Njathemukilile mu Saxony ku German Democratic Republic. Ha njuvo yetu twalithzemene, cho vithemi vange vanjilongethele kukala na vilinga vyavivwa. German Democratic Republic yapwile chitingitingi cha vaka-vupolitiki vaje vakulahelele ngwavo vanu voshe vapwitha hamo lika, ngechi vanu va ku Saxony kuvamwene theho ya kukala mu vulombelo. Cho ngechi mwange kunjakulahelele ngwange kwakala Njambi. Kuli vyuma vivali vinjakulahelele ha myaka 18 kushwa ha kuthemuka kwange vije vyanjilingithile njikale neyi yoyethi. Cha kulivanga kunjakulahelele ngwange kwakala Njambi. Cha mu chivali njakulahelele ngwange vanu voshe vapandele kukala na vyuma vya kupwitha hamo lika.

Vika vyanjilingithile njikulahele echi chuma cha mu chivali? Mwafwa valongethele ngwavo vanu voshe vapwitha hamo lika. Njakulahelele lalo ngwange munu na munu wapandele kutambula vyuma vya kupwitha hamo, mwafwa kunjashakele ngwange kukale vihutu nambe vaka-kufuka manene. Ngechi njalikwatathanene na kachivunga kamo kaje kakundwiyiye viyongola vya kwendeka ngwavo vanu vapwitha hamo lika. Omwo njakele na myaka 14, njathzethzamene mu chipangi cha kutengulula mapapelo aje avanombila na kuwapwitha kupwa amaha lalo. Vanu va ku mbongi ya Aue vavwahelelele manene na chipangi njinjakele na kulinga, cho vaka-kutwamenena vanjanene chikandekela. Nameme njapwile njimwanike, oloni njalithzivukile na vaka-vupolitiki va German Democratic Republic vaje vathsimanene manene. Njalithzivile ngwe njalyakelele vilengo vyavivwa manene vije vyethi kunjikwatha kulutwe.

Oloni vyuma vyatengulukile mu thimbu yaindondo lika. Mu 1989, kachivunga ketu kahwile ndthzili omwo vawithile Chivumbe chije chatepele West Berlin ku mafuti akwavo. Makalu akele na kulikava, kutunda mu vukalu kukovela lalo mu vukalu. Njanangukile laIo ngwange vilinga vya kuhenga vyashulile mu German Democratic Republic. Chakumwenako, vanu vaje kuvakundwiyiye chilongetha cha vupolitiki cha kwendeka ngwavo vanu vanapande kupwitha hamo lika vavayandethele. Vika vikwapwililile ngocho? Twakulahelele ngwetu vanu voshe vanapande kuvamona mwamuvwa. Evi vyoshe vyanjinenelele vishoti vyakama.

Ngechi njatengulwile vilengo vyange na kushangumuka kulilongetha kwimba myatho na kuthona vikupulo. Cho njayongwele kukatwalelelaho kulilongetha kwimba myatho na kuthona vikupulo ku Yunivesiti. Mu kwita kwa thimbu njechelele kukala na vilinga vyavivwa vinjalilongethele ku vwanike. Chuma cha theho kuli yange ha thimbu eyi chapwile kulikuwa vuyoye, echi chambatethelele na kukala na mapangala vavangi ha thimbu imo lika. Oloni evi vyoshe kuvyamanethele vishoti  vyange. Nameme vikupulo vinjakele na kuthona vyamwethele ngwavyo njakele na lyova. Ngechi njalihwile ngwange vyuma vikafwa vati kulutwe? Cho vika vituli na kuyoyela?

Vikumbululo vinjawanene ku vihula vyange vyanjikathamethele manene. Ha thimbu ya mangwethzi omwo twakele ku sikola na vakwetu, twakele na kuthimutwiya muvikakela vyuma kulutwe. Mandy, * Mukaleho wa Yehova, wanjinangwile ngwendi: “Andreas, nga ushaka kuwana vikumbululo vya vuthunga ku vihula vya mu kuyoya na vyuma vya kulutwe, ya ukatondethethe mu Mbimbiliya.”

