1, 2. Mwafwa vika Paulu wathonekelele vaka-Kilisitu va vaHevelu mukanda?

MU MWAKA wa 61, vikungulukilo vyoshe vya mu Isalele vyakele mu kwoloka. Kapositolo Paulu wakele mu kamenga ku Loma, oloni wakulahelele ngwendi vamutundithamo vwathi. Ha thimbu eyi, kavuthamba kendi Timateo, vamutundithile mu kamenga, ngechi voshe vayongwele vya kwendela vandolome vavo ku Yundeya. (VaHevelu 13:23) Oloni omwo mwita myaka itanu, vaka-Kilisitu va ku Yundeya, maneneni vaje vakele mu Yelusalema vakatondewa kutundamo vwathi. Mwafwa vika? Mwafwa Yesu walekele vaka-kumukavangeya ngwendi, omwo mukamona Yelusalema vanaithzengeleka ku mashwalale, cho mukatewemo.—Luka 21:20-24.

² Mwetile myaka 28 kutunda haje Yesu wendekele awa majwi kuli vaka-kumukavangeya. Ha myaka yoshe eyi, vaka-Kilisitu va mu Isalele vatwaleleleho kulongwa nameme vakele mu mapaketho na mu vyetheko vyavingi. (VaHevelu 10:32-34) Oloni Paulu washakele kuvakwatha valivwahethele vya vukalu vwakele na kwija. Kulutwe kukaija chetheko chakama chije chiketheka likulahelo lyavo. (Mateo 24:20, 21; VaHevelu 12:4) Vapandele kukala na lukakateya na likulahelo lyakama mangana vathe kukavangeya majwi a Yesu a kutewa mu nganda na kwovola myonyo yavo. (Tandeni VaHevelu 10:36-39.) Ngechi, Yehova wahwiminine Paulu  kuthonekela ava vandolome na vandokathzi mukanda. Ou mukanda ukewo utukatumbula ngwetu mukanda wa VaHevelu. Wauthonekele mangana uvakwathe kulivwahethela vyuma vyakele na kwija kulutwe.

3. Mwafwa vika tunapande kuthzivuka viñanda vili mu mukanda wa VaHevelu?

³ Netu matangwa ano, tunapande kuthzivuka viñanda vili mu mukanda wa VaHevelu. Mwafwa vika? Mwafwa kuyoya kwetu kunalifu na kuje kwakeleko kuli vaka-Kilisitu va ku Yundeya. Tuli na kuyoyela mu ‘thimbu ya ikalu,’ cho vavangi vali na kumona mapaketho na vyetheko vyavingi. (2 Timateo 3:1, 12) Vungi vwetu tuli mu kwoloka, kutwethi mu mapaketho amangi. Ngechi, netu tunapande kutona ngwe vaka-Kilisitu va mu thimbu ya Paulu. Mwafwa vika? Mwafwa ololo tuliwana na chetheko chakama mu kukulahela kwetu.—Tandeni Luka 21:34-36.

4. Chithoneka muka cha mwaka wa 2016? Mwafwa vika chinapande?

⁴ Vika vitukwatha kulivwahethela vikalingiwa kulutwe? Mu mukanda wa VaHevelu, Paulu nendeka vyuma vyavingi vije vitukwatha kukanyametha likulahelo lyetu. Chanukitho chimo cha kulema tuchiwana ku VaHevelu 13:1. Vatushongangeya ngwavo: “Kakateyeni mu kulithzema umo na mukwavo.” Eyi vesi ikeyo ivanangula kupwa chithoneka cha mwaka wa 2016.

5. Kulithzema umo na mukwavo kulumbununa vika?

⁵ Kulithzema umo na mukwavo kulumbununa vika? Lijwi lya chiNgiliki lya pangethele Paulu lilumbununa ‘kuthzema ndolome.’ Kulithzema umo na mukwavo kulumbununa chithzemo chije chivakalimwetha vanu mu nanga, nambe vavuthamba va ha mbunge. (Yowano 11:36) Kutwethi kulikwitha kulithana ngwetu vandolome nambe vandokathzi. Oloni twapwa vene tu vandolome na vandokathzi. (Mateo 23:8) Paulu wendekele ngwendi: “Lithzemeni umo na mukwavo ngwe vandolome na vandokathzi, cho litakametheni na kulithingimika umo na mukwavo.” (Loma 12:10) Awa majwi amwetha mutwathzemena vandolome vetu. Vanu va Njambi vakalikutu vuthamba na kupangela hamo, mwafwa chithzemo chavo chemana ha mashiko a mu Mbimbiliya.

