Bilongesa bya mu Mbimbiliya byakala na nzili ya kutengulula futisi ya banu. Tucisimutwiyeni ha byuma byalingiwile mu buyoye bwa Ricardo na Andres.

RICARDO: Munjakele na myaka 15, njalikwatasanene na cibunga cimo ca bikenya. Babusamba bange banjungumwine. Njalyakelele cilengo ca kukakala mu kamenga ha myaka 10. Obyo biyongola binasa kuzibika ngwe bya bulema. Oloni mu citingitingi mutwakele, baje beshwalele mu kamenga bakele na kubasingimika manene. Co nange njashakele kunjisingimika.

Njalingile byuma byoshe byanasa kulinga cikenya, bya kufwa ngwe kupangesa bumbanda bwa kupendesa, bupangala na kulikobelesa mu lwozi. Butsiki bumo, twakele na kulipilula mata na bakwetu ba mu cibunga ceka. Njasinganyekele ngwange banjitsiya, oloni njobokele. Kutundoho, njasinganyekesesele ha buyoye na bilengo byange, co njayongwele kutengulula futisi yange. Oloni, njasele bati kutenguluka? Beya banjikwasele?

Babushoko bange babangi kubapwile ba kubwahelela. Bakele na bilinga byabibi, ngeci baliwanene na bukalu bwa kulisezaseza. Oloni banananu na naanga yabo bapwile ba kubwahelela. Njazibukile ngwange bakele na futisi yaibwa, mwafwa bakele na kukabangeya binangulo bya mu Mbimbiliya mu kuyoya kwabo. Bakebo banjilongesele ngwabo lizina lya Njambi ikeye Yehova. Ngeci, kutunda lika haje hanjobokelele ku mata, njalombelele na kutumbula lizina lya Yehova mangana anjikwase. Njakomokele manene mwafwa litangwa lyatele ku litangwa lije linjalombelele, Mukaleho wa Yehova wanjendelele. Washangumukile kunjilongesa Mbimbiliya.

Njaliwanene na ceseko cakama. Babusamba banjakele na kulikwatasana nabo, bakele na kunjitumina-tumina foni kunjileka ngwabo njiye na kusikama nabo. Njakele na kubabyanena nameme kulinga ngoco kwapwile kwakukalu. Njalyangwilile kutwalelelaho kulilongesa Mbimbiliya. Njalingile mwamubwa kulilongesa Mbimbiliya. Co yatengulula buyoye bwange na kunjikwasa njipwe wa kubwahelela.

Simbu imo, njalekele Njambi mu lilombelo ngwange njakele na biyongola bya kukala mu kamenga ha myaka 10 mangana banjisingimike ha kupwa munu umo wa mu cibunga ca bikenya. Oloni njamulombele ngwange anjitabese kumupangela ha kupwa painiya ha myaka 10 mangana njikwase bakwetu ngwe mubanjikwaselelemo. Njambi wakumbulwile lilombelo lyange mwafwa njinalingi cipangi ca bupainiya ha myaka 17. Co lalo, kanda njiyeho laja mu kamenga.

Bwingi bwa babusamba banjalikwatasanene nabo banayandela mu kamenga ha myaka yaingi. Bamo banatsi. Munjikanuka mubinendelamo byuma mu buyoye bwange, njikakandelela manene ku bukwasi bwa banananu na naanga yabo baje bapwa Bakaleho. Balyangwilile  kuyoya mu ngila ya kuliseza na bakwabo mwafwa bashakele kukabangeya binangulo bya mu Mbimbiliya. Njili na kubasingimika manene kutubakana munjasingimikilile babusamba bange ba bikenya. Njakandelela manene kuli Njambi ha kunjilongesa ngila yaibwa ya mwa kuyoyelamo.

ANDRES: Njasemukilile na kukolela mu citingitingi muje mwalisalele manene bukenya, bwizi na bupangala, co banu bapangesele bumbanda bwa kupendesa. Batate bakele na kunwa manene bwala, co bapangesele mwamubi cocaine. Simbu yoshe batate na banana bakele na kulicokota na kulipupanga.

Te njicili nji mwanike, njashangumukile kunwa manene bwala na kupangesa bumbanda bwa kupendesa. Simbu yaingi njakele na kuyebangela mu bitapalo kuya na kwibila banu, na kulandesa byuma binjinebi. Munjakolele, batate balikutile nange busamba mu kushaka kunjilongesa byuma byabibi. Banjilongesele mwa kubombolwesela byuma bije bibanabindika mu lifuti na kukabilandesela ku mafuti eka. Mu simbu yaindondo lika njawanene bimbongo byabingi. Litangwa limo tupokola bezile na kunjikwata mwafwa njashakele kutsiya munu. Banjikutile mu kamenga ha myaka itanu.

Litangwa limo mutondo banene mutambi mu kamenga wa kulanya binzinda boshe bakutolilile ku muzimbu wa mu Mbimbiliya ubakele na kwambulula Bakaleho ba Yehova. Nange njaileko. Binjakazibile byanjikwasele manene, ngeci njashangumukile kulilongesa Mbimbiliya na Bakaleho. Kubanjishwekelele bubi bwange, oloni banjilekele binangulo bya Njambi bije bikakwasa banu bakale na futisi ya kujela.

Njanangukile ngwangwe kunjasa kutenguluka nga Njambi kanjikwasa, mwafwa bisimbu bimo binzinda bakwetu bakele na kunjilwisa mwafwa kubashakele ngwabo njililongese Mbimbiliya. Njalombele nzili na mana kuli Yehova, co wanjikwasele. Ngeci, njalongesele bakwetu binzinda lijwi lya Njambi mu kusimpa, nameme banjilwisile.

Simbu ya kunjipatula mu kamenga muyetele, njalishoshomwenene manene, co njashakele kutwalelelaho kutumbama mu kamenga. Munjatuhukile mu kamenga, bwingi bwa binzinda banjimbaimbile. Bamo banjilekele mu cizemo ngwabo: “Ya kwimbo, mulongesi wa mwanike.”

Njikazibi lyoba munjikasinganyeka mu bunesi kufwila buyoye bwange ngwe kunjalilongesele bya Njambi. Njakandelela manene kuli Njambi uje nanjimwesa cizemo na kunjimona kupwa wa seo manene. a