“LILAVELELO LYAPWA LYA THEHO MWAFWA LIKWATHA MUNU AKULAHELE NJAMBI. Litukwatha twonowe kuthzeya na kuthziva vuli na lyova.” Awa majwi vawathoneka mu livulu lya Hope in the Age of Anxiety

Mbimbiliya inamwetha theho ya kukala na lilavelelo. Oloni ku Myatho 146:3, vatunangula ngwavo: “Kethi ukulahele vantwama va hano hathi embwe, munu naumo wai atha kukwamena.” Kutwapandele kukulahela ngwetu vanu vatwamena, oloni tunapande kukulahela Ishamashatanga uje wakala na ndthzili ya kushulithilila vyuma vyoshe vyanakulahetha. Vika vyanatukulahetha? Tuchithimutwiyeni ha vyuma vino.

VUVI VUKAHWA, CHO KUKAKALA KWOLOKA: Ku Myatho 37:10, 11 ngwavo: “Mu kathimbu kakandondo lika, vaka-vuvi vakahwa voshe njwa. . . . Vaka-kulikehetha vakashwana mu lifuti, cho vakajolela na kukala mu kwoloka.” Cho mu vesi 29 ngwavo: “Vaka-vuthunga vakakala mu lifuti, cho vakayoyamo ku myaka yoshe.”

VINDTHZITA KUVIKAKALAKO: Yehova “amanetha vindthzita hano hathi hoshe, akapokothzola mata a luthipa na makunga, enyeka vintelo na tuhya.”—Myatho 46:8, 9.

KUKUKAKALA KUVINJA NA TUYANDO NAMBE KUTHSA: “Ololo mbalaka ya Njambi ili hamo na vanu. . . Akathikumuna mithothzi yoshe ku mesho avo. Cho kukukakala kuthsa nambe vuthiwa nambe kulila nambe kukemanga.”—Kujombolola 21:3, 4.

KUKAKALA VYAKULYA VYAVINGI: “Tiliku ipwe yaingi mu lifuti, hakamwa ya malundu hashule na vimbuto.”—Myatho 72:16.

KUKAKALA CHIYULO CHACHIVWA CHIMO LIKA CHIVAKATWAMENENA KULI KILISITU: ‘Cho vanene moko kuli Yesu Kilisitu na kathingimiko na ndthzili ya vumwene, ngechi vene vanu va ku mafuti oshe na miyati yoshe ya vanu na vanu vaka-kwendeka mu vindaka vyeka vamupangele. Moko yendi ikakala ku myaka yoshe, cho vumwene vwendi kuvukahu.’—Ndanyele 7:14.

Vika vitulingitha tukulahele evi vikulahetho? Omwo Yesu wakele hano hathi, wamwethele ngwendi ikeye Mwene ivanangula. Wakangwile vaka-kuvinja na kwana vyakulya tuhutu na kuthangula vathsi. Vilongetha vyendi vyapwile vya theho manene mwafwa vili na vinangulo vije vikwatha vanu vavangi vakayoye myaka yoshe mu kwoloka na kulikwatathana. Yesu wendekele lalo ha vyuma vije vimwetha ngwavo tuli na kuyoya mu matangwa a kukotoka kwa kaye.

Yesu wendekele ngwendi mu matangwa a kukotoka vyuma vikakaluwa. Vindthzita na kujeneka kukala na vyakulya na mishongo na mandunduma vikapwa chimwetho cha “kukotoka kwa kaye.” (Mateo 24:3, 7; Luka 21:10, 11; Kujombolola 6:3-8) Yesu wendekele lalo ngwendi: “Cho omwo vuvi vunatumu, chithzemo cha vanu ku vakwavo vanu chikatonola.”—Mateo 24:12.

Vanu kuvethi na kumwetha chithzemo mu vingila vyavingi. Ku 2 Timateo 3:1-5 Mbimbiliya yapolofwetele ngwayo: “Mu matangwa a kukotoka” vanu vakalithzema vakevo vavenya na kuthzema vimbongo na thenga. Vakapwa vaka-kulijundula. Mu vinanga kumukakala chithzemo, cho vana kuvakathzivi vithemi vavo. Vulombelo vwa makuli vukalithala.

Ovu vukalu vwoshe vumwetha ngwavwo tuli mu matangwa a kukotoka. Vumwetha lalo ngwavwo Vumwene vwa Njambi vuli muyehi. Yesu wapolofwetele ha matangwa a kukotoka ngwendi: “Evi viñanda Vyavivwa vya Vumwene vakavyambulula mu kaye mwoshe ngwe kupwa vukaleho ku miyati yoshe, cho athinoni kukotoka kwa kaye kukaija.”—Mateo 24:14.

Evi viñanda vyavivwa vili na kunangula vanu vavavi, cho vili na kukulahetha vanu vavavwa ngwavyo ololo valikuwa vyuma vyanavakulahetha Njambi. Mushaka kulilongetha vyuma vyanakulahetha Njambi ndi? Nga mukemwo, cho yeni ha liputa lya mamanethelelo lya ino mangazini.