6. Kulithzema umo na mukwavo kulumbununa vika kuli vaka-Kilisitu va vuthunga?

⁶ Endekethi ya ‘kulithzema umo na mukwavo,’ kakangi vakaipangetha mu mikanda ya vaka-Kilisitu. VaYunda va kuthañulu vapangethele lijwi lya “ndolome,” ha kutumbula kavushoko, nambe munu weka. Oloni kuvakele na kulipangetha kuli vaje kuvapwile vaYunda. Oloni kuli yetu vaka-Kilisitu va vuthunga, “ndolome” wapwa muka-Kilisitu woshe woshe, nameme watunda ku lifuti lyeka. (Loma 10:12) Yehova natulongetha tulithzeme umo na mukwavo ngwe munu na ndolome yendi. (1 Tesalonika 4:9) Mwafwa vika tunapande kulithzemena umo na mukwavo?

7. (a) Mwafwa vika tunapande kulithzemena umo na mukwavo? (b) Chuma muka chikwavo lalo chitulingitha tulithzeme umo na mukwavo?

⁷ Twalithzema umo na mukwavo, mwafwa Yehova ikeye watuleka ngwendi tulinge ngocho. Kutwatha kuthzema Yehova nga tuvyana kuthzema vandolome vetu. (1 Yowano 4:7, 20, 21) Twathzema vakwetu lalo, mwafwa vatha kutukwatha mu thimbu ya vukalu. Paulu mwathonekelele vaka-Kilisitu va vaHevelu mukanda, wathzivukile ngwendi vamo vakathethza membo avo na vufuko vwavo. Yesu wendekele vukalu vukasholoka ha thimbu oyo. (Mako 13:14-18; Luka 21:21-23) Thimbu kanda ovu vukalu vwije, ava vaka-Kilisitu vapandele kulithzema manene umo na mukwavo.—Loma 12:9.

8. Vika vitunapande kulinga hano vene thimbu kanda ñavava yakama ishangumuke?

 ⁸ Ñavava yakama manene ije kanda ikaleko laja ili muyehi. (Mako 13:19; Kujombolola 7:1-3) Tunapande kukakavangeya majwi akwendeka ngwavo: “ Vanu vange, koveleni mu vinjuvo vyeni, cho lishokeyeyenimo. Vandeni kathimbu kakandondo lika, noho vukalu vwa Njambi vunahu.” (Isaya 26:20) Evi “vinjuvo” vinatha kwimanenako vikungulukilo vyetu. Kukekwo kutukalemethela Yehova hamo lika na vandolome na vandokathzi vetu. Oloni kuli vikwavo lalo vitunapande kulinga, kethi kukunguluka lika embwe. Paulu washongangeyeye vaka-Kilisitu va vaHevelu ngwendi vapandele kulitakametha na kumwetha chithzemo na kulinga mwamuvwa kuli umo na mukwavo. (VaHevelu 10:24, 25) Tunapande kuthzema manene vandolome na vandokathzi vetu hano vene, mwafwa vakatutakametha mu vyetheko vije vikaija kulutwe.

9. (a) Twatha kumwetha vati chithzemo kuli umo na mukwavo? (b) Endekeni vyakumwenako vije visholola omwo vanu va Yehova vanamwetha chithzemo kuli umo na mukwavo?

⁹ Twatha kumwetha chithzemo kuli umo na mukwavo mu matangwa ano vene thimbu kanda ñavava yakama ishangumuke. Vandolome vetu vavangi vali na kuyanda mwafwa ya mandunduma na mavathzi na tunkumba na mankimba na vukalu vweka. Vamo vali na kwita mu mapaketho. (Mateo 24:6-9) Vuyoye vwa vanu lalo vunakaluwa mwafwa ya kuyoyela mu lifuti lino lyalivi. (Kujombolola 6:5, 6) Omwo tumona vandolome vetu vakovela mu vukalu, twatha kumwetha chithzemo chetu kuli vakevo. Tunapande kulithzema umo na mukwavo nameme kaye kano kukethi na kulinga ngocho. (Mateo 24:12) ^[1]—Kengeni viñanda vya kushongo.

