“MUNJAKELE NJI MWANIKE, VANU VA MU NANGA YETU VAKELE NA KULITUKATUKA NA KUKALUMUKA KWENDEKA.” Patricia ikeye wendekele awa majwi. Wendekele lalo ngwendi: “Kunjakele na kukonekela vakwetu. Nameme munjakolele, njakele na nkulundundu ku mbunge nga vakwetu vanjiluvaletha, cho oku kwakele na kunjonowetha kulala tulo.” Kuluvalaluvala na nkulundundu kwatha kwonowetha munu kupwa wa kuvwahelela, cho lalo kwatha kumunenela mishongo. Vaka-kutondethetha vanawana ngwavo vanu vaje kuvethi kukonekela vakwavo vanatha . . .

• Kwechelela matoto athsiye vuthamba vwavo na vakwavo na kuvalingitha valithzive vuli na kushaka kukala likalyavo

• Kuluvala vwathi na kulishoshomwena nambe kwombwa manene

• Kwaka manene mbunge ku vuvi vuvanavalingi vakwavo na kuvonowetha kuyoya mwamuvwa

• Vanatha kulithziva ngwavo kuvatha kukavangeya mashiko a Njambi

• Kukala mu vishoti vije vyatha kuvanenela mishongo ya kufwa ngwe mushongo wa mbunge na mushongo wa kutenda mu vithsiya wa kufwa ngwe arthritis na mushongo wa mutwe *

KUKONEKELA KULUMBUNUNA VIKA? Kulumbununa kuthambetha munu uje na tuvulumwina na kujeneka lalo kumuluvalela, nameme kuthinganyeka kumulinga shambandinga. Kukonekela kukulumbununa kwechelela vuvi, nambe kulitangetha ngwe vyai vyanamiviyithila munu embwe. Oloni munu napande kuthinganyekethetha na kuwana ngila ya kunenelamo kwoloka na kukala na vuthamba vwavuvwa na vakwavo.

Kukonekela kukamwetha ngwavo munu wapwa muka-kuthzivithitha. Muka-kukonekela vakwavo akathzivithitha ngwendi tuvavoshe tukathevuka mu kwendeka na mu vilinga. (Loma 3:23) Mbimbiliya ngwayo: “Pweni vaka-kulimanena [vaka-kulilavelela, NWT] umo na mukwavo, cho lithambetheni umo na mukwavo nga umo weni ali na kulinyenga hali mukwavo.”—Kolose 3:13.

 Ngechi, kukonekela inapu ngila ya kumwethelamo chithzemo chije “chikakutila vyuma vyoshe hamo lika.” (Kolose 3:14) Wembusaiti ya Mayo Clinic yendeka ngwayo kukonekela . . .

• Kukakoletha vuthamba vwetu na munu uje na tuvulumwina na kumuthzivila ngothzi na kumuthzivithitha

• Kukakwatha munu apwe wa kulikangula ku muvila na kukala mu kwoloka na Njambi

• Kukatepulula ku kulishoshomwena na vishoti na kuluvala

• Kukakwatha munu ajeneke kwombwa

LIKONEKELENI YENI VAVENYA. Livulu limo lyendeka ngwalyo ‘kulikonekela yeni vavenya kunatha kukaluwa manene, oloni kwapwa kwa theho’ mwafwa kumikwatha mukale na vithinganyeka vyavivwa na kulikangula ku muvila. (Disability & Rehabilitation) Vika vyatha kumikwatha mulikonekele yeni vavenya?

• Kethi muthinganyeke ngweni mwapwa mu va kulumbunuka, oloni anukeni ngweni tuvavoshe tukathevuka.—Muka-kwambulula 7:20

• Lilongetheni ku kuthevuka kweni mangana kethi mwilukileho lalo

• Thimpeni, kethi muthinganyeke ngweni vuthzeye na tupenga tweni twatha kuhwa mu litangwa limo.—Efeso 4:23, 24

• Likwatathaneni na vavuthamba vaje vakala na ngothzi, mwafwa vamishongangeya na kwendeka vyavivwa na kumileka vuthunga.—Vithimo 13:20

• Nga munaluvaletha mukweni, yeniko vwathi vwathi mukalombe likonekelo. Nga mukala mu kwoloka na vakweni, cho mupwa va kuvwahelela.—Mateo 5:23, 24

Hanima ya kulilongetha Mbimbiliya, Patricia, uje itunendeka ku maputukilo, washangumukile kukonekela vakwavo. Wathonekele ngwendi: “Njathethza vutenu vunjakele navwo. Kunjethi kuluvala manene, cho lalo kunjethi kuluvaletha vakwetu. Vinangulo vya mu Mbimbiliya vimwetha ngwavyo Njambi watuthzema, cho lalo washaka ngwendi tupwe va kuvwahelela.”

Ron wendekele ngwendi: “Kunjathele kutengulula vithinganyeka na vilinga vya vakwetu. Oloni njathele kutengulula vilinga vyange. Njashangumukile kuthethza nkulundundu mangana njikale mu kwoloka na vakwetu. Mu thimbu ino, njili na chitakutaku chachivwa.”