kuzema banu lalo kuli na kutulingisa tunangule bakwetu ngwetu mamaneselelo a kano kaye kakabi ali muyehi. (Tandeni Ezekiyele 33:7, 8.) Tukazibila mema ku mbunge bakwetu batwatunga nabo na babushoko bwetu baje kubesi na kupangela Yehova. Banu babangi bali na kuliyoyela ngoco kwa kujeneka kwaka mana ku byuma bili na kwija kulutwe, kulumbununa “kayando kakama kaje kanda kakaleko kutunda habatangelele kaye kwa kweta na lelo lino, co lalo kukakakalako nawa.” (Mate 24:21) Tushaka ngwetu bazibuke bikalingiwa ha simbu oyo ya kusompa. Cakulibanga, bulombelo bwa makuli bakabunyongesa. Kutundaho, kano kaye kakabi bakakanyongesa ha nzita ya Amagidoni. (Kujo 16:14, 16; 17:16, 17; 19:11, 19, 20) Tulomba ngwetu Yehova akwase banu babangi batolilile ku byuma bitubaleka na kulikwatasana netu mu kumulemesa. Batico baje kubatolilila, kwambateselela na babushoko bwetu?
10. Mwafwa bika tunapande kutwalelelaho kuleka banu byuma bilingiwa kulutwe?
10 Ngwe mutunamwena mu cilongesa cinahu, hamo Yehova akobola baje bakatengulula biyongola byabo mubakamona kunyonga kwa Babiloni Wakama. Mukemwo kunapu kwa seho manene ha simbu ino bene kunangula banu ha byuma bilingiwa kulutwe. Anukeni ngweni byuma bitubaleka ha simbu ino byasa kukabanukisako bimo kulutwe. (Esekeseni Ezekiyele 33:33.) Hamo bakanuka byuma bimo bitwabanangwile bije bikabalingisa bakalikwatasane netu mu kulemesa Yehova simbu kanda anyongese kano kaye. Ngwe muka-kunyunga kamenga mu Filipi uje watengulukile munima ya “lindunduma lyakama” lyakeleko, hamo bamo baje kubesi na kutambula muzimbu utuli na kwambulula ha simbu ino bakatenguluka mubakanyongesa Babiloni Wakama.—Bili 16:25-34.
TUKAMBULULA MWAFWA TWAZEMA YEHOVA NA LIZINA LYENDI
11. Twasa kwana bati Yehova bumpau, kasingimiko na nzili? (Kujombolola 4:11) (Taleni na bikupulo.)
11 Cuma cakama manene cikatulingisa twambulule muzimbu waubwa cinapu kuzema Yehova Njambi na lizina lyendi lije lyapwa lya kujela. Twamona cipangi ca kwambulula kupwa ngila imo ya kushangazalelamo Njambi yetu itwazema. (Tandeni Kujombolola 4:11.) Tutaba na mbunge yetu yoshe ngwetu, Yehova Njambi nafwila kutambula bumpau na kasingimiko na nzili. Tumwana bumpau na kasingimiko nga tukwasa bakwetu bakulahele ngwabo ikeye watangele byuma byoshe, co ngwe ikeye kwahi, ngwe tubahi. Tumwana nzili nga tupangesa simbu yetu na byuma byoshe bituli nabyo mangana tulinge mwoshe mutwasela kupanga cipangi ca kwambulula. (Mate 6:33; Luka 13:24; Kolo 3:23) Twazema kulekako bakwetu bya Njambi yetu itwazema. Twashaka lalo kubaleka bya lizina lya Njambi nebi bililumbununa. Mwafwa bika?
Nga tupangesa simbu yetu, twana Yehova nzili yetu na byuma byeka bituli nabyo mu kulinga mwoshe mutwasela kupanga cipangi ca kwambulula (Taleni paragirafu 11)
12. Twasa kujelesa bati lizina lya Yehova omwo twambulula?
12 Kuzema Yehova kukatulingisa tushangazale lizina lyendi. (Mate 6:9) Netu tushaka kukwasa bakwetu bamone ngwabo byuma byanendeka Satana hali Yehova bya makuli. (Gene 3:1-5; Yombi 2:4; Iwano 8:44) Omwo twambulula, tushaka kwimanena Yehova na kwendeka busunga hali ikeye. Tushaka banu boshe bazibuke ngwabo cizemo cikeco cifwa cakama manene cakala naco, co lalo ciyulo cendi capwa ca kusungama. Kutundaho, Bumwene bwendi ololo bumanesa tuyando twoshe na kunena kwoloka mu kaye koshe. (Samu 37:10, 11, 29; 1 Iwa 4:8) Nga twimanena Yehova omwo twambulula, co tujelesa lizina lyendi. Tupwa ba kubwahelela, mwafwa tulinga bitunapande kulinga ha kupwa Bakaleho ba Yehova. Mu ngila muka?