10. Vika vituthimutwiya?

¹⁰ Nameme tuli mu vukalu, twatha kutwalelelaho vati kumwetha chithzemo kuli umo na mukwavo? Twatha kumwetha vati ngwetu twathzema vandolome vetu? Omwo Paulu wamanethele kwendeka ngwendi, “kakateyeni mu kulithzema umo na mukwavo,” wendekele lalo vingila vivanapande kukavangeya vaka-Kilisitu. Tuthimutwiyeni vingila vya kupwa 6.

11, 12. Kujumbula vangendthzi kulumbununa vika? (Kengeni chikupulo ha liputa 7)

¹¹ “Anukeni kutambula vangendthzi.” (Tandeni VaHevelu 13:2.) “Kutambula vangendthzi” kulumbununa vika? Awa majwi apangethele Paulu alumbununa “kumwetha ngothzi ku vangendthzi.” Awa majwi anatha kutwanukitha Avilahama na Lote. Ava vanalume vatambwile, nambe ngwetu kujumbula vanu kuvathzivukile. Avilahama na Lote vanangukile ngwavo vaje vangendthzi vapwile tungelo. (Kushangumuka 18:2-5; 19:1-3) Evi vyakumwenako vyashongangeyeye vaka-Kilisitu va vaHevelu kumwetha chithzemo kuli umo na mukwavo mu kujumbula vangendthzi.

¹² Twatha vati kujumbula vangendthzi? Twatha kulanya vandolome na vandokathzi ku vinjuvo vyetu kukalya navo vyakulya na kulitakametha umo na mukwavo. Twatha kulanya kanyungi wa kuthzenguluka na munakathzi wendi ku vinjuvo vyetu omwo vendela chikungulukilo chetu nameme kutuvathizuka mwamuvwa. (3 Yowano 5-8) Twatha kulanya ava vanu nameme kutwethi na vyakulya vyavingi, nambe vimbongo vyavingi. Tushaka kushongangeya vandolome vetu, kethi kuvamwetha vyuma vituli navyo embwe. Kutwapandele kulanya lika vaje vatumona ngwetu vatha kutukwatha. (Luka 10:42; 14:12-14) Kutwapandele kuthzethzama manene, ngechi twonowe kujumbula vangendthzi.

13, 14. Twatha ‘kwanuka vati vaje vali mu kamenga’?

¹³ “Anukeni vaje vali mu kamenga.” (Tandeni VaHevelu 13:3.) Paulu mwathonekele awa majwi, wakele na kwendeka vandolome  vaje vavakutile mwafwa ya likulahelo lyavo. (Filipu 1:12-14) Paulu washangathzalele chikungulukilo, mwafwa vamwethele “ngothzi kuli vaje vakele mu kamenga.” (VaHevelu 10:34) Vandolome vamo vakwathele Paulu mwakele mu kamenga ha myaka iwana ku Loma. Vandolome veka vakele kulako manene. Oloni vamukwathele vati? Vamulombelelele manene.—VaHevelu 13:18, 19.

¹⁴ Matangwa ano, Vakaleho va Yehova vavangi vanavakutu mu tumenga mwafwa ya likulahelo lyavo. Vandolome na vandokathzi vaje vali kuyehi, vatha kuvakwathako vyuma vya ku muvila. Oloni vungi vwetu twakala kulako nokwo kuvanavakutila. Twatha kuvaka vati mu vithinganyeka na kuvakwatha? Kuvathzema manene ha kupwa vandolome vetu kutulingitha tuvalombelele. Chakumwenako, twatha kulombelela vandolome na vandokathzi na vanike vaje vali mu kamenga ku Eritrea, kwakelako na vandolome vetu va Paulos Eyassu na Isaac Mogos na Negede Teklemariam vaje vachili mu kamenga ha myaka ya kutuvakana 20.

