VANU VASHAKA KUVATHZEMA. Nga vanu mu vulo, nambe mu nanga, nambe vavuthamba kuvamwetha chithzemo, cho kuvatha kupwa va kuvwahelela. Ngechi chithzemo chinapu cha theho manene mwafwa chikakwatha vanu vapwe va kulikangula na kuvwahelela. Oloni “chithzemo” chapwa chuma muka?

Aha kutwethi na kwendeka ha chithzemo chije chakamwetha munalume ku munakathzi. Oloni tuli na kwendeka ha chithzemo chije chikashongangeya munu ake vakwavo mbunge. Echi chithzemo chemana ha vinangulo vya mu Mbimbiliya, cho chinambatethelela na vuvwa na ngothzi.

Chithzemo vanachilumbununa mwamuvwa ngwavo: “Chithzemo chili na lukakateya na kutetela, chithzemo kuchethi na lifuwa nambe kulyaletha, chithzemo kuchethi kulilwitha, chithzemo kuchethi kulitondela vyacho chikecho vavenya, nambe . .kuluvala, chithzemo kuchethi kukala na likitikiti ha vyuma vyavivi, chithzemo kuchethi kujolela vuvi, oloni chijolela vuthunga. Chithzemo kuchethi kwonwa, . . . kukengelela na lukakateya kuvyethi kwonwa embwe.”—1 Kolinte 13:4-8

Chithzemo cha chifwa echi “kuchethi” kuhwa. Cho lalo chikai na kukola mu kwita kwa thimbu. Chithzemo “chikakutila vyuma vyoshe hamo lika” mwafwa chakala na likakateya na ngothzi na kukonekela. (Kolose 3:14) Ngechi, vuthamba vuje vwemana ha chithzemo cha chifwa echi vwapwa vwavuvwa, cho lalo vukakanyama nameme vanu  kuvapwile va kulumbunuka. Chakumwenako, tuthimutwiyeni ha chithzemo chije chikakutila hamo lika vanu vali mu vulo.

Yesu Kilisitu walongethele vinangulo vya theho ha vulo. Wendekele ngwendi: “Munalume akathethza ishe na vaina na kulipandakana na munakathzi wendi, cho vakapwa muvila umo lika . . . Ngechi vene, vaje vanapandakana Njambi, munu kethi avangunune.” (Mateo 19:5, 6) Aha tulilongethaho vinangulo vivali vya theho.

“VAKAPWA MUVILA UMO LIKA.” Mu vulo mukemwo mwakala chithzemo chakama manene. Echi chithzemo chikavakwatha vapwe va kulongwa kuli umo na mukwavo na kujeneka kupandakana ‘mivila yavo’ na vaje kuvalyambatele navo. (1 Kolinte 6:16; Vahevelu 13:4) Kujeneka kupwa va kulongwa mu vulo kwatha kulingitha vanu vajeneke kulikulahela na kuthsiya vulo. Cho lalo vana vatha kuthzeya na kulithziva ngwavo kuvavathzemene.

“VANAPANDAKANA NJAMBI.” Vulo vwapwa vwa kujela. Vaka-kulyambata vaje vakathingimika eli lishiko vakakanyametha malo avo. Kuvethi kushakethzeka vingila vya kumanethelamo vulo vwavo nga kunasholoka vukalu. Chithzemo chavo chapwa chakama, cho vakalikoletha. Chithzemo cha chifwa echi “kuchethi kwonwa,” oloni chivakwatha vamanethe vukalu na kuyoya mu kwoloka na kuvwahelela mu vulo vwavo.

Nga vithemi valithzema manene, cho vana vavo vapwa va kuvwahelela. Mumbanda wa myaka 20 wa lithzina lya Jessica wendekele ngwendi: “Vanana na vatate valithzema na kulithingimika. Munjikamono vanana vathingimika vatate, njikashaka kuvatembwinina.”

Chithzemo chapwa chifwa cha Njambi. Mukemwo Mbimbiliya yendeka ngwayo: “Njambi wapwa chithzemo.” (1 Yowano 4:8) Ngechi, Yehova vanamutumbula ngwavo wapwa “Njambi wa kuvwahelela.” (1 Timateo 1:11, NWT) Netu tupwa va kuvwahelela nga tutembwinina chithzemo na vifwa vikwavo vya Ishamatanga yetu. Ku Efeso 5:1, 2 ngwavo: “Ngechi vene ngwe omwo mwapwa vana va Njambi vamuya ku mbunge, munapande kulifwa nendi. Endeni mu chithzemo.”