13. Mwafwa bika tukalizibi kubezika kutusana ngwabo tu Bakaleho ba Yehova? (Isaya 43:10-12)
13 Yehova natupwisa “bakaleho” bendi. (Tandeni Isaya 43:10-12.) Myaka imo kunima, mukanda umo watundile ku Cibunga ca Kutwamenena wendekele ngwawo: “Kubezika kwakama manene kwanasa kuwana munu kunapu kumutumbula ngwabo Mukaleho wa Yehova.” c Mwafwa bika? Tusimutwiyeniko ha cakumwenako cimo. Lingeni ngwe banamikutiiya ñanda, co mutonda munu wa kumimanenenako mu kwana bukaleho buje bumwesa ngwabwo obyo byuma keti bya busunga. Munu wa kufwa bati imwasa kushaka ngweni amimanene? Twakulahela mutonda munu imuzibuka, co lalo imwakulahela, uje ali na futisi yaibwa, co banu basa kumukulahela. Yehova mwanatwangula kupwa Bakaleho bendi namwesa ngwendi atuzibuka mwamubwa, co lalo nakulahela ngwendi twana bukaleho buje bumwesa ngwabwo ikeye lika Njambi wa busunga. Tuli na kuliziba kubezika kupwa Bakaleho bendi, co tushaka kulinga mwoshe mutwasela kuleka banu bya lizina lyendi na kubakwasa bajeneke kukulahela byuma bibanamubangeya. Nga tulinga ngoco, tumwesa ngwetu tunapu bene Bakaleho ba Yehova!—Samu 83:18; Loma 10:13-15.
TUTWALELELAHO KWAMBULULA KWETA NA KU SHONGO
14. Byuma muka byabibwa bilingiwa ololo?
14 Twabwahelela manene kuzibuka byuma bilingiwa ololo! Twakulahela ngwetu Yehova atubezikisa, co banu babangi hamo batambula busunga na kulikwatasana netu simbu kanda kayando kakama kashangumuke. Twabwahelela lalo kuzibuka ngwetu nameme ha simbu ya kayando kakama, ije ikapwa simbu yaikalu manene, banu babangi basa kukecela kulikwatasana na kaye ka Satana kaje kakanyonga na kulikwatasana netu mu kushangazala Yehova!—Bili 13:48.
15-16. Bika bitunapande kutwalelelaho kulinga, co lalo ha simbu ya kupwa hali?
15 Oloni ha simbu ino, kuli cipangi ca seho citunapande kulinga ca kwambulula muzimbu waubwa wa Bumwene bwa Njambi mu kaye koshe cije kutukelukila lalo. Co lalo ha simbu ya kulifwa, tunapande kunangula banu ha byuma bilingiwa ololo. Banu banapande kuzibuka ngwabo kano kaye ololo kanyonga, co kunasala lika simbu yaindondo. Co ha simbu oyo ya kusompa, bakanuka ngwabo muzimbu utwakele na kwambulula watundile kuli Yehova Njambi.—Ezeki 38:23.
16 Bika bitunayongola kulinga? Kuzema muzimbu waubwa, kuzema banu na kuzema Yehova na lizina lyendi kuje kunapu kwa seho manene kutulingisa tutwaleleleho kumona cipangi ca kwambulula kupwa ca seho na kutwaleleleho kucilinga na ntwima kweta noho hakendekela Yehova ngwendi, “Kunahu!”
MWASO 54 “Ngila Eyi”
a TCiwano ca mwaka cinakeleko lya October 7, 2023, mu Njibo ya Biwano Byakama ya Newburgh ya Bakaleho ba Yehova mu New York, mu America. Mutamba wakulibanga weci ciwano unakele mu JW Broadcasting® ya November mu 2023. Mutamba wamucibali unakele mu JW Broadcasting ya January, uno mwaka.
b Taleni ñanda ya “Mbimbiliya Ikatengulula Buyoye bwa Banu—Bikumbululo Byabibwa Binjawanene mu Mbimbiliya Byanjetele ku Mbunge,” mu Kaposhi ka Kukengela ka February 1, 2015.
