1, 2. (a) Vyuma muka vyalivungila mu ‘vwana vwa Njambi vuje kutwatha kulumbununa’? (b) Vihula muka vituthimutwiya muno mu mutwe wa ñanda?

YEHOVA mu chithzemo chendi, watwanene vwana vwakama ha kututumina Munendi umo lika hano hathi. (Yowano 3:16; 1 Yowano 4:9, 10) Ovu vwana, kapositolo Paulu wavutumbwile ngwendi vwana vuje “kutwatha kulumbununa.” (2 Kolinte 9:15) Mwafwa vika Paulu wapangethele awa majwi?

² Paulu wathzivukile ngwendi ñombelo ya Yesu ikeyo ikalingitha vikulahetho vya Njambi vyoshe vikalishulithilile. (Tandeni 2 Kolinte 1:20.) Oku kulumbununa ngwe, kuli vyuma vyavingi vyalivungila mu “vwana vwa Njambi vuje kutwatha kulumbununa,” kethi ngwe ñombelo ya Yesu lika embwe. Muli na vyuma vyavivwa vyoshe na chithzemo cha Njambi chije kuchethi kutenguluka chakatumwetha Yehova kulutwe. Vwana vwa chifwa echi, vwavukalu kuvulumbununa na kuvuthzivithitha. Tunapande kulithziva vati ha vwana ovu vwa kulitila? Ovu vwana vunapande kutushongangeya vati omwo tulivwahethela vya Chanukitho cha kuthsa kwa Kilisitu chije chikakalako lya mu Chitatu, March 23, 2016?

3, 4. (a) Mukalithzivi vati nga vamyana vwana? (b) Vwana vwavuvwa vunatha kutengulula vati kuyoya kweni?

³ Tukavwahelela nga mukwetu atwana vwana. Vwana vumo vukapu vwavuvwa manene, mwafwa vunatha kutengulula kuyoya kwetu kwoshe. Chakumwenako, achithinganyekeni ngweni munalingi mulonga wakama. Cho vanamiyulu ngwavo vamithsiya. Oloni vwathivwathi, munu umo uje kumuthzivuka, alyana ngwendi vamuthsiye ikeye. Munatha kumona vati vwana vwa chifwa echi?

⁴ Vwana vwa chifwa echi vumilingitha muthinganyeke vyuma vimunapande kutengulula mu kuyoya kweni. Vunatha kumishongangeya kupwa vaka-kwana na kuthzema vakweni na kuthambetha woshe uje namivulumwina. Ngechi mu kuyoya kweni kwoshe, mushaka kumwetha kukandelela kwakama ku vwana vuje vwamyanene uje munu.

5. Ñombelo yanatwana Njambi yalithethze vati na vwana vutukatambula ku vanu?

⁵ Ñombelo inapu vwana vwakama vwanatwana Njambi kutuvakana vuje vutunendeka mu chakumwenako. (1 Petulu 3:18) Achithinganyekeni ha chuma echi: Tuvavoshe Andama natutambwitha vuvi, ngechi kashitiko ketu kanapu kuthsa. (Loma 5:12) Chithzemo chashongangeyeye Yehova atume munendi hano hathi mangana ‘akuthsile vanu voshe.’ (VaHevelu 2:9) Oloni ñombelo ya Yesu ikalinga vyuma vyavingi. Ikatundithako kuthsa haya myaka yoshe. (Isaya 25:7, 8; 1 Kolinte 15:22, 26) Voshe vaje vakulahela muli Yesu vakayoya mu kwoloka na kuvwahelela kwa myaka yoshe, nameme vakashwana na Kilisitu mwilu, nambe kukala hano hathi. (Loma 6:23; Kujombolola 5:9, 10) Vivethzikitho muka vikwavo vyalivungila mu vwana vwa Yehova?

6. (a) Vivethzikitho muka vya kutunda kuli Yehova vimukalikuwa kulutwe? (b) Endekeni vyuma vitatu vije vwana vwa Njambi vutushongangeya kulinga.

