KUVINJA THIMBU YAILAHA NAMBE KUTENGUKA, KWATHA KUTHZEYETHA MUNU. Omwo Ulf wavinjile kalepa wendekele ngwendi: “Njombwele manene. Ndthzili yange yahwile njwa. . . Njalithzivile ngwe njiwangocho.”

Vukalu vwaliwanene navwo Ulf vumwetha ngwavwo tuvavoshe twatha kuvinja. Oloni kuli vimo vitwatha kulinga kutewa tuvinja manene. Vaticho nga mushongo wetu wama manene? Oku kutwonowetha kupwa va kuvwahelela ndi? Embwe. Cha kulivanga tuchithimutwiyeni ha vyuma vije vyatha kutukwatha tupwe va kulikangula.

LINGENI “VYUMA MU KWETHEKELA.” (1 Timateo 3:2, 11, NWT) Kunwa na kulya manene kukanene mishongo, cho lalo kukamanetha vimbongo. ‘Kethi ulipandakane hamo na vaka-kunwa manene vinyu, nambe vaka-kuthsa ha kulya. Vaka-kupenda na vaka-kuthsa ha kulya vakapwa tuhutu. Nga ulya na kulala lika tulo, cho ukathzala vithanyuthanyu.’—Vithimo 23:20, 21.

KETHI MUJWALETHE MIVILA YENI. “Tulijeletheni ku vyuma vyoshe vijwaletha muvila nambe mwonyo.” (2 Kolinte 7:1) Vanu vakajwaletha mivila yavo omwo vakathsakinya, nambe kuthipa makaya, nambe kunwa vwala, nambe vumbanda vwa kupendetha. Munga ya ku America ije ikatala vya kulinyungilila ku mishongo, yendekele ngwayo: “Kuthipa kwatha kutengula na kuviyitha maseluzi a mu muvila wa munu.”

MONENI MIVILA NA KUYOYA KWENI KUPWA VYA THEHO. “Muli [Njambi] mukemwo mutwayoyela, mukemwo mutwendela mukemwo mutuli.” (Vilinga 17:28) Eyi thimpi itukwatha tujeneke kwaka myonyo yetu mu vushonde nga tupanga, nambe twendetha minyau, nambe twangula vyuma vya thenga. Kutwapandele kulinga vyuma vije vyatha kutuvulumuna mu kushaka kuvwahelela mu kathimbu kakandondo lika.

LWITHENI VITHINGANYEKA VYAVIVI. Vithinganyeka vyeni na mivila yeni vikapangela hamo.  Ngechi kethi mushote mbunge na kuluvala manene na kukala na chipululu na kulinga vyuma vyeka vije vyatha kumivinjitha. Myatho 37:8 ngwayo: “Kethi ushote mbunge nambe kuluvala.” Cho lalo Mbimbiliya ngwayo: “Kethi mulishoshomwene ku litangwa lya imene, omwo litangwa lya imene likalimwena likelyo vavenya.”—Mateo 6:34.

KALENI NA VITHINGANYEKA VYAVIVWA. Mukanda wa Vithimo 14:30 ngwawo: “Mbunge ya kwoloka inena vukangule mu muvila.” Mbimbiliya inendeka lalo ngwayo: “Mbunge ya kuvwahelela ikangwitha muvila.” (Vithimo 17:22) Vaka-sayansi navo vanatava ngocho. Ndotolo umo wa ku Scotland wendekele ngwendi: “Nga uvwahelela, cho kulutwe kuukavinji manene ngwe vaje kuvethi kuvwahelela.”

KOLETHENI. Ngwe mwa Ulf itunendeka kumaputukilo, netu tunapande kukoletha nga tuli mu vyetheko vije vyambata thimbu. Vanu vamo vakathzeye manene ha thimbu ya vyetheko, cho ndthzili ikavahu. Mukanda wa Vithimo 24:10 ngwawo: “Nga uthzeya ha thimbu ya vukalu, cho ndthzili yove ipwa yaindondo.”

Vakwavo vakatakama munima ya kukoletha mu vyetheko. Vakawana vingila vya kukoletha mu vukalu. Mukemwo mwalingilile Ulf. Wendekele ngwendi munima ya kulombela na kuthinganyekethetha ha mithzimbu ya mu Mbimbiliya, “wawanene vingila vya kuhyanenamo vukalu vwendi.” Ulf walilongethele vyuma vyavingi vije vyamuthzembelekele na kumushongangeya alekeko vakwavo mithzimbu ya mu Mbimbiliya.

Steve nendi wakele mu vukalu vwakama. Wawile ku muti omwo wakele na myaka 15, cho watengukile muvila woshe. Omwo wakele na myaka 18 mavoko endi ashangumukile kupanga. Cho waile ku univeziti kuje kwakalikovelethele mu kunwa vumbanda vwa kupendetha na vwala na kulinga vukwithzi. Steve wathzeyele kweta noho washangumukile kulilongetha Mbimbiliya ije yamukwathele apwe wa kuvwahelela na kuhyana vilinga vyendi vyavivi. Wendekele ngwendi: “Njalithzivile ngwe njiwangocho ha thimbu yailaha, oloni hano njinavwahelela, cho lalo njili na kuyoya mu kwoloka na vakwetu na kujauka na vyuma vinjili navyo.”

Majwi endekele Steve na Ulf atwanukitha vili ku mukanda wa Myatho 19:7, 8, uje wendeka ngwawo: “Mashiko a Shukulu Kalunga apwa akulumbunuka, akewo akakoletha mwonyo. . . . Mashiko a Shukulu Kalunga apwa a vuthunga, voshe vaje vawononoka vavwahelela. Mashiko a Shukulu Kalunga apwa a kujela, ana munu mana a kuthzivithitha.”