15. Twatha kuthingimika vati vulo vwetu?

¹⁵ “Vulo vunapande kukala na kathingimiko kuli voshe.” (Tandeni VaHevelu 13:4.) Tumwetha ngwetu twathzema vandolome vetu nga tukala na vilinga vyavivwa. (1 Timateo 5:1, 2) Chakumwenako, nga tulinga vupangala na ndolome, nambe na ndokathzi yetu, cho tumukoveletha mu vukalu hamo lika na nanga yendi. Vandolome na vandokathzi vetu kuvatukulahela. (1 Tesalonika 4:3-8) Thinganyekeni lalo mwanatha kulithziva munakathzi nga a nanguka ngwendi munalume wendi akakenge vikupulo vya mushelengwa. Atha kumona ngwendi munalume wendi wamuthzema na kuthingimika vulo vwavo ndi?—Mateo 5:28.

16. Kujauka na vyuma vituli navyo kutukwatha vati kumwetha chithzemo kuli vandolome vetu?

¹⁶ “Pweni vaka-kujauka na vyuma vije muli navyo.” (Tandeni VaHevelu 13:5.) Kukulahela Yehova kutukwatha tujauke, nambe kuthuvuluka na vyuma vije tuli navyo. Oku kutukwatha vati tumwethe chithzemo kuli vandolome vetu? Nga tujauka na vyuma tuli navyo, tumona vandolome na  vandokathzi vetu kupwa va kulema kutuvakana vimbongo, nambe vufuko. (1 Timateo 6:6-8) Kutuyayavala hali vandolome vetu, nambe ha vuyoye vwetu. Kututhzivila vandolome vetu chipululu. Oloni nga tupwa va kujauka, cho twanako vandolome vetu vyuma vituli navyo.—1 Timateo 6:17-19.

17. ‘Kupwa va kuthimpa’ kutukwatha vati kumwetha chithzemo kuli vandolome vetu?

¹⁷ “Pweni vaka-kuthimpa.” (Tandeni VaHevelu 13:6.) Kukulahela Yehova kutukwatha tupwe va kuthimpa mu thimbu ya vyetheko. Kuthimpa kutukwatha tukale na vithinganyeka vyavivwa. Omwo tukala na vithinganyeka vyavivwa, twatha kumwetha vandolome na vandokathzi vetu chithzemo mu kuvatakametha na kuvathzembeleka. (1 Tesalonika 5:14, 15) Nameme mu thimbu ya ñavava yakama tukathimpa, ha kuthzivuka ngwetu kwovoka kwetu kuli muyehi.—Luka 21:25-28.

18. Twatha vati kuthzema manene vakulunu?

¹⁸ “Anukeni vantwama veni.” (Tandeni VaHevelu 13:7.) Vakulunu va mu chikungulukilo vakana thimbu yavo mu kutupangela. Nga tuthinganyeka ha vyuma vivakatulingila, cho tuvathzema manene na kuvakandelela. Kutushaka vyuma vitulinga vivathzivalethe ku mbunge, nambe kuvaluvaletha. Oloni tushaka kuvononoka na mbunge yetu yoshe. Nga tulinga ngocho, cho ‘tuvathingimika manene na kuvathzema, omwo ya vipangi vije vali na kulinga.’—1 Tesalonika 5:13.

19, 20. Twatha kutwalelelaho vati kuthzema manene vandolome vetu?

¹⁹ Vanu va Yehova vavathzivukila ha kulithzema umo na mukwavo. Omu mukemwo muvavathzivukile vaka-Kilisitu va mu matangwa a Paulu. Oloni Paulu wavashongangeyeye vamwethe manene chithzemo. Wendekele ngwendi: “Vwethzeleleniko manene.” (1 Tesalonika 4:9, 10) Oku kumwetha ngwe twatha kuvwethzelela ku chithzemo chetu.

²⁰ Omwo tukenga ha chithoneka cha uno mwaka, tulihuleni evi vihula: Njatha kupwa muka-kujumbula vangendthzi ndi? Njatha kukwatha vati vandolome vali mu kamenga? Njikathingimika vulo ndi? Vika vinjikwatha kupwa wa kujauka na vyuma njili navyo? Njatha vati kukulahela manene Yehova? Njatha vati kwononoka vantwama? Nga tupangetha evi vitunathimutwiya, cho chithoneka cha mwaka kuchipu cha kukenga lika na mesho. Oloni chitwanukitha majwi endekele Paulu ngwendi: “Kakateyeni mu kulithzema umo na mukwavo.”—VaHevelu 13:1.