⁶ Kuli vwana vukwavo vwakatwana Njambi, akatengulula hathi kupwa palandaisi, akakangula vaka-kuvinja, akathangula vathsi. (Isaya 33:24; 35:5, 6; Yowano 5:28, 29) Twathzema Yehova na Munendi mwafwa ya kutwana “vwana vuje kutwatha kulumbununa.” Ovu vwana vutushongangeya kulinga vika? Vutushongangeya (1) tutembwinine Yesu, (2) tuthzeme vandolome vetu, (3) tuthambethe vakwetu na mbunge yetu yoshe.

7, 8. Tunapande kulithziva vati ha chithzemo cha Kilisitu, cho chinapande kutushongangeya tulinge vika?

⁷ Cha kulivanga, tunapande kukala na ntwima ya kwaletha Yesu mu kuyoya kwetu. Kapositolo Paulu wendekele ngwendi: “Chithzemo cha Kilisitu chinatushwana,” nambe ngwetu chinatushongangeya. (Tandeni 2 Kolinte 5:14, 15.) Paulu wathzivukile ngwendi nga tumona chithzemo cha Yesu kupwa cha kulema, cho kutulingitha tumuthzeme na kumuthingimika. Nga tuthzivithitha vyuma vyanatulingila Yehova, cho chithzemo chendi chitulingitha kuyoya mungila ije ithzivitha Yesu kuvwaha. Twatha kulinga vati ngocho?

⁸ Kuthzema Yehova kutushongangeya tutembwinine Yesu na kukavangeya mu myanja yendi. (1 Petulu 2:21; 1 Yowano 2:6) Nga twononoka Njambi na Kilisitu, cho tumwetha ngwetu twavathzema. Yesu wendekele ngwendi: “Woshe uje atambula mashiko ange na kuwononoka ikeye uje anjithzema. Cho Tate akathzema woshe uje anjithzema, nange lalo njikamuthzema na kulisholola kuli ikeye.”—Yowano 14:21; 1 Yowano 5:3.

9. Twatha kukovela mu vyetheko muka?

 ⁹ Mu vingonde vya Chanukitho, kupwa kwakuvwa kuthinganyeka mutunapande kupangethela kuyoya kwetu. Lihuleni ngweni: ‘Mu vyuma muka njili na kutembwinina Yesu? Vika vinjinapande kutengululako?’ Kunapu kwa theho kulihula evi vihula mwafwa vaka-kaye vashaka tutembwinine yoyethi yavo. (Loma 12:2) Nga kutunyanyama, tunatha kutembwinina vilinga vya valongethi va ku kaye, na vanu va kuthsimana. (Kolose 2:8; 1 Yowano 2:15-17) Twatha kujenjuka vati ku chetheko echi?

10. Vihula muka vitunapande kulihula mu vingonde vya Chanukitho, cho vikumbululo vyacho vitushongangeya kulinga vika? (Kengeni chikupulo ha liputa 12)

¹⁰ Kupwa kwakuvwa lalo mu vingonde vya Chanukitho kuwana thimbu ya kwilula vuthzalo vwetu na vifilimu na myatho na vyuma vili ha kompyuta na mu foni nambe mu tambuleti. Lihuleni ngweni: ‘Nga njilitulukwa na Yesu, cho amona vuthzalo vwange, njithziva shwamwa ndi?’ (Tandeni 1 Timateo 2:9, 10.) ‘Vuthzalo vwange vwatha kunjimwetha ngwavo njapwa nji muka-kukavangeya Kilisitu ndi? Yesu atha kukenga vifilimu vyange ndi? Atha kutolilila ku myatho yange ndi? Nga Yesu anjilomba foni yange, nambe tambuleti, njinatha kuthziva shwamwa ha vyuma vyawanamo ndi? Njatha kulumbwinina Yesu mukuthzituka ha vweho vunjikehe ha kompyuta yange ndi?’ Kuthzema Yehova kunapande kutushongangeya tumbile kuti vyuma vije kuvyapandele kuli vaka-Kilisitu nameme vinapu vya ndando yakama. (Vilinga 19:19, 20) Mutwalikundikile kuli Yehova, twamukulahethele ngwetu twaletha Kilisitu mu kuyoya kwetu kwoshe. Ngechi kutwapandele kutulika chuma chije chitwonowetha kutembwinina Yesu.—Mateo 5:29, 30; Filipu 4:8.