Kunjakulahelele vyendekele, oloni njashakele kuthzivuka muinakumbulwila Mbimbiliya. Mandy wanjilekele lalo ngwendi njikatande Ndanyele kapetulu 2, cho vyuma vinjakatandele vyanjikomokethele manene. Ovu vupolofweto vwalumbununa kulikavathana kwa viyulo vya ndthzili vya mu kaye vije vikayula kweta na mu vithimbu vyetu. Mandy wanjimwethele vupolofweto vukwavo vwa mu Mbimbiliya vuje vwendeka ha vyuma vya kulutwe. Njawanene vikumbululo ku vihula vinjakele navyo thimbu yailaha. Oloni njathalele na vihula vikwavo, vya kufwa ngwe iya wathonekele ovu vupolofweto uje athzivuka mwamuvwa vyuma vikalingiwa kulutwe? Njambi kwakala ndi?

Mandy walekele Horst na Angelika, munu na munakathzi wendi vaje vapwile Vakaleho mangana vanjilongethe Mbimbiliya. Cho vanjikwathele kuthzivithitha Lijwi lya Njambi. Njanangukile mu vwathi vwathi ngwange vulombelo vwa Vakaleho va Yehova vukevwo lika vukapangetha manene lithzina lya Njambi mpundu, lya Yehova. (Myatho 83:18 NWT; Mateo 6:9) Njalilongethele lalo ngwange Yehova Njambi wakulahetha vanu kukayoya mu palandaisi hano hathi. Myatho 37:9 yendeka ngwayo: “Vaje vakulahela kuli Shukulu Kalunga, vakashwana mu lifuti.” Njavwahelelele kuthzivuka ngwange vanu voshe vaje vayoya kwetheketha na vinangulo vya Njambi vya mu Mbimbiliya vakayoya myaka yoshe.

Njalifwitile kutengulula yoyethi yange mangana njiyoye kwetheketha na vinangulo vya mu Mbimbiliya. Njapandele kulilongetha tai kupwa munu wa kulikehetha mwafwa luthsimo lwa kupwa muka-kwimba na muka-kuthona lwa njilingithile njilyalethe. Cho kuchapwile chachathi kwechela vupangala. Oloni njikakandelela manene kuli Yehova mwafwa wapwa wa kuthimpa cho akatetela na kuthzivithitha vaje vetheka muvathela mwoshe kuyoya kwetheketha na vilongetha vya mu Mbimbiliya.

Ha myaka 18 njakulahelele vyuma vivali vinjinendeka ku maputukilo, oloni Mbimbiliya inatwalelelaho kutengulula yoyethi yange. Vyuma vinjalilongethele vyamanethele vishoti vyange, cho njathzivukile vituli na kuyoyela. Mu 1993, vanjimbwitikile na kupwa nji Mukaleho wa Yehova, cho mu 2000 njambatele Tabitha mukwetu muka-kukulahela wa ntwima. Thimbu yaingi tukakwatha vakwetu vathzivuke viyendeka Mbimbiliya. Vavangi vatukawana vakulahela mu vyuma vinjakulahelele kunima. Njikalithzivi kuvwaha omwo njikavakwatha vathzivuke Yehova.

Omwo njashangumukile kulikwatathana na Vakaleho va Yehova vithemi vange valuvalele manene. Oloni mu kwita kwa thimbu vamwene vuvwa vwatundile mu kulikwatathana na Vakaleho va Yehova. Ha thimbu ino vanashangumuka kutanda Mbimbiliya na kuya ku viwano vya Vakaleho va Yehova.

Yange na Tabitha tu va kuvwahelela mu vulo vwetu mwafwa tukapangetha vinangulo vya mu Mbimbiliya. Chakumwenako, tukakavangeya vinangulo vya mu Mbimbiliya vya kupwa va kulongwa mu vulo, cho kulinga ngocho kunakanyametha vulo vwetu.—Vahevelu 13:4.

Njinechela kukala na lyova na kulishoshomwena mu vikakela vyuma kulutwe. Njikalithzivi ngwange njili mu nanga ya vakwetu vaka-kukulahela, vaje vanatumbama mu kwoloka na kulikwatathana. Omu mu nanga kukwethi wakama kutuvakana vakwavo. Echi chikecho chuma chinjakulahelele kushwa ku vwanike, cho njashakele ngwange tupwe ngocho.