11. (a) Kuthzema Yehova na Yesu kutushongangeya vati mu chipangi cha kwambulula? (b) Chithzemo chitushongangeya vati tukwathe vakwetu mu chikungulukilo?

¹¹ Kuthzema Yesu kukatushongangeya tukale na ntwima ya kwambulula na kulongetha. (Mateo 28:19, 20; Luka 4:43) Mwatha kutepululako vimo mu kuyoya kweni mu vingonde vya Chanukitho mangana mupange vupainiya vwa kukwatha vwa maola 30, nambe 50 mu lihya ndi? Fwile umo wa myaka 84 walithzivile ngwendi katha kulinga vupainiya, mwafwa ya kukuluvala na kuvinja. Oloni vapainiya va mu chitingitingi chendi vamukwathele. Vamwanene chitingitingi cha kwambulwila na kumuwanena minyau ya kumutwala ku chitingitingi. Ngechi ou ndolome wathele kulinga vupainiya vwa maola 30. Mwatha kukwathako umo mu chikungulukilo cheni alinge vupainiya vwa kukwatha mu March, nambe mu April ndi? Kethi vanu voshe vatha kulinga vupainiya, oloni twatha kupangetha thimbu yetu na ndthzili yetu mu kupangela manene Yehova. Nga tulinga ngocho, cho tumwetha ngwetu chithzemo cha Yesu chili na kutushongangeya ngwe muchashongangeyeye Paulu. Chithzemo cha Njambi chitushongangeya kulinga vika lalo?

12. Chithzemo cha Njambi chikatushongangeya kulinga vika?

¹² Cha mu chivali, Chithzemo cha Njambi chinapande kutushongangeya kuthzema vandolome vetu. Kapositolo Yowano wathonekele ngwendi: “Vathamba vange vanjathzema, tulithzemeni umo na mukwavo, omwo chithzemo chatunda kuli Njambi.” (1 Yowano 4:7-11) Nga twathzema Njambi, cho tunapande lalo kuthzema vandolome vetu. (1 Yowano 3:16) Twatha kuvathzema vati?

13. Mwanja muka wanatwana Yesu wa kuthzema vakwetu?

 ¹³ Mwanja wa Yesu utumwetha mwakuthzemena vakwetu. Yesu mwakele hano hathi, wakwathele vanu, maneneni vaka-kulikehetha. Wakangwile vaka-kuvinja na vilema na tuthinda matwi na tupuputwa na tuveveve. (Mateo 11:4, 5) Mu kulithethza na vakulunu va vulombelo, Yesu walongethele vanu vaje vashakele kulilongetha vya Njambi. (Yowano 7:49) Wathzemene ava vanu va kulikehetha, cho wapangele na ndthzili mu kuvakwatha.—Mateo 20:28.

14. Vika vimwatha kulinga mangana muthzeme vandolome veni?

¹⁴ Vingonde vya Chanukitho vinapu vya kuthinganyeka mutwatha kukwathela vandolome na vandokathzi vetu mu chikungulukilo, maneneni tukulukathzi. Mwatha kuvendela ndi? Mwatha kuvatwalelako vyakulya na kuvakwatha vipangi vya ha njuvo ndi? Mwatha kuvatwala ku viwano, nambe kupanga navo mu lihya ndi? (Tandeni Luka 14:12-14.) Chithzemo cha Njambi chinapande kumishongangeya muthzeme vandolome veni.

15. Chuma muka cha kulema chitunapande kuthzivuka?

¹⁵ Cha mu chitatu, chithzemo cha Yehova chikatushongangeya tuthambethe vandolome na vandokathzi vetu. Tuvavoshe twashwana vuvi na kuthsa kutunda kuli Andama, ngechi naumo wai atha kwendeka ngwendi, “Kunjitondo ñombelo.” Nambe vangamba va Njambi va kulongwa manene navo vatonda ovu vwana vwa ñombelo. Umo na umo wetu vanamuthambetha likongo lyendi lyakama. Vika kwapwila kwa kulema kuthzivuka eyi thimpi? Tuwana muvakumbulwila chihula echi mu chithimo chatele Yesu.

16, 17. (a) Chuma muka chitulilongetha ku chithimo cha Yesu cha uje mwene na vangamba? (b) Hanima ya kuthinganyeka ha chithimo cha Yesu, vyuma muka vimushaka kulinga?

¹⁶ Yesu watele chithimo cha mwene uje wathambethele ngamba yendi uje wakele na likongo lya vindenale 60,000,000. Oloni uje ngamba kathambethele mukwavo ngamba uje wamukongwelele vindenale 100. Chithzemo cha uje mwene chapandele kushongangeya uje ngamba yendi athambethe mukwavo. Ngechi mwene waluvalele ha kuthziva ngwavo uje ngamba yanathambetha kathambethele mukwavo wa likongo lyalindondo. Wendekele ngwendi: “Yove u ngamba wamuvi. Yange njakuthambethele likongo lyove lyoshe liwatambwile kuli yange, omwo yove wanjilombele ku kuthambetha. Cho yove kuwatha kuthzivilako mukweni mema ku mbunge ngwe munjinakuthzivilile mema ku mbunge yange ndi?” (Mateo 18:23-35) Ngechi mwa uje mwene, Yehova natuthambetha likongo lyetu lyakama. Chithzemo na ngothzi ya Yehova vinapande kutushongangeya kulinga vika?

¹⁷ Omwo tulivwahethela vya Chanukitho, tunatha kulihula ngwetu: ‘Kuli  ndolome nanjiluvaletha ndi? Chikanjikaluwila kumuthambetha ndi?’ Nga mukemwo, cho ino ikeyo thimbu yaivwa ya kutembwinina Yehova “muka-kuthambetha.” (Nehemiya 9:17; Myatho 86:5) Nga tukakandelela Yehova ha kututhzivila ngothzi, cho netu tuthzivila vakwetu ngothzi na kuvathambetha na mbunge yetu yoshe. Nga kututhzeme vandolome vetu na kuvathambetha, cho na Yehova nendi katha kututhzema na kututhambetha. (Mateo 6:14, 15) Kuthambetha vakwetu kukulumbununa ngwavo kutwathzivile kuvavala ku mbunge, oloni kutukwatha kupwa va kuvwahelela mu kuyoya kwetu kwoshe.

18. Chithzemo cha Njambi chakwathele vati ndokathzi umo athambethe mukwavo ndokathzi?

¹⁸ Kwapwa kwakukalu kuthambetha tupenga twa vandolome na vandokathzi vetu (Tandeni Efeso 4:32; Kolose 3:13, 14.) Omu mukemwo mwamwene ndokathzi Lily. ^[1] (Kengeni viñanda vya kushongo). Lily wakwathele manene fwile wa lithzina lya Carol. Chakumwenako, wamutwalele na munyau wendi kwoshe kwashakele kuya na kulanda vyuma na kumulingila vyuma vyavingi vikwavo. Nameme Lily walingile vyuma vyoshe evi, oloni Carol anga mbunge yendi yapwile yaikalu. Oloni Lily wakengele ha vifwa vyavivwa vya Carol, cho wamukwathele ha myaka yaingi kweta noho havinjilile na kuthsa. Nameme kwapwile kwakukalu kuli Lily kukwatha Carol, oloni wendekele ngwendi: “Njavandamena kukamona Carol omwo akathanguka ku vathsi. Njishaka kukamumona oku napu wa kuthungama.” Chithzemo cha Njambi chatha kutushongangeya tuthambethe vandolome na vandokathzi vetu. Cho twavandamena thimbu ya kulutwe omwo vanu kuvakakala na tupenga.

19. ‘Vwana vwa Njambi vuje kutwatha kulumbununa’ vutushongangeya kulinga vika?

¹⁹ Yehova natwana “vwana vuje kutwatha kulumbununa.” Ngechi tuvavoshe tukandeleleni ha vwana ovu. Vingonde vya Chanukitho vinapu vithimbu vyavivwa vya kuthinganyeka ha vyuma vyoshe vyanatulingila Yehova na Yesu. Chithzemo chavo chinapande kutushongangeya tutembwinine Yesu na kuthzema vandolome vetu na kuthambetha vandolome vetu na mbunge yetu